Veisaqasaqa ki na Noqu Kaulotu

iVakatakilakila

illustration of worried-looking young man

iVakaraitaki mai vei Greg Newbold

Au a lewena na Lotu niu se qai yabaki 15, ni qai oti e va na yabaki au a laki solia na noqu ivola kerekere ni laki kaulotu. Ena noqu vakatarogi tiko mai vei noqu peresitedi ni iteki, a vakacaucautaka na noqu sa lewa meu qarava na Turaga meu daukaulotu tudei. A qai kaya o iliuliu dauveivakauqeti oqo e dua na ka bibi ka a vakayaloqaqataki au: “Baraca, tekivu nikua, ena yaco ena nomu bula na veika duatani eso me saga mo veisautaka na nomu nanuma baleta na nomu qarava na Turaga.”

Niu mai waraka tiko na noqu kaci ni kaulotu, au a laki cakacaka vakavuli toka e Xerox. Ena cakacaka oqo a rawa kina meu rawata eso na ka au na gadreva ena gauna ni kaulotu ka vukei tinaqu me volia eso na ka e vale. A toso vinaka na veika kece sara.

E ka ni rarawa, a mani yaco dina na “veika duatani eso”. Matai, a laumoku o tinaqu ka voleka sara ni mate ena mavoa a yaco vua, ia a mana vei tinaqu na veivakabulai nei Tamada Vakalomalagi dauloloma.

Ena gauna o ya, keitou a rede vale tiko o tinaqu, rua na ganequ gone, vata kei au. Keitou a bula tiko ena kequ isau kei na dua na ilavo lailai a taura o tinaqu ena vuku ni mate nei tamaqu ena vica na yabaki sa oti.

Eso na tamata, oka kina na lewe ni Lotu, era dau taroga, “O na rawata rawa mo biuti tinamu tu mai vakaoqo ka laki kaulotu? Niu dau rogoca vakawasoma na mataqali taro vakaoqo e dau vakayalolailaitaki au.

E dua na siga a kacivi au o peresitedi ni iteki ka kaya ni sa yaco mai na noqu kaci ni kaulotu ka kerea meu gole yani ki na nona valenivolavola ena yakavi o ya meu laki kauta mai na waqanivola mai na itikotiko liu ni Lotu sa waraki tu mai vakadede. Au a nuiqawaqawa ka marau talega ena itukutuku oqo.

Ena siga vata o ya, a kerea o noqu manidia ni cakacaka me keirau veivosaki ni bera na vakasigalevu. Niu sa curu yani ki na nona valenivolavola, au a kidavaki ena lomavinaka, ka keirau veivosaki me vica na miniti me baleta na noqu vuli kei na veika au sa vulica rawa ena kabani. Oti, a qai kaya e dua na ka na tamata qaqa ni kabani oqo era dau tatadrataka tu e vuqa na tamata ena siti oqo: “Ko sa mai cakava e dua na cakacaka vinaka ena nomu vuli cakacaka tiko, ka gadreva me keitou sa tauri iko ka lewe ni mata-cakacaka eke. Cava o nanuma?”

Sa qai dua na vakatulewa dredre duadua ena noqu bula. Na sekodi sa vaka e dua na gauna tawamudu. Sa vaka me voqa na nodra tarogi au na tamata keu sa na biuti tinaqu ka sega ni tokoni koya vakailavo ka gole yani ki kaulotu.

Ia, au vakananuma kina na veika au vulica mai na ivolanikalou kei ira na iliuliu ni Lotu, ena sala e vakalou dina, kau sa kila deivaki kina ni sa vinakata dina na Kalou meu laki veiqaravi vaka-daukaulotu tudei ena Nona Lotu. Au kila ni na karona o Koya na noqu matavuvale, ka meu na vakararavi Vua, ka na vinaka na veika kecega.

Au a tukuna na veika oqo vei noqu manidia, ka voqa tikoga ki na noqu vakasama na nona vosa: “Au nanuma ga ni o cauravou yalomatua sara, ia oqo o sa mai biuta ki wai na madigi ni nomu bula.”

Mai na vu ni yaloqu dina au a vakavinavinakataka na nona soli cakacaka, ni qai oti e 28 na siga au sa tu mai na koronivuli ni kaulotu mai São Paulo, e Brazil.

Niu sa kaulotu tiko, a vakarautaka na Turaga ki na noqu matavuvale na veika ni bula mai vei ira na itokani ena Lotu ena sala talega e veivakurabuitaki. A bulabula cake sara o tinaqu ka tadu mai na veicakacaka vou vei tinaqu kei rau na ganequ.

“E dau yaco dina na “veika duatani eso” ni da sa lewa meda qarava na Turaga. Ena yalomalua au sa mai semata na noqu ivakadinadina ki na nodra ivakadinadina na udolu na tamata era vakaitavi ena qarava na Kalou ni veiqaravi ni kaulotu sa mai vakayaco-ka bibi ki na noqu bula.