Noqu iVakadinadina Veicurumaki

Mai vei Ivy Noche

E vakaitikotiko mai Singapore o koya e vola.

Vei au, na dina ni kosipeli i Jisu Karisito kei na dina ni iVola i Momani erau veicurumaki. Kevaka e dina na kosipeli, ena dina na iVola i Momani.

Era a vakavulica na daukaulotu ki na noqu matavuvale ena neitou itikotiko mai Singapore na kosipeli. A sega ni lewena na Lotu na tamaqu, ia o tinaqu e lewena. A vakavulici Jisu Karisito kei na Nona kosipeli vei keitou o koya. Niu se gonelailai toka mada ga, au dau cibitaka vei ira na noqu itokani niu Yalododonu Edaidai.

Au dau vakabauta na ivakavuvuli nei tinaqu. Ia niu sa cauravou mai, a tarogi au e dua na daukaulotu seu sa wilika vakavica na iVola i Momani. Sa tarogi oti vei au e liu na taro oqo, ia ena gauna oqo au kila baleta niu se bera ni wilika na iVola i Momani, au sega ni kila na kena dina.

E Dua na Dina Sega ni Cakitaki Rawa

Sa sega tale ni rawa niu qai levea e dua na dina sega ni cakitaki rawa: na dina ni kosipeli i Jisu Karisito kei na dina ni iVola i Momani erau veicurumaki. Kevaka e dina na kosipeli, e dina na iVola i Momani. Me vaka niu sega ni kila se dina na iVola i Momani, ena gauna oqo sa sega niu vakadeitaka rawa na veika kece sa yaco meu vakabauta tu. Sa veilecayaki na noqu vakasama, ia na taro—“E dina beka na iVola i Momani?”—e tu ga e yaloqu.

Na noqu veiwekani tubucake tiko kei na iVakabula o Jisu Karisito, sa vakavuna talega na noqu gadreva na dina. Na siga au qai kila kina ni sega ni rawa ni veirauti na veika au vulica me baleti Jisu Karisito kevaka au sega ni wilika vagumatua na iVola i Momani sai koya na siga au gadreva kina meu kila na kena dina.

Kacivi Meu Qasenivuli

Au a masulaka na veituberi. Ena gauna oqo, a kacivi au kina na noqu peresitedi ni tabana meu vakavulica na iVola i Momani ena kalasi ni iVunau ni Kosipeli. Au ciqoma na veikacivi baleta niu vakila ni rawa ni o koya oqo na nona isaunitaro na Turaga me vukei au meu kila na dina ni iVola i Momani ka toro voleka yani vua na iVakabula.

A dredre na veivakavulici. Ni oti na imatai ni vica na Sigatabu, au kila niu na sega ni rawa ni mana me yacova na gauna au sa vakabauta kina na iVola i Momani.

Tadolava mai na iTalanoa mai na dua na iWase ki na duatale

Sa tekivu meu vulica na iVola i Momani e veimacawa ka kunea na reki ena noqu wiliwili. Era tadolavi mai na italanoa ena iVola i Momani mai na dua na iwase ki na duatale ka dreti au voleka yani vei Jisu Karisito.

Au wilika na sucu i Karisito, ka a raica ena dua na raivotu o Nifai:

“Au sa raica talega na koro ko Nasareci; ia au sa raica ena koro ko Nasareci e dua na goneyalewa totoka sara ka vulavula. …

“Ka sa kaya vei au ko koya: Raica, na goneyalewa savasava ko sa raica, sai koya na tinana vakayago, na Luve ni Kalou” (1 Nifai 11:13, 18).

Au wilika me baleta na ituvatuva ni marau ka vulica ni gadrevi na vakabauti Jisu Karisito ena noda vakabulai. E vakavuvulitaka o Amuleki:

“Au sa kila ni na lako vakaidina mai na Karisito vei ira na luve ni tamata, ena mai bokoca na nodra ivalavala ca na nona tamata, ia ena mai sorovaka na nodra ivalavala ca na kai vuravura; me vaka sa yalataka na Turaga na Kalou.

… “Raica sa kilikili me vakacabori e dua na isoro, me vaka sa virikotora tu na Kalou Tawamudu, kevaka e sega era na rusa vakaidina na tamata kecega” (Alama 34:8–9).

Au wilika talega me baleti Jisu Karisito ena nona veiqaravi vei ira eso tale na nona sipi e Amerika makawa, kau kila ni o Koya na Kalou ni veivanua kecega. Au sa kaya vakaidina vei kemudou, sai kemuni ga au sa kaya kina vakaoqo: “E so tani tale na noqu sipi, era sa sega ni tiko ena bai oqo; sa kilikili me’u kauti ira tale ga mai, a ra na rogoca na domoqu; ena qai duabau ga na qele ni sipi, ka duabau ga na ivakatawa” (3 Nifai 15:21).

E Yaco mai Vakalalai na Noqu iVakadinadina

Niu wilika na iVola i Momani, sa rarama cake na noqu vakabauti Jisu Karisito ka rabailevu cake na noqu kila na Nona ituvatuva (raica na Alama 32:28).

Au vakadinadinataka ni iVola i Momani na vatuivakadei ni noda lotu. Sa vakatakila vei au na Yalo Tabu ni o Josefa Simici na parofita dina ka a vakalesuya mai na Lotu ni Kalou ki vuravura ka vakadewataka na iVola i Momani mai na peleti koula. Na iVola i Momani e vakadinadinataki Jisu Karisito ka cakacaka vata kei na iVolatabu. Erau vakadinadinataka vata ni o Jisu Karisito na Luve dina ni Kalou ka sa Kalou ni veivanua kecega, ka sega ni dua ga.