Noqu Masu ena Wasawasa Vualiku

iVakatakilakila

drawing for LDS Voices

iVakaraitaki mai vei Bradley H. Clark

Niu yabaki 17, keitou a vakaitikotiko ena dua na yanuyanu ena ceva kei Norway ka vakatokai ko Andabeløy. A saumaki mai ki na Lotu o tamaqu e Andabeløy, kau papitaiso o au ena wasawasa e kea.

Au gonedau voli ena gauna oya kau matai sara toka ena vakau waqa. A biuti au o tamaqu meu cicivaka na veiqaravi ni kau pasidia e wai ka ra dau vakayagataka na vakaitikotiko ena vanua ko ya.

Ena dua na siga ena 1941 a qiriti keitou mai na vuniwai mai Flekkefjord, ki na vualiku. E gadreva vakatotolo sara na veiqaravi vakavuniwai e dua na marama ka vakaitikotiko ena dua na vanua rauta ni rua na auwa ena waqa. E kerea o Vuniwai Hoffman ke rawa niu laki kauti koya mai me mai raica, ia erau lomaleqataka na noqu itubutubu e dua na cava ka liwava tiko na Wasawasa ena Vualiku. Keitou mani nanuma me keitou masu, ka taroga vei Tamada Vakalomalagi se cava me caka. A saumi mai meu lako.

Niu biligi Tryg, na noqu waqa ni qoli 31 na fute (10 na mita), yani ki wai, e ca sara tu na draki ka lelevu na ua. Niu vakavodoka na vuniwai, sa bola na mua ki wasawasa. Me keirau gole ki na dua na itikotiko ena vualiku kei Lista, ka tiko ena baravi veivatu ena ceva kei Norway—ka dau kilailevu ena kena draki voravora kei na icaca ni waqa.

Keirau soko curuma na cava ka yacova yani e dua na icurucuru veivatuvatu, rauta ni 40 na fiti (12 na mita) na kena raba, me keirau rawa ni yacova yani na vanua keirau lakova tiko. Era ka lelevu na ua, e dredre noqu vakacuruma na waqa ena icurucuru, era veitubutubui yani ki na icurucuru ka caroba yani ki na veivatuvatu.

“Na cava beka me daru cakava?” e taroga mai o vuniwai ena dela ni vakacevaruru.

“Me daru na masulaka,” Au sauma yani.

Au tu vakadua ka masu, ka kerea na veidusimaki nei Tamada Vakalomalagi. Ena gauna ga au vakaemeni kina, sa votu mai vakamatata vei au e dua na kena isau. Au nanuma mai vakasauri na italanoa a tukuna vei au e dua na gonedau qase. A qoli voli ena vanua vata oqo ena dua na draki ca ka sega ni rawa ni yaco ki vanua. Ni waraka tiko me oti na cava, e raica rawa e dua na ivakarau ni kena tubu mai na ua. Ni oti na kena tubu mai e tolu na ua lelevu, a cegu vakalailai—na cegu qori e rauta vinaka me curu yani kina ena icurucuru.

Au sa dau qoli vakalevu ena vanua oqo ia au sega ni raica rawa na ivakarau ni tubu ni ua oqo. Ia, au kauta mai na waqa ki na gusu ni icurucuru, keirau qai mai wawa ka vakararai toka yani ni sa tubu mai e tolu na ua lelevu. Tarava matata mai, e dua na maravu vakasauri. Au vakasisia yani ki liu na waqa ena dela ni wai maravu e loma ni toba ka kauti Vuniwai Hoffman mai ena bula vinaka ki baravi. A vakusakusa yani ko koya vua na marama tauvimate kau wawa toka ena waqa, ena vakavinavinaka ni sa sauma mai na Tamada Vakalomalagi na noqu masu.

Ni lesu mai na vuniwai ni oti e dua na auwa, e qai kaya, “Daru sa vakabulai koya!”

Ena marau ena vuku ni itukutuku kei na kena sa vinaka cake na draki, au vagolea yani ki vale na waqa ka sega ni dua na ka e yaco.

Au vakadinadinataka ni da gadreva na veivuke, e dodonu me da masu. Au kila ni na sauma mai na Tamada Vakalomalagi.