Jeremaia

“O Jeremaia a bula ena dua na gauna kei na vanua dredre, ia a vakatarai koya na Turaga me raica taumada ‘e dua na gauna ni inuinui ena nodra vakasoqoni vata mai na Isireli”—ena gauna oqo.’”¹—Linda K. Burton, peresitedi raraba ni iSoqosoqo ni Veivukei

iVakatakilakila

Composite photo's of a scroll on fire, colored paper, and a illustration of Jeremiah of the Old Testament.

iTaba ni ivola vivigi mai vei dimdimich/iStock/Thinkstock; Jeremaia, mai vei Walter Rane © IRI

O au na luvei Ilikaia tagane, e dua na bete mai Anacoci, volekati Jerusalemi. Donuya na noqu itabagone, “sa yaco vei au na vosa i Jiova, ka vaka,

“Ni’u a bera ni buli iko ena kete ka’u sa kilai iko; ia ni ko a bera ni sucu mai ka’u sa vakatabui iko, ka lesi iko mo nodra parofita na veimatanitu.”

Au vakila ni’u a se bera ni vakavakarau ki na veikacivi oqo, ka’u mani sauma lesu, “Raica, ka’u sa sega ni kila vosa: ni’u sa gone ga koi au.”

A sauma lesu na Turaga, “Mo kakua ni kaya, Au sa gone ga koi au: ni ko na lako vei ira kecega ka’u sa talai iko kina, ia na ka kece talega au sa vakarota vei iko ko na tukuna.

“Mo kakua ni rerevaka na matadra: ni’u sa tiko vata kei iko koi au me’u vakabulai iko.” Na Turaga sa qai “tara na gusuqu” ka biuta kina na nona vosa.²

Au a parofisai e Jerusalemi me 40 na yabaki, mai na 626 ki na 586 b.k., donuya na veiliutaki i Josaia, Jioiakimi, kei Setekaia.³ Au a tauyavu vata mai na parofita o Liai ena iVola i Momani. Keirau a vakacala ruarua na itovo vakasisila ni tamata e Jerusalemi ka tukuna taumada na vakarusai ni koro levu oya.⁴

A vakaroti au na Turaga me’u volaitukutukutaka na noqu parofisai ena “dua na ivola vivigi.”⁵ Ni sa rogoca o tui Jioiakimi na veiparofisai, e a vakama na ivola vivigi. A vakaroti au na Turaga me’u vola tale na veiparofisai ka kuria kina e vuqa tale.⁶

Au a sotava wasoma na veisaqasaqa ni’u vunautaka na vosa ni Turaga. O Pasuri, na luve ni turaga sa liu, a cudruvi au ka vesuki au ena ivesu kau. Era a via vakamatei au na dauvakacaca ena noqu vunau tiko. Au a dua na parofita sega ni vakilai, ka dau biu ki na qara kei na valeniveivesu. Au a bula ena gauna ni itovo vakasisila levu dina.⁷

Ia dina ga ni’u a bula voli ena maliwa ni veivakatovolei, a vakatarai au na Turaga me’u raitayaloyalotaka ni ra na vakasoqoni vata na Isireli ena iotioti ni siga, ka ni na vola na Turaga na Nona ivakaro “ena lomadra,” ka na kauta mai o Koya e “dua mai na dua na koro, ka rua mai na dua na mataqali” ki Saioni.⁸

Ni’u a tomana voli na vunautaki ni vosa ni Turaga—ena gauna saraga a dredre tu kina—au a vulica ni dua na veicuqeni lomasoli ki na kosipeli ena muataki ki na vakacegu. Ni da taracake na noda veitokani yadua vata kei na Turaga, sa rawa ni da sotava taucoka na inuinui ena loma ni veivakatovolei kei na dredre eso.