Taro kei na Kena iSau
E dredre me da lewa vakamatau na noda vakanananu, ia e rawa ka na kauta mai na veivakalougatataki: “Ni o vulica mo lewa vakamatau na nomu vakanananu, sa na rawa mo vakamalumalumutaka na itovo ca ni bula, io na itovo lolovira sara mada ga vakatamata yadua. Ena rawa ni o rawata na yaloqaqa, vakamalumalumutaka na rere, ka taukena na bula mamarau.”1
Vakasamataka talega na veivakalougatataki oqo:
-
Na vakasama savasava ena veivuke ena sala me “na taucoko sara kina na nomu vakabauta ena mata ni Kalou,” ka na “salavata voli ga kei iko na Yalo Tabu” (V&V 121:45–46).
-
Na vakanananu savasava ena vukei iko mo vakila na veivakauqeti, baleta na Yalo Tabu ena vosa ki yalomu kei na nomu vakasama (raica na V&V 8:2–3).
-
Na vakanananu savasava ena vukei iko mo talairawarawa na imatai ni ivakaro cecere: mo lomana na Kalou ena yalomu taucoko, kei na nomu nanuma kecega (raica na Maciu 22:37).
E levu tu na ka e rawa ni o cakava me dau savasava tu kina na nomu vakanananu, me vaka e rawa ni o raica mai na vakasama eso ena veidraunipepa oqo. Ia e dua na ka bibi e rawa ni o cakava—ka dau rawa vakamalua—sai koya mo vakamalumalumutaka na “tamata vakayago.” Na tagane se na yalewa vakayago e dau taleitaka na vakanananu dukadukali. Oqo na ivakarau mo vakamalumalumutaka kina: “A sa veimecaki na itovo vakayago kei na Kalou me tekivu sara mai na lutu i Atama, ka na vaka tu kina me tawamudu, kevaka eda sega ni vakarorogo ki na domo ni Yalo Tabu, me da biuta tani na itovo vakayago ka yaco me tamata yalosavasava ena vuku ni isoro i Karisito na Turaga, ia me da vaka na gonelailai, me da talairawarawa, yalomalua, yalomalumalumu, dauvosota, dauloloma” (Mosaia 3:19).
Na cava e dua na ka e rawa ni o cakava nikua mo sureta kina na Veisorovaki ni iVakabula me kauta mai na veisau oqo ki na nomu bula?
Vakauitukutuku kei na iTokani
E dua na itekitekivu vinaka me da digitaka na iyaloyalo, ivakatagi, kei na ivola veilaveti. Digitaka na itokani vinaka me rawa kina ni o dau vakaitavi ena veitalanoa kei na itaviqaravi kilikili ni o tiko vata kei ira. Ni tu e levu na ka mo dau vakasamataka, ena yaco me rawarawa cake vei iko mo biuta laivi na vakanananu ca, ka ra na sega ni dau yaco wasoma mai.
Amber S., yabaki 18, British Columbia, Canada
Masu
Na masu e dau kauti au vakavoleka vei Tamada Vakalomalagi ka vukea meu dau vakanamata ki na veivakanananu vinaka. Na vuli ivolanikalou e veisiga e dau vaqaqacotaka noqu yalodei meu rawa na veivakatovolei; au rawa ni raica ena ivolanikalou na kedra ivakaraitaki na tisaipeli yalodina i Karisito. Dau vukei au talega meu vakasavasavataka tiko noqu vakasama na noqu wasea noqu ivakadinadina.
Dasha M., yabaki 17, Kyiv, Ukraine
iVolanikalou
Dau veivuke na wili ivolanikalou ena veimataka ni se bera na vuli. Ena gauna ga e yaco mai kina e dua na vakanananu ca, au dau vakaisosomitaka sara vakatotolo ena dua na ka vinaka. Kakua ni kaya walega, “Sega, kua ni vakasamataka qori” (e ka vinaka qori), vakaisosomitaka sara ga ena dua na vakanananu vinaka. Nanuma tiko, o iko o lewa na nomu vakanananu, e sega ni o Setani. O keda na luvena tagane kei na yalewa yalodina na Tamada Vakalomalagi ka sa noda itavi tudei me da vakavinakataki keda cake.
Nick C., yabaki 16, Arkansas, Amerika
Vinaka se Donu?
E sega ni rawa ni da dau lewa na kena yaco mai e dua na vakanananu, ia e rawa ni o lewa na kena mai tiko. E rawa ni o taroga: Ena kauta beka mai vei e dua na ka vinaka na vakanananu oqo? Ena vukea me muadonu noqu ilakolako? Ni basika mai e dua na vakanananu veitemaki, lagata e dua na sere vinaka, vakasamataka e dua na ka vinaka, se masu. E ka ga ni noda vakaisosomitaka e dua na vakanananu ca ena dua na ka vinaka.
Lisa P., yabaki 17, Denmark
iVakaraitaki nei Liai
Ena 1 Nifai 15:27, e tukuna o Nifai vei iratou na tacina, ni a vakavolivoliti ena dukadukali na tamadratou, ena nona raivotu ni vunikau ni bula. Ia a sega ni raica o Liai na dukadukali baleta ni “sa rui levu na ka e vakananuma tiko ka sega kina ni raica na kena dukadukali.” Oqo e dina tu vei keda nikua. Kevaka eda gadreva me da vakasinaiti ena buladodonu, masulaka, ka vakanamata ga ena veika ni buladodonu, ena qai vakasinaiti na noda vakasama ena veika dodonu kei na ivalavala dodonu ka na sega tale ni tiko kina na kaukauwa ni vakanananu tawasavasava.
Hattie W., yabaki 16, Arizona, Amerika
Serenilotu
Na serenilotu ena rawa ni vukei keda me savasava cake noda vakanananu. Na ivakatagi vinaka ena laveta cake na yalo. Ni rawa meu vakarorogo ki na serenilotu, era dau laveti au cake ki na dua na itagede malumu vakaselesitieli. Era vukei au meu nanuma na nona loloma na Tamada Vakalomalagi me baleti keda yadua, ka rawarawa cake kina meu levea na veitemaki.
Amanda A., yabaki 18, Amazonas, Brazil
Vuli iVolanikalou Vakamatavuvale
Ni dau yaco mai ki na noqu vakasama na vakanananu tawasavasava, au dau tovolea meu vakasamataka na ivolanikalou keitou dau wilika vakamatavuvale ena mataka. Ena 6 na kaloko e veimataka, keitou dau wili ivolanikalou vata vakamatavuvale. Se mataka lailai, ia e ka ni veivakalougatataki ka dau vakaukauwataki au ena loma ni siga.
Elena W., yabaki 16, Switzerland
Sakaramede
E tukuni ena masu ni sakaramede ni kevaka eda taura na yaca i Karisito, muria na Nona ivakaro, ka dau nanumi Koya tikoga, ena dau tiko ga kei keda na Nona Yalotabu. Ena noda nanumi Koya, eda na sasaga me da biliga tani na vakanananu vakavuravura ka vakanamata ki na veika tawamudu. Ni da dau nanumi Koya tikoga, ena veisau me vinaka cake na noda vakanananu, gagadre, kei na noda ivalavala.
McKay M., yabaki 18, Utah, Amerika