Vuvale: Na Uto ni Vulika

Ni tokona na vuli mai vale na veivakavulici e caka ena Lotu, o sa tara cake tiko e dua na yavu qaqa ni kena bulataki na kosipeli.

“Yalovinaka raica mo wilika na ilesilesi ni wiliwili me baleta na lesoni ni macawa ka tu mai.” O kila beka na irogorogo ni malanivosa oya? Era dau cavuka mai na gusuna e dua na qasenivuli e vakatakekere tiko ni oti na kalasi ena Lotu.

Me vaka ni sa rui ka bibi sara mo vakarau tu yani ki na nomu lesoni ena Sigatabu, o dau nanuma beka ena so na gauna ni nomu takete levu ni vuli kei na vakanananu vakatitobu sai koya mo sa vakarau sara tu ga vakavinaka ki na Sigatabu?

Na ka dina, e dodonu me veisau.

Na veivakavulici, na parokaramu, kei na itaviqaravi kece ena Lotu [era] yavutaki e vale ka tokoni mai na Lotu.”¹ E kena ibalebale oya ni inaki dina ni noda veisoqoni vaka-Lotu me tokona na vuli ni tamata yadua kei na matavuvale. Me vaka e vakavulica na Bisopi Vakatulewa o Gary E. Stevenson, “Na vanua taumada ni veivakavulici kei na vuli na vuvale.”² Ni yavutaki ena vuvale na vuli kei na veivakavulici, ena basika na mana me yaco na saumaki mai.

Oqori na itukutuku ni veituberi vakayabaki ni veimataisoqosoqo ena 2014, Vuli kei na Veivakavulici ena Vuvale kei na Lotu, sa tu ena initaneti ena annualtraining.lds.org. “E sega ni dua vei keda e taura vakamamada tiko na veivakavulici ena loma ni valenilotu, ena loma ni veivalenisoqoni,” e kaya o Elder Jeffrey R. Holland ena Kuoramu ni iApositolo Le Tinikarua. “Ia eda dau cakava kece tiko oqori ena noda bula taucoko, dina ga nida dau vinakata tu me yaco tiko ena bula eda bulataka tiko me 24/7.”³ Ni o umanaka na vuli ena 24/7 oqori ena veigauna ni veisiga ena bula ni nomu matavuvale, sa rawa ni o tauyavutaka e dua na yavu qaqa ni “vale ni vuli” (V&V 88:119) ka na vakarautaka vei iko kei na nomu matavuvale na ivakaruru kei na veitaqomaki vakayalo.

Vuli ena Vuvale

O na sega beka ni dau raica vakatotolo na vuana, ia kevaka o dau vakayagataka vakavinaka na veigauna rawarawa me yaco kina na vuli kei na veivakavulici ena nomu ituvatuva ni veisiga, ena rawa ni mana sara vakavinaka. Oqo na ivakarau eratou raica kina e vica na matavuvale na veivakauqeti oqo ena nodratou bula.

Gauna Rawarawa

iVakatakilakila

A father and son carrying skateboards as they walk down a wet road.

“Dau yaco ena so na gauna me dau dredre vei keda ni da veitalanoataka eso na iulutaga vakosipeli. Na veigauna sega ni vakarautaki ni veivakavulici sa vakalougatataki keirau me keirau vakavuvulitaka na veilesoni bibi vei ira na luvei keirau. Vakatalega kina, ni dau levu sara na gauna sega ni vakarautaki ni veivakavulici ena dua na siga mai na gauna vakarautaki, keirau sa dau toqova kina na veimadigi oqori me keirau vakavulica vei ira na luvei keirau na veivakavuvuli bibi. Me ivakaraitaki, au dau vakavuvulitaka na dina ena gauna ni volivoli. Dau rawarawa nodra vulica na luvequ na ivakavuvuli ni ra raica na sala e rawa ni ra vakayagataka kina.”

Mona Villanueva, Yatu Filipaini

Veitaratara kei na Veivosaki

iVakatakilakila

A mother and her young daughters sitting together on a sofa. They are looking at a magazine.

“Au dau vodobasi vata kei rau na luvequ yalewa ki koronivuli ena veimataka, dau levu kina na madigi ni veitalanoa. Ena dua na gauna walega oqo, keitou raica e dua na veiwatini ni rau veiba. Rau vuki mai vei au na noqu goneyalewa ka waraka meu vosa yani. Au qai taroga se cava na nodrau nanuma me baleta na ka a yaco oya. Erau tukuna vei au ni rau nanuma ni sega ni dodonu me vosa vakaoya vua na watina e dua na tagane. Ni oti oya, keitou qai veivosaki me baleta na vakamau kei na vakaitau. A yaco me veilaveti ka veivakatataki cake na neitou vodobasi 30 na miniti oya.”

Mario Lorenz, Guatemala

Buki iSema ena Gauna ni Kana

iVakatakilakila

Mother and children making cookies.

“Na gauna sega ni vakarautaki ni veivakavulici sa vukei au me vinaka cake noqu isema ni veiwekani kei ira na luvequ. Ni keitou dabe ena teveli e valenikuro ka kana ni suka mai na vuli, keitou dau veitalanoataka na veika e yaco e koronivuli ena siga oya. E vakavuqa ni dau dua vei iratou ena kaya e dua na ka a kaya e dua nona itokani, se na veika e nanuma, ni tukuna se cakava e dua na ka e dua na gone. Dau rawa vei au ena gauna oya meu wasea e dua na ivakadinadina ka veitalanoataka na nona nanuma na luvequ me baleta na ka a yaco. Au vakabauta ni da veitalanoa ena yalogalala, ni galala na yalodra na gone, era na tu vakarau me ra veivosakitaka na veika bibi ena gauna e gadrevi kina, baleta, ni sa tu e dua na ivakatagedegede ni veivakabauti, ka ra kila ni ra na vakarorogo na itubutubu.”

Alyson Frost, Kirisi

Na iWirini ni Veikauwaitaki

iVakatakilakila

Young family in New Zealand. The parents are holding their two boys.

“Keirau raica ka kila vakaveiwatini ni taumada ena neirau itavi me keirau vakavulici ira na luvei keirau ka sega ni nodra itavi na iliuliu, ia keirau vakavinavinakataka na veika era dau cakava ka veivuke ena veivanua e rawa kina. Era tu ena neitou tabanalevu na iliuliu vivinaka ka ra dau kauwai vakalevu sara vei ira na itabagone kei ira na gonelalai, ka cakava na veika kece era rawata me ra vukei ira me ra raica na vanua e rawa ni ra yaco kina, ka vakayavutaki ena veika era sa vakayacora tiko na itubutubu. Au sa dabe oti kei bisopi ena vica na gauna, kau dau veitaratara vakavinaka kei ira na iliuliu ni itabagone kau dau taroga ena vuqa na gauna na nodra itosotoso na luvequ. Na noda veitaratara wasoma me baleta na nodra itosotoso na luveda ena vukei keda kece me da kila na ivakarau me da vukei ira yadua kina.”

Jesse N. Arumugam, Sauca Aferika

Na Kaukauwa ena iVolanikalou

iVakatakilakila

Man studying the scriptures.

“E veivuke na vuli ivolanikalou meu vulici Karisito kei na Nona ivakarau ni bula me rawa kina niu yaco me vakataki Koya. E solia talega vakalevu sara vei au na Yalotabu, me dau tuberi au ka vakavulici au ena sala me rawa kina niu vakayagataka na veika au sa vulica meu vakarautaki au kina meu sotava na bolebole ni bula kei na veitemaki nei Setani vei au. Kevaka e sega ena noqu bula na veivakalougatataki oqo au kila niu na sega ni yacova rawa na vanua e dodonu meu yaco kina, vaka luve ni Kalou.”

Nathan Woodward, Igiladi

Vuli ena Lotu: 10 na iVakavuvuli e Dodonu me Kila na Qasenivuli Kece Sara

Me ikuri ni kena vaqaqacotaki na mana ni vuli kei na veivakavulici e vale, e rawa talega ni da vaqaqacotaka na veika e dau yaco ena valenivuli ni lotu. Ni ra vakayagataka na qasenivuli na 10 na ivakavuvuli oqo, era na vakavuna na saumaki mai ena nodra bula o ira era vakavulica.

Veivosakitaka kei ira na itubutubu, o ira e nodra itavi taumada na veivakavulici, mo kila na veika e gadrevi vei ira na lewenikalasi, qai veivakavulici ki na gagadre oqori.
Vakavakarau ka veivakavulici ena Yalotabu. Raica na taro kei na itaviqaravi ni vuli ka na vakarautaka na veivosaki e veiuqeti kina na Yalotabu ka na susugi ira cake vakayalo na lewenikalasi.
Vakavulica na tamata, ka sega ni lesoni.
Vakanamata ena uto ni vunau ni kosipeli.
Vakavulica vakatitobu e dua se rua na ivakavuvuli, mai na nomu tovolea mo vakavulica taucoko na veika e tu ena loma ni lesoni.
Sureta na Yalotabu ena nomu vakaitavitaki ira kece (raica na V&V 88:122).
Okata kina e dua na veisureti mana me cakacakataki—oqo e sega ni dua na ka me da lako ga ka wilika e vale, ia e dua na ka me da lako ki vale ka laki bulataka.
Wasea na nomu ivakadinadina me baleta na ivunau—ena mua ni kalasi kei na gauna kecega e uqeti iko kina na Yalotabu.
Bulataka na kosipeli, ka “vakavulici ira vakavinaka” na lewe ni nomu vuvale (raica na V&V 93:43–44, 50).
Vaqara na sala me tomani tiko kina na veivakavulici ena veigauna sega ni vakarautaki ena bula ni veisiga.