Au a Rogoci Ira na Gonelalai

iVakatakilakila

illustration of child praying by his bed

Na tauvimate oqo e dua na ka au sega sara ga ni taleitaka meu sotava tale. Io ni oti na noqu sa galala tu mai kina ena 12 na yabaki, qai lesu tale mai.

Au a rere ka lomaleqa kina. Au taroga na Tamada Vakalomalagi ka masuta na kaukauwa meu lakosivita na noqu vakatovolei. Au vakatakekere talega Vua me kakua ni lima na yabaki na noqu tauvimate oqo, me vaka na kena e liu.

E tolu na luvei keirau kei na watiqu, e rua na tagane ka dua na yalewa, ka ratou sa vakalougatataki keirau ena 13 na makubui keirau. Ni ratou kila na noqu yaluma, a tuvalaka na luvequ yalewa me dua na siga ni lolo kei na masumasu vakamatavuvale. O ira kece na gone, yabaki 1 ki na 10, era via masulaki Bubu, ka ratou via lolo o iratou na tolu sa papitaiso oti. Sa dua na vakacegu niu kila ni ra na lolo ka masumasu tiko ena vukuqu na watiqu, luvequ, kei ira na makubuqu.

Ena siga ka tarava niu yadra mai na moce, sa sega ni kaukauwa sara na tauvimate. Ena siga ka tarava sa vinaka cake sara. Ena ikalima ni siga sa yali sara ga vakadua na noqu tauvimate. Ena bogi oya, niu vakasamataka tiko se yaco vakacava na cakamana oya, a tara na yaloqu e dua na domo ka kaya vei au, “Au a rogoci ira na gonelalai.” E rogoci ira na Tamada Vakalomalagi ena nodra savasava ka sauma na nodra masu ena yalomalumalumu, vakabauta, kei na loloma.

E vakavuvulitaka na iVakabula:

“Kevaka dou sa sega ni saumaki mai, ka yaco me vaka na gone lailai, dou na sega sara ni curu ki na matanitu vakalomalagi.

“Ia ko koya yadua sa vakamalumalumutaki koya me vaka na gone lailai oqo, ko koya ga sa levu cake ena matanitu vakalomalagi” (Maciu 18:3–4).

Au sa veitaratara kei ira na makubuqu ka vakavinavinaka vei ira ena nodra lolo kei na masumasu ena vukuqu. Au tukuna vei ira na levu ni noqu lomani ira. Au tukuna vei ira ni sa rogoci ira na Tamada Vakalomalagi ka sauma na nodra masu.

Ni ra sa tubucake na makubuqu ena kosipeli, au nuitaka ni ra na nanuma na gauna a tukuna kina na Tamada Vakalomalagi vei budra, “Au a rogoci ira na gonelalai.” Kau nuitaka ni veika oqori ena vaqaqacotaka na nodra ivakadinadina ka vukei ira me ra tudei tu ena kosipeli.