Founga ke Potó

ʻI he fakamatala peau kula ʻo e ʻaho ní, ʻoku tau fuʻu fie maʻu moʻoni ʻa e potó—ʻa e poto ke filifili mo ʻiloʻi ʻa e founga ke fakaʻaongaʻi ai ʻa e meʻa ʻoku tau akó.

Tau manatuʻi:

1. Kuo pau ke tau kumi ki he potó.

2. Ko e potó ʻoku fōtunga kehekehe pea ʻoku haʻu ʻi ha ngaahi lalahi mo ha ngaahi lanu kehekehe.

3. Ko e poto ʻoku maʻu vavé ʻokú ne ʻomi ha ngaahi tāpuaki lahi fau.

4. Ko e poto ʻoku maʻu ʻi ha tafaʻaki ʻe tahá ʻoku ʻikai malava ke fakaʻaongaʻi ʻi ha tafaʻaki kehe.

5. Ko e poto ʻo e māmaní, neongo ʻoku fuʻu mahuʻinga ʻi ha ngaahi meʻa lahi, ka ʻoku toki mahuʻinga taha ʻi he taimi ʻoku tukulolo ai ki he poto ʻo e ʻOtuá.

ʻOku fakamatalaʻi ʻe he folofolá ha faʻahinga poto ʻe ua: ko e poto ʻo e māmaní mo e poto ʻo e ʻOtuá. ʻOku fakatou ʻi ai ha ngaahi konga lelei mo kovi ʻo e poto ʻo e māmaní. ʻI he tafaʻaki kovi tahá, ʻe lava ke fakamatalaʻi ko ha moʻoni fakakonga, tuifio mo e ʻatamai potó pea mo e olopotó, ke aʻusia ha ngaahi taumuʻa siokita pe kovi.

ʻOku ʻi ai mo ha faʻahinga poto ʻe taha ʻo e māmaní ʻoku ʻikai ke fuʻu fakatuʻutāmaki pehē. Ko hono moʻoní ʻoku mātuʻaki lelei. ʻOku maʻu ʻa e poto ko ʻení ʻi he akó, fakakaukaú, fakatokangaʻí, pea mo e ngāue mālohí. ʻOku mātuʻaki mahuʻinga mo ʻaonga lahi ʻi he ngaahi meʻa ʻoku tau faí. ʻOku maʻu ia ʻe he kakai lelei mo tāú ʻi heʻetau foua ʻa e moʻui fakamatelié.

Kae mahuʻinga angé, kuo pau ke loto fiemālie ʻa e poto ko ia ʻokú ne ʻomi ʻa e lavameʻa ʻi māmaní, ke holomui ki mui ʻi he poto ʻo e ʻOtuá pea ʻoua ʻe fakakaukau te ne lava ʻo fetongi.

ʻOku ʻikai fakatupu tatau ʻa e poto kotoa pē. ʻOku fie maʻu ke tau ʻiloʻi ko e taimi ʻoku fepaki ai ʻa e poto ʻo e māmaní mo e poto ʻo e ʻOtuá, kuo pau ke tau tukulolo hotau lotó ki he poto ʻo e ʻOtuá.

ʻOku ou fokotuʻu atu ke ke toʻo ha niʻihi ʻo e ngaahi palopalema ʻokú ke fehangahangai mo iá. Tohiʻi ha laine mei ʻolunga ki lalo ʻi lotomālie ʻi ha laʻi pepa. Hiki ʻa e poto ʻo e māmaní ʻi he tafaʻaki toʻohemá pea mo e poto ʻo e ʻOtuá ʻi he tafaʻaki toʻomataʻú. Hiki ʻa e ngaahi palopalema ʻoku nau fepakipakí.

Ko e hā ʻa e ngaahi fili ʻokú ke faí?

ʻOku toe fai ʻe he ʻEikí ʻa e talanoa ʻo e kau tāupoʻou ʻe toko hongofulú ʻi he vahe 45 ʻo e Tokāteline mo e Ngaahi Fuakavá, ʻa ia ʻoku fakamatala ki he ngaahi meʻa ʻoku hoko ʻo aʻu ki he Hāʻele ʻAngaua Mai ʻa e Fakamoʻuí, pea tuku mai ʻa e ngaahi folofola ko ʻení kiate kitautolu: “He ko kinautolu ʻoku poto pea nau tali ʻa e moʻoní, pea kuo nau maʻu ʻa e Laumālie Māʻoniʻoní ke hoko ko honau fakahinohinó, pea kuo ʻikai kākaaʻi ʻa kinautolú—ko e moʻoni ʻoku ou pehē kiate kimoutolu, ʻe ʻikai ke tā hifo ʻa kinautolu pea laku ki he afí, ka te nau kātakiʻi ʻa e ʻahó” (vakai, T&F 45:57).

Tau fekumi muʻa ki he poto ʻo e ʻOtuá. ʻOku lahi ʻa e ngaahi meʻa te tau lava ʻo ako he taimí ni fekauʻaki mo e potó. ʻOku ou palōmesi atu te mou maʻu e ngaahi tāpuaki ʻa e ʻEikí ʻi hoʻomou kumi ki he potó—ʻa e poto ʻo e ʻOtuá. ʻOku mātuʻaki fiefia ke Ne foaki Hono potó kiate kitautolu. Pea kapau te tau talangofua mo faʻa lotu pea mo fekumi ki ai, ʻe hoko mai ia.