Na Kaveti Jetiaiti

iVakatakilakila

A cabbage sculpted out of jade.

Ena noqu kaulotu voli e Taiwan, au a vakayagataka vakalailai kei na noqu itokani na gauna donuya e dua na siga ni vakavakarau ena Vale ni Yau Makawa na National Palace e Taipei. Na ka vakasakiti duadua oya e dua na tiki ni cakacaka ni liga ka vakatokai na Kaveti Jetiaiti. Era mai qoroya voli e vuqa na tamata, ia na ka ga au a raica e dua na kaveti ka ceuti ena jeti. A sega ni vakacalai na kena totoka, ia a rairai tiko beka e dua na ka au a calata voli.

Ni keirau sa cava mai na vale ni yau makawa, au a tarogi noqu itokani, “Na cava na nomu nanuma me baleta na Kaveti Jetiaiti?”

“Au taleitaka na tiki ni cakacaka ni liga oya!”

“Cava na vuna?” Au taroga. “E a dua ga na kaveti.”

“O veiwali tiko? Na Kaveti Jetiaiti oya e sa ivakatakarakara ni noqu bula!” a cauraka okoya.

“Na kaveti?”

“Io! O sega li ni kila na italanoa?”

“E sega saraga.”

A tukuna vei au okoya na italanoa. E dina sara o koya. E a yaco me ivakatakarakara ni noqu kaulotu kei na noqu bula.

Ni dua na ka e ceuti ena jeti me sau levu dina, na jeti sa dodonu me dua ga na kena roka e kata. Na veika e ceuti mai na jeti vinaka sara era volitaki ena isau levu baleta ni sa voleka ni tawakune rawa na jeti vinaka sara. Na Kaveti Jeti e drokadroka e dua na yasana ka vulavula na yasana kadua, ka sa tavutonotono tu ka vulaci. E sega ni dua na dauceuceu matai me na vakaoti gauna tu ena dua na tiki ni jeti vakaoya, me yacova ni dua e sa lako mai ka ra vakatoka na kai Jaina me matai ena ceuceu.

Kevaka e rawa ni vosa na jeti oqo, au sa rawa ni raitayaloyalotaka na veivosaki ena vakavurea vata kei na dauceuceu vou oqo. Au raitayaloyalotaka na dauceuceu ni tomika cake tiko na tiki ni jeti oqo.

“Na cava o vinakata?” ena taroga na jeti.

“Au vaqara jeti tiko me ceuti,” ena kaya na dauceuceu.

“Qai vakaraica e dua tale na tikina. Au sa sega ni yaga. E tiko vei au e rua na roka duidui ka veiwaki sara ko na sega ni rawa ni tawasei rau. Au tavutonotono tu ka vulaci. Au na sega sara ni yaga rawa. Kakua ni vakaotia na nomu gauna.”

“Oi, o iko na jeti lailai veilecayaki. Vakadinati au. Au matai sara ena ceuceu. Au na cakava mo dua na tiki ni cakacaka ni liga uasivi.”

Na ka e veivakurabuitaki kina na Kaveti Jetiaiti oqo oya ni vakayagataka na dauniceuceu duatani oqo na veika malumalumu ni jeti—na rua na roka, na tavutonotono, kei na vulaci eso—me cakava kina na kaveti me vaka e ka bula vakaidina sara. Na tikina vulavula seavu sa yaco me taba ni kaveti, kei na tavutonotono kei na vulaci eso a cakava na drauna me bulabula. Kevaka a sega na “malumalumu eso” ni jeti oqo, ke a sega ni rairai bulabula vakaidina.

Baleta na totoka ni tiki ni cakacaka ni liga oqo, e a yaco me ka ni loloma ki vua e dua na kawa vakaturaga e Jaina ka vakatakilai tu ena olo eso ni itikotiko vakaturaga totoka vaka-Esia me yacova na kena yaco sara ki na vale ni yau maroroi e Taiwan.

E vakananumi au me baleti Ica 12:27: “Au sa vota vei ira na tamata na malumalumu vakayago mera yalomalumalumu kina. … Na noqu loloma sa rauti ira kecega era sa vakamalumalumutaki ira vei au, ia kevaka era sa vakamalumalumutaki ira vei au ka vakabauti au, au na vakaukauwataki ira ena veika era malumalumu kina.

Ni’u a raica oti na Kaveti Jetiaiti, na ivolanikalou oqo a tadolava e dua na rai vou. Eda sa tautauvata taucoko na tiki ni jeti oqo, vakavo ga ni da se vakarautaki tiko oqo meda ceuti. Sa dodonu meda nuitaka na dauniceuceu, o Jisu Karisito, o koya ka na taura na noda malumalumu ka na vakaukauwataka. O keda, ena noda rai vakatawadodonu, dau raica ena so na gauna na noda tawadodonu eso ka qai yalolailai baleta ni da nanuma ni da na sega ni rawati keda vakavinaka. Ia na noda iVakabula, o Jisu Karisito, e raici keda ena ituvaki e rawa ni da rawata. Ni da vakatara na Nona Veisorovaki me cakacaka ki na noda bula, ena buli keda o Koya ki na tiki ni cakacaka ni liga uasivi eso ka na tiko vata kei na Tui ni tui ena dua na siga.