Na Uto i Lizochka

iVakatakilakila

Mother holding a baby.

iVakaraitakai mai vei Annie Henrie

Keirau a curu kei watiqu ena Lotu mai Rusia ena 1995 ka vauci sara ena yabaki ka tarava ena Valetabu e Stockholm Sweden. Keitou a vauci vata kei rau na luvei keirau goneyalewa. Oti e rua na yabaki keirau a vakalougatataki ena sucu tale ni luvei keirau yalewa, o Lizochka. A lako vinaka sara tiko na neitou bula. Keitou sa bula marau sara tiko. Ia ni oti e rua na siga na nona sucu, sa tekivu me leqa na nona kana na neirau ka lailai. Ena dua na vula e rawata walega okoya e rua na ikatolu ni paodi bibi (300 na karamu).

A tukuna vei keirau na dauveiqaravi ena valenibula ni gonelalai me vakani vakawasoma cake okoya. Au raica ni a vinakata okoya me kana ia e sega ni rawa. Kena itinitini, a kauti koya na watiqu ki na valenibula ena siti. A solia kusarawa vei keirau na vuniwai e dua na kena ivakamacala—e dua na leqa ni vakasucu ena uto. E sega ni cakacaka tiko e dua na sala ni dra ki na uto, kei na vakadrodroi ni dra malumalumu ki na nona yatevuso e vakadredretaka vua me cegu se kana.

Sa gadreva okoya e dua na veisele, ia e Rusia na gonelailai duadua me ciqoma na veisele vakaoqo me yabaki rua. Na luvei keirau yalewa e se qai vula dua ga. A vakatura na vuniwai e dua na itatarovi me baleti koya ka kaya ni emuri, ni sa qase cake mai okoya, era na qai qarava na veisele.

Ni cava e dua na vula, sa torosobu saraga na ituvaki ni bula nei Lizochka, ka keirau vakusakusataki koya ki vale ni bula. Au a kubeti koya toka ni keitou draiva yani. A raici au mai okoya me vaka e kere veivuke tiko. Kevaka au a sega ni lewe ni Lotu, au sega ni kila na cava au na cakava. Ia au a vakanuinui kei na watiqu kivua na Turaga ka vakabauta deivaki ni na vinaka na ka taucoko. Au a tovolea me’u vakamalumutaki koya, ni kaya, “Kakua ni rerevaka e dua na ka, noqu ka lailai. E lomani kedatou na Kalou. Ena vukei kedatou o Koya, ka na daumaka na veika kece.”

Keitou sa mani yaco sara yani ni’u tauri koya matua toka kivei au, au a cici yani ki na tabana ni vakacurumi baca. A sa tekivu tasogo na matai Lizochka. A sa sega ni cegu rawa voli. Ena voleka ni tawavosa rawa, au a tukuna ki na dua na vuniwai me baleta na luvequ, ka ra kauti koya na vakailesilesi ni bula ki na tabana ni kauwai kusarawa. A tukuna na vuniwai ni sa tekivu vuce na nona yatevuso, ka ra vakacobara vua na ka ni cegucegu ki na dua na misini buli ga.

Ena siga ka tarava keirau a veivosaki vata kei na dairekita ni wasewase ni veisele uto. A tukuna okoya, “Au sa cakava na veisele vakaoqo ia vei ira ga na gone qase cake. Sa yabaki vica qo okoya?”

“Vula rua,” keirau kaya vua.

“Sa levu sara ga na nona mosi okoya. Sa rui ka lailai okoya, kei na vuce ni nona yatevuso e sa vakadredretaka tiko na ka kece, ia medatou kakua ni yaraka vakabalavu na ka oqo. Au se sega mada ni cakava e dua na veisele vakaoqo ki na dua na gone lailai. Au na tovolea meu cakava na ka kece au rawa ni cakava. Mo drau na volia e dua na gacagaca tabairua buli ga, ia e sau levu sara—rauta ni $2,100. Ena vakayacori na veisele ena loma ni va na siga mai oqo.”

Na cava me keirau cakava? E sega vei keirau se dua tale keirau kila me tiko vua na mataqali ilavo vakaoqo. Ia, na veika keirau sotava voli a ra sa kila talega eso, ka ra mani dolava na nodra yalovinaka kei na loloma ni Turaga keirau a mani rawata kina na ilavo e gadrevi. A volia o watiqu na gacagaca keirau a gadreva me vakabulai kina na bula ni luvei keirau.

Era sega walega ni masumasu ka lolo na veitacini kei na veiganeni taucoko ena neimami tabana me baleta na luvei keirau yalewa lailai ia o ira talega na daukaulotu kei na vuqa na Yalododonu ena yasa taucoko ni siti. Keirau a vakila na nodra veitokoni. Ni keirau dabe voli ena olo ena siga ni veisele, keirau a vakila na tiko ni Yalo Tabu ka vakila rawa na nodra masumasu na taci keirau kei na ganei keirau. Keirau kila ni ra sa volekati keirau! Ka sa tiko vata kei keirau na Kalou, ka tuberi ira tiko na dauveisele. Ena sega ni biuti keirau o Koya, ka na daumaka na veika kece.

Ni a curu mai tuba na dauveisele ni oti na veisele, okoya, ni vaka me kurabui, a tukuna vei keirau, “Sa daumaka na veika kece. Keimami sa curumaka na vaivo (valve). Au sega ni kila na iwalewale, ia e a rawati vinaka.” Ia keirau a kila na iwalewale a rawati vinaka kina. A vakalougatataki koya na Tamada Vakalomalagi.

A tiko e vale ni bula o Lizochka me tolu tale na siga me yacova ni sa ruru sobu na vuce ena nona uto kei na yatevuso. E a sele tadolavi okoya ka vauci tasogo ena dua na mebareni mamare saraga, ka ni oti e vica na siga era a veisele tale me sogoti kina na serena kei na gacagaca eloma. Voleka ni sega saraga na vuniwai a namaka me bula okoya. Ia keirau a vakabauta na Tamada Vakalomalagi kei na Nona kaukauwa, ka keirau vakabauta ke me sa Lomana vakaidina, ena vakabulai okoya.

Na Kalou duadua ga ena rawa ni soli Lizochka lesu tale vei keirau. Ena siga yadua, sa vinaka cake okoya. A tiko okoya e vale ni bula me dua tale na vula, ka sa tiko oqo e vale okoya vata kei keirau.

Na Kalou e sa Kalou ni cakamana. E dau rogoca o Koya na noda masu, ka donuya na noda gauna ni dredre, e laveti keda o Koya. Na veivakatovolei e vaqaqacotaka na noda vakabauta ka vakatavulici keda meda vakadinata, vakanuinui, ka dauloloma.