Ena Dela ni Wai
Na dauvolaivola e vakaitikotiko mai Utah, Amerika.
Au a masuta voli na Tamada Vakalomalagi me vagalalataka na noqu nuiqawaqawa kei na yalolailai, ia kevaka e sega na veivakatovolei oqo, au na sega ni yacova na “vanua yalataki” cava ga a sa muataki au voli kina o Koya.
Rauta e ono na vula na noqu tauri vola oti ena koronivuli torocake, au a tekivu vakila na taqataqaya, so na ivakarau ni nuiqawaqawa, kei na biau eso ni yalolailai. Au a sega ni kila na vanua era lako mai kina na vakanananu oqo, ia era sa kaukauwa ka veivakamalumalumutaki.
Au a saga vakaukauwa me’u tauri au toka. E vanua ni cakacaka, na itavi vou cava ga ena vakavu nuiqawaqawa m’eu sega ni dabe dei kina. Ena veiciciyaki na noqu vakanananu, ka na tavatukituki kaukauwa sara na utoqu me’u vakasamataka ni na lade tani mai lomaserequ. Oqo ena yaco tiko me vica na siga, ka ni’u dau lesu voli ivale ni oti na cakacaka ena siga yadua, au na dau tavulaki au ena idabedabe balavu ni vakacegu. Ni bera ni’u vakila, sa tasevu na bogi ka sa tekivu tale e dua na siga ni cakacaka.
A tokadei na veivakanananu oqo me vakavula, ni oti tale mada ga na noqu kune cakacaka vou ka qara veivuke saumi.
Au masu ena veimataka ena noqu igolegole ki cakacaka me’u na kaukauwa tiko ni lako curuma na siga yadua ka lesu ki vale vua na watiqu kei na luvequ yalewa. Au a sega ni raica rawa e dua na icavacava ni noqu voraki, ka vuqa na gauna au a via vakasuka. Vuqa na gauna au a vakamasuti lomalagi me veivuke mai ni tonawanawa voli na mataqu. Au a masu vakayalomalua levu cake mai na kena au a cakava eliu, ni vakamasuti voli na Tamada Vakalomalagi me vukei au me’u kila deivaki na veivakatovolei oqo ka me vagalalataka tani mai vei au.
Au vakila na noqu yali ena butobuto kei na yaluma ni’u a sega ni vakila na Yalotabu. Ia na gauna a laveti au tani kina na Yalotabu mai na noqu veilecayaki, au a kunea na doudou me’u tomana tale—ke me yacova tale mada na noqu masu ka tarava. Au sa mai vakanuinui kivua na Tamaqu Vakalomalagi me baleta na masu wale tu ga ena gauna ni kana se dua na curumi vale wale vakabogi. Me kena isoqoni ga, au a toro voleka sara Vua.
Ciri voli ena dela ni Ua
Ena lomadonu ni noqu nuiqawaqawa kei na yaluma, au a wilika tale na itukutuku me baleti ira na Jereti ena nodra takosova voli na “wasaliwa titobu” (Ica 2:25). Sa rawa ni’u raitayaloyalotaka na nodra nanamaki guce ni ra sa curuma na nodra waqa. Ena rairai vakadomobula na nodra ilakolako, ia era sa kila tu ni ra sa vakanamata ki na “vanua sa digitaki mai vei ira na veivanua kecega” (Ica 2:15).
Me baleta na nodra ilakolako, eda wilika:
“A sa lewa na Turaga me liwa e dua na cagi kaukauwa ena dela ni wasawasa, me kauti ira ki na vanua yalataki; a sa kauti ira yani na matanicagi oqo ena loma ni wasawasa.
“A sa vakavuqa sara me nunu sobu na nodra waqa e loma ni wasawasa, raica sa liwavi ira na cava rerevaki, a sa ubi ira na ua lelevu sa vaka na ulunivanua na kena cecere.
“… Ni ra sa nunu e loma ni wai era sa masu vua na Turaga, a sa vakavudera cake tale na nodra waqa.
“Ia ni ra sa soko tiko e wasawasa sa liwa tiko na cagi me kauti ira ki na vanua yalataki; io sa kauti ira tikoga na cagi” Ica 6:5–8).
Na veitikina oqo sa mai vakamareqeti kivei au. Au vakila ni’u a vodo tiko ena noqu waqa, kei na veicagi ni nuiqawaqawa ni tavulaki au voli kei na veiua ni yaluma ni ovici au voli ka qai buluti au ena boto ni yalolailai. Ni’u a sa “nunu” ka rawa ni masu vua na Turaga, au na vakavuderi cake rawa ia ka’u na qai vakadromuci tale vakadua.
Au a wilika tale na tikina e 8: “Sa liwa tiko na cagi me kauti ira ki na vanua yalataki … io sa kauti ira tikoga na cagi” (vakamatatataki). A qai lauti au. Na cagi vata ga a vakavuna na ua lelevu me buluta na waqa a vakalougatataki ira talega na Jereti ena nodra ilakolako. Au a sa masuta voli na Tamada Vakalomalagi me vakamalumutaka na cagi kei na ua, ia keirau sega, au na sega ni yacova rawa na “vanua yalataki” cava ga e muataki au voli kina o Koya.
Na veitikina oqo a veisautaka na noqu ituvaki ni rai ena bula. Na noqu nuiqawaqawa kei na yaluma a vakalevutaka na noqu vakanuinui kivua na Tamada Vakalomalagi. Ke sega na cagi kei na ua, ke’u a sega ni mai kila na Kalou me vaka oqo—ka ra na sega ni yacova rawa na Jereti na vanua yalataki.
Ia oqo, ni oti e vica na yabaki ena sotavi ni ka oqo, na noqu cagi ni nuiqawaqawa e sa sega tale ni liwa voli kei na ua ni yaluma sa ruru ni buluti au. Ia kevaka kei na gauna me talelesu kina na cagi kaukauwa, au na masuta na Turaga ka vakavinavinakataka, ni kilai na wasawasa malumu e sega ni dau vakau waqa ki na vanua yalataki—me vaka e vakayacora na cava e wasawasa.
iVakaraitaki mai vei Jerry Harston