Me Kunei Vakacava na iGu kei na Qaqa

Eso vei kemuni sa kila tiko na veika me rawata kei na vanua e via yaco kina ena nona bula, ka so vei kemuni e sega. Eso vei kemuni e vaka me levu sara na veivakalougatataki kei na vuqa na veimadigi vakasakiti e waraki koya tu mai. Eso vei kemuni e nanuma, ena dua na gauna ena vuku ni so na inaki, ni kalouca ka vica wale na veika taleitaki e tu e matana ena gauna oqo.

Se o cei ga o iko kei na vanua cava ga o tu kina ena nomu vakasaqara nomu sala ena bula, au solia vei kemuni na “sala, na vu ni dina, kei na vu ni bula” (Joni 14:6). Se vanua cava tale o nanuma ni o lako tiko kina, au kerei kemuni mo ni “lako mai [Vua]” (raica na Maciu 11:28–30) oqo na imatai ni kalawa me da yaco kina ki kea, ena noda kunea na noda dui marau kei na igu kei na qaqa.

Ena imatai ni gauna erau rogoca kina ko Adriu kei Filipe ni vosa na Karisito, a lauti rau sara, ka vesuka nodrau vakasama ka rau muri Koya ni lako tani ko Koya mai vei ira na lewevuqa. Ni vakila ni dua e muri Koya, a vuki mai na Karisito ka tarogi rau, “A cava drau sa vakasaqara?” (Joni 1:38.). Eso tale na vakavakadewa e tukuna ga vakarawarawa, “Na cava drau vinakata?”

Erau sauma, “Ko ni sa tiko mai vei?” se “Ko vakaitikotiko mai vei?”

Sa kaya vei rau na Karisito “Lako mai ka raica.” Ena dua ga na gauna lekaleka e muri a kacivi Pita kei na so tale na iapositolo vou ko Koya ena yalo vata ni veisureti, “Drau muri au mai” (raica na Maciu 4:19).

E vaka vei au ni inaki ni noda bula e vakadewai sobu mai ki na rua na ka lalai oqo ka a yaco ena imatai ni cakacaka ena nona veiqaravi na iVakabula ena bula oqo. E dua na ka sai koya na taro, vei keda yadua, “A cava drau sa vakasaqara? A cava drau vinakata?” Na ikarua sai koya na Nona isaunitaro ena sala me da rawata kina. Se o cei ga o keda, kei na cava ga na noda leqa, e dua tua ga na kena isau mai Vua, me tawamudu: “Drau muri au mai.” Drau lako mai ka raica na ka au dau cakava kei na ivakarau au vakayagataka kina na noqu gauna. Vuli vei au, muri au, ena gauna vata oqori au na sauma na nomu masu ka vakaceguya na yalomu.

Kemuni na noqu itokani gone, au sega tale ni kila e dua na sala mo qaqa se mo marau se mo taqomaki kina. Au sega tale ni kila e dua na sala mo rawata kina mo colata na nomu icolacola se mo kunea na ka e vakatoka o Jekope “na veivakalougatataki sa vakarautaki tu me nodra na vuku kei na yalomatua era sa yalosavasava” (2 Nifai 9:43). Oqori na vuna eda cakava kina na veiyalayalati tabu ka yavutaki ena isoro ni veivakaduavatataki nei Karisito, oqori na vuna eda taura kina na Yacana.

Oi kemuni na Karisito, na Luve ni Kalou bula. Oqo na Nona Lotu dina ka bula. E gadreva o Koya me da lako mai Vua, me da muri Koya, me da kune vakacegu mai Vua. Oti sa qai gadrevi keda o Koya me da vakacegui ira na tani. Me tu vei keda na vakabauta e ganita me da ciqoma kina na vinaka ni Kalou kei na loloma cecere ni Luvena e Duabau Ga. Me da lako mai Vua kei na Nona kosipeli ka vakabulai.