Na Masu ni Vakabauta

iVakatakilakila

A young woman kneeling by her bed in prayer. There is a copy of the Book of Mormon on the bed in front of her.

Na masu e sa levu cake mai na vosa eso eda tukuna vua na Kalou. E sa sala ruarua ni veivosaki mai vua na Kalou vata kei ira na Luvena.

Ni cakacaka na masu me vaka na kena dodonu, eda vakaraitaka na inaki ni lomada ena vosa rawarawa eso. E dau sauma vakaidina na Tamada Vakalomalagi ena biu ni vakasama ki na noda vakanananu ka salavata na veika e vakilai. E dau rogoca tu ga o Koya na masu yalodina eda cabora ni da masu ena yalayala ni talairawarawa ki Vua, se vakacava na Nona sauma kei na gauna cava ga e basika kina.

E cakava na yalayala oqo na Turaga kivei ira taucoko e wilika ka masulaka na iVola i Momani:

“ Ia ni dou sa ciqoma na veika oqo, au gadreva me’u vakamasuti kemudou, mo dou kerea vua na Kalou, na Tamada Tawamudu, ena yaca i Karisito, kevaka era sega ni dina na veika oqo; ia kevaka dou sa kerea ena yalodina, ena lomamudou taucoko, ka vakabauta na Karisito, ena vakatakila vei kemudou ko koya ena kaukauwa ni Yalo Tabu ni sa dina.

“Ia na kaukauwa ni Yalo Tabu ena vakatakila vei kemudou na dina ni veika kece ga” (Moronai 10:4–5).

Na yalayala oya e ka dina. E milioni vakacaca na tamata era sa vakatovolea ka vakadinadinataka na yalayala totoka oya me baleta na masu ena ciqomi ni veivakalougatataki ka sa vakatawana na nodra bula ena reki kei na marau vakasakiti. Na yalayala oya e sa baleta taucoko na noda masu ni kila na nanuma kei na loma ni Kalou me baleti keda. Sa rawa ni da vakayagataka ena gauna cava ga eda tauri vakasala kina mai vua na italai ni Kalou ka sa vakadonui me tuberi keda. Me ivakaraitaki, sa rawa ni da vakanuinui kina ni da sa rogoca taumada e dua na ivunau ena koniferedi raraba. Sa rawa ni da vakayagataka ni da sa vakatavulici mai vei ira na daukaulotu yalomalua sa kaciva na Kalou mai vua na parofita bula. Sa vakayagataki vakakina ki na ivakasala eda ciqoma mai vua na noda bisopi se peresitedi ni tabana.

Me cakacaka na masu ena noda bula, sa rawarawa na kena lawa. Me da na kerea ni kila na cava e dina ena masuti ni Tamada ena yaca i Jisu Karisito. Me da na kerea ena yalodina, ka vuna ni sa dodonu me na tiko vei keda na sasaga yalodina ni vakayacora na cava ga e gadreva vei keda na isaunitaro ni Kalou. Ka sa dodonu me na vure na noda sasaga vakaidina mai na noda vakabauti Jisu Karisito.

Na dauvakatataro e wilika na iVola i Momani ni bera ni papitaiso ka vakadeitaki sa rawa ni ciqoma ruarua na veivakadeitaki ni sa dina na ivola kei na dua na ivakadinadina ni a vakadewataka o Josefa Simici ena kaukauwa ni Kalou. Ni oti na veivakadeitaki me lewe ni Lotu, sa rawa me na noda itokani na Yalo Tabu me vakadeitaka na dina tale eso. Qai, gauna cava ga eda masu kina ena vakabauta, sa rawa ni da namaka na Yalo Tabu me vakadinadinataka vei keda ni sa Karisito o Jisu, ni sa bula tiko na Kalou na Tamada, ka Rau sa lomani keda kei ira taucoko na luve ni Tamada Vakalomalagi.

Oya e dua na vuna e tiko kina e dua na yalayala ena iVola i Momani ni na tiko e lomada na loloma cecere ni vakatakila na Yalo Tabu kivei keda na ivakadinadina ni o Jisu na Karisito: “Ia ko koya sa yalomalua ka yalomalumalumu, ka vakatusa ena isolisoli ni Yalo Tabu ni sa Karisito ko Jisu, sa kilikili me tu talega vua na loloma” (Moronai 7:44).

Sa tiko e dua na madigi levu meda tubu vakayalo kina ena vei Sigatabu ni lolo. Sa rawa ni vukei keda na Sigatabu ni lolo ni cuqena na veika e a sotava o Alama kei iratou na luvei Mosaia tagane, ni ratou a masu ka lolo me kila na dina tawamudu ka me rawa ni ratou vakatavulici ira na Leimani ena kaukauwa, ilesilesi, kei na loloma (raica na Alama 17:3, 9).

Ena Sigatabu ni lolo eda masumasu ka lolo. Me baleta na vakalougatataki ni dravudravua, eda solia e dua na iwase ni solisoli ni lolo vua na bisopi se na peresitedi ni tabana ka tautauvata na isau ni rua na kana eda sega ni kana kina. Na noda masu kei na vakanananu e sa vagolei ki na iVakabula kei ira ena vinakata o Koya meda qarava ena vakatakilai ni nodra gagadre vakayalo ka vakayago talega.

Sa na yaco na noda masu kei na gagadre me voleka sara ni vakataka na masu kei na gagadre ni iVakabula ni da lolo meda na yalomalumalumu cake, dauvakatavulici, ka dauloloma. Ka vaka ni cakava, eda masu meda kila na loma ni Tamada me baleti keda ka vakayacora sara.