Vulica Vakalevu na Veika ena Yaco
E vakaitikotiko mai Oslo e Norway o koya e vola.
Era vakayagataka e dua na siga, na itabagone mai Oslo, Norway mera vakarautaka nodra bula vaka-daukaulotu tudei.
iYaloyalo ni vatuka mai vei lukas_zb/iStock/Thinkstock
Vakatekivu mai na gauna a vakaraitaka kina o Peresitedi Thomas S. Monson na veisau ni yabaki ni bula ni veiqaravi ni kaulotu, era a gagadre vakusakusa mai na itabagone taucoko ena Lotu sega walega ki na veisureti oqo ni veiqaravi ia ki na veisureti talega ni vakavakarau ki na veiqaravi. E dua na sala ni vakavakarau o ya mo vulica na veika ena yaco ni ko sa yaco mo daukaulotu tudei.
Eso na itabagone mai Norway era a cakava sara ga oqo ena dua na siga ni “Vakila na Kaulotu” e ratou a vakarautaka na Tabanalevu o Fredrikstad ena iTeki o Oslo Norway.
Curu ena “KNK”
Era soqoni vata yani na itabagone ena dua na rumu e valenilotu me vakatakarakarataka na koronivuli ni kaulotu. “A neimami ilesilesi me keimami vulica e dua na matanitu,” e kaya o Jakob R. ena Tabanalevu o Moss. “Keimami a vakila na veika e dau yaco ni sa ciqomi e dua na kaci ni kaulotu kei na nomu kila ni sa rawa mo kacivi ki na dua na vanua e duidui sara mai na kena o sa vakamatautaki iko kina.”
Sotavi “Peresitedi ni Kaulotu”
“Keimami a qai gole ki na katuba e tarava me sota kei na dua sa kaulotu oti e vakatakarakarataki peresitedi ni kaulotu,” e kaya o Saimoni W. ena Tabanalevu o Oslo. E ratou sa veivosaki o daukaulotu oti kei na so tale na daukaulotu oti me baleta na veika ena yaco ena gauna ni kaulotu. “Au nanuma kina ni sa rui vinaka na vuli mai vei ira na daukaulotu oti ni kena namaki na veika eso ena gauna ni kaulotu tudei,” e kaya o Saimoni. Era a yadua talega na vakaitavi na ivakatakilakila ni yaca, ka lesi e dua na nodra itokani, ka ra vakasalataki mera tiko vata ga kei ira nodra itokani ena veigauna kece.
Vakatorocaketaki ni Kila Vakacakacaka
Na vuli a vakavulici ira na itabagone ena vakatorocaketaki ni bula vakayalo ka sa vakakina na kena qaravi na veika e gadrevi me baleta na yago me vakataka na sava isulu, vakamuri e dua na tuvailavo, ka me vakatutaki vinaka na yago.
“Na ka au taleitaka ena vuli o ya na sala ni kena tekivutaki e dua na veivosaki ni kosipeli,” e kaya o Inger Sofie J. ena Tabanalevu o Oslo. “Oqo e dua na ka au sa rawa ni tekivutaka oqo.”
“Au taleitaka na veivosakitaki ni sala me vakayagataki kina na Vunautaka na Noqu Kosipeli,” e kaya o Karl Frederik O. ena Tabanalevu o Fredrikstad. “Au nanuma ga ni sa tiko na nodra dui lisi ni tiki ni ivolanikalou na daukaulotu mera vulica, ia au qai raica ni veika au vulica tiko ena semineri ena vukei au niu sa kaulotu ka vakakina na veika au sa vulica tiko ena Vunautaka Noqu Kosipeli”
E vuqa na cauravou era kaya ni dua na gauna guilecavi dredre ena vuli o ya na neimami yania sara ga na sote vulavula. “Au nanuma lesu kina ni tiko e vuqa na kila meu vakayacora meu vakarau kina ki na kaulotu tudei,” e kaya o Jakob.
“Au vulica ni levu na ka au rawa ni cakava ena gauna oqo meu tomani rau kina na daukaulotu eke me keimami sa dua ga kina na timi,” e kaya o Sarah R. ena Tabanalevu o Sandvika. “Era sa daukaulotu talega na lewenilotu.”
Me veivakananumi ni ra sa veiqaravi tiko e vuravura taucoko na daukaulotu, na veika ni bula ena duidui mai na veimataqali matanitu. “Au nanuma kina meu sa vakatovolea tiko na veikakana vou meu vakamatautaki au ki na kakana au sega ni dau kania vakawasoma. Oqo ena vukea meu vakamatautaki au vakatotolo keu sa na kacivi ki na dua na vanua era kania na veika au sega ni dau kania,” e kaya o Saimoni.
Tu Vakarau
“Ni cava na siga, ni rogoci oti nodrau vakadinadina e rua vei ira na itabagone kei na rua se qai lesu ga mai ena kaulotu, keimami a lagata na serenilotu ‘Kacivi mo Veiqaravi’” e kaya o Liss Andrea O. ena Tabanalevu o Fredrikstad. “Au vakila ni kevaka meu na lagata tiko ena veigauna na sere oqo, ena veivakananumi tiko vei au ena gauna ni kaulotu, ni keimami sa qarava tiko na Tamada Vakalomalagi ka na vakalougatataki keimami o Koya.”
Ni mai cava na siga, era sa mai kila deivaki na itabagone ena iteki ni sega walega ni ra sa vakavakarau tiko mera sotava na gauna ni daukaulotu ia ni sa rawa mera sotava na kaulotu ena gauna sara ga oqo vakakina ena nodra bula taucoko.