Taʻu 100 ʻo e Efiafi Fakafāmili ʻi ʻApí

ʻĪmisi

A portrait of eight of the sons of Joseph F. Smith. All are identified

Taá ʻi he angalelei ʻa e Laipeli Hisitōlia ʻo e Siasí

Siʻi Kāinga ʻOfeina:

ʻOku mau naʻinaʻi ki he Kāingalotu ʻo e Ngaahi ʻAho Kimui Ní ke nau siofi lelei ange ʻa e fekau ʻa e ʻEikí ne fakahoko ʻi he vahe 68 ʻo e Tokāteline mo e Ngaahi Fuakavá:

“Pea ko e tahá, kapau ʻoku maʻu ha fānau ʻe ha ongo mātuʻa ʻi Saione … ʻoku ʻikai te nau akoʻi ʻa kinautolu ke nau ʻiloʻi ʻa e tokāteline ʻo e fakatomalá, tui kia Kalaisi ko e ʻAlo ʻo e ʻOtua moʻuí, pea mo e papitaiso mo e foaki ʻo e Laumālie Māʻoniʻoní, ʻi he hilifaki ʻo e nimá, ʻi he taimi ʻoku taʻu valu aí, ʻe ʻi he ʻulu ʻo e mātuʻá ʻa e angahalá; …

“Pea ke nau akoʻi foki ʻenau fānaú ke lotu, pea ke ʻaʻeva ʻi he angatonu ʻi he ʻao ʻo e ʻEikí” [vakai, T&F 68:25–28).

ʻOku totonu foki ke tauhi kakato ange ʻe he fānau ʻo Saioné ʻa e fekau ʻa e ʻEikí ne fai ki ʻIsileli ʻo e kuonga muʻá mo toe fakaongo mai ki he Kau Māʻoniʻoni ʻi he Ngaahi ʻAho Kimui Ní:

“Fakaʻapaʻapa ki hoʻo tamaí mo hoʻo faʻeé, koeʻuhí ke fuoloa ho ngaahi ʻahó ʻi he fonua ʻoku foaki kiate koe ʻe he ʻEiki ko ho ʻOtuá” [ʻEkesōtosi 20:12].

ʻOku kaunga mālohi ʻa e ngaahi fakahaá ni ki he Kau Māʻoniʻoni ʻi he Ngaahi ʻAho Kimui Ní, pea ʻoku fie maʻu e ngaahi tamai mo e faʻē ʻi he Siasí ke akoʻi ʻa e ngaahi fekaú ni mo fakaʻaongaʻi ʻi honau ʻapí.

ʻI he tuʻunga ko iá ʻoku mau faleʻi mo tapou atu ke kamata ʻa e “efiafi ʻi ʻapí” ʻi he Siasí kotoa, ʻa ia ko ha taimi ia ʻe lava ai ʻe he tamaí mo e faʻeé ʻo fakatahatahaʻi ʻena fānau tangatá mo e fānau fefiné kiate kinaua ʻi ʻapi pea akoʻi ange ʻa e folofola ʻa e ʻEikí. Te nau lava ai ʻo ako kakato ange ʻa e ngaahi fie maʻu mo e ngaahi fakaʻānaua honau fāmilí, pea ʻi he taimi tatau pē ʻoku nau ʻai ke maheni kakato ai ʻenau fānaú mo e ngaahi tefitoʻi moʻoni ʻo e ongoongolelei ʻo Sīsū Kalaisí. ʻOku totonu ke fakatefito ʻa e efiafi ʻi ʻapi ko ʻení ki he lotú, hivaʻi ʻo e ngaahi himí, tā ʻo e ngaahi meʻaleá, lau folofola, aleaʻi ʻo e ngaahi tefito fakafāmilí mo ha ngaahi fakahinohino makehe fekauʻaki mo e ngaahi tefitoʻi moʻoni ʻo e Ongoongoleleí, pea pehē ki he ngaahi palopalema ʻo e moʻuí, pea mo e ngaahi fatongia mo e ngaahi tufakanga ʻo e fānaú ki he mātuʻá, ʻapí, Siasí, sosaietí pea mo e puleʻangá. ʻE lava ke fakataukeiʻi ʻa e fānau iiki angé ki he lau maʻulotó, ngaahi hivá, talanoá, mo e ngaahi vaʻingá. ʻE lava ke ʻai ha kiʻi fakaneifua maʻamaʻa ʻoku teuteuʻi hano konga lahi pē ʻi ʻapi

ʻOku totonu ke mou fakaʻehiʻehi ʻaupito mei hano ʻai ke fuʻu mamalu mo ʻikai ke faingofua ʻa e feohí, pea ʻoku totonu ke kau kotoa e fāmilí ki he ngaahi meʻa ʻoku faí.

ʻE ʻomai ʻe he ngaahi fakataha pehení ha ngaahi faingamālie ke fefalalaʻaki ai ʻa e mātuʻá mo e fānaú, ngaahi tuongaʻané mo e tuofāfiné, pea pehē ki hono ʻoange ha faingamālie ki ha lea fakatokanga, faleʻi, mo e naʻinaʻi ʻa e mātuʻá ki he fānau tangatá mo fafiné. Te nau ʻomai ha faingamālie ke fakaʻapaʻapaʻi ai ʻe he tamaiki tangatá mo e tamaiki fefiné ʻa ʻenau tamaí mo e faʻeé pea mo fakahaaʻi ʻenau houngaʻia ʻi he ngaahi tāpuaki ʻo e ʻapí koeʻuhí ke fakahoko moʻoni ʻa e talaʻofa ʻa e ʻEikí kiate kinautolú pea mo fakalōloa ʻenau moʻuí mo ʻai ke fakafiefia. …

ʻOku mau … poupouʻi ʻa e toʻu kei talavoú ke nau nofo ʻi ʻapi he efiafi ko iá pea fakaʻaongaʻi honau iví ʻi he ʻai ke mahino, ʻaonga, mo manakoa.

Kapau ʻe talangofua ʻa e Kāingalotú ki he faleʻi ko ʻení, ʻoku mau palōmesi atu ʻe hoko ha ngaahi tāpuaki maʻongoʻonga. ʻE tupulekina ʻa e ʻofa ʻi ʻapí mo e talangofua ki he mātuʻá. ʻE tupulaki ʻa e tuí ʻi he loto ʻo e toʻu tupu ʻo ʻIsilelí, pea te nau maʻu ʻa e mālohi ke fakafepakiʻi ʻa e ngaahi ivi takiekina kovi mo e ngaahi ʻahiʻahi ʻoku nau ʻākilotoa kinautolú.

Ko homou ngaahi tokouá,

Siosefa F. Sāmita

ʻAnitoni H. Lani

Sālesi W. Penilose

Kau Palesitenisī ʻUluakí