Loto’ā pē Taha mo e Tauhi Sipi pē Taha

ʻOku akoʻi kitautolu ʻe ha tauhiʻanga ʻo ha tākanga sipi fekauʻaki mo e tokanga ʻa e Fakamoʻuí ki Hono kakaí.

Tākanga Sipi ʻo e Kuonga Muʻá

Tokotokó

Tauhi-sipí

Ngaahi ʻā-maká

Hūʻangá

Fanga sipí

Makatā

Vaʻakaú

Ko e meʻá ʻeni: Ko ha kiʻi loto ʻā sipi faingofua, kuo ʻaaʻi.

Taumuʻá: Ke maluʻi ʻa e tākanga sipí mei he manu fekaí mo e kau kaihaʻá, tautautefito ʻi he poʻulí.

Nāunaú mo hono langá: Maka, pea meimei ko e ʻakau talatala ʻoku hili ʻi he ngaahi funga ʻaá. Naʻe faʻa fakaʻaongaʻi ha ngaahi ʻakau talatala matolu ke faʻu ha ʻā ki ha maluʻanga fakataimi ʻo ha tākanga sipi. Naʻe faʻa tauhi he taimi ʻe niʻihi ʻa e tākanga sipí ʻi he ngaahi ʻaná, pea naʻe faʻa felei ʻaki ia e maka iiki pe ʻakau ʻi muʻa ʻiate kinautolu.

Ngaahi Moʻoni mei he Tohi Tapú

ʻOku mātuʻaki mahuʻinga ʻa e fanga sipí koeʻuhí ko honau kakanó, huʻakaú, ngakó, fulufulú, kilí, mo e meʻatuí pea ko e monumanu tefito ia ki he feilaulaú.
ʻOku kau ʻa e fanga ulofí, hainá, lēpatí, mo e fanga penifaá (panters) ʻi he fanga manufekai te nau siofi ʻa e fanga sipí. Naʻe nofoʻi foki ʻi he kuonga muʻá ʻa e feituʻú ʻe he fanga laioné mo e fanga peá (vakai, 1 Samuela 17:33–37).
Naʻe fakaʻaongaʻi ʻe he kau tauhi- sipí ʻa e vaʻakaú ke taki ʻaki ʻa e fanga sipí mo ha tokotoko mo e makatā ke maluʻi ʻaki kinautolu.
ʻOku taki ʻe ha tauhisipi ʻene fanga sipí ki he mohukú mo e vaí ʻi he lolotonga ʻo e ʻahó (vakai, Same 23:1–2) pea fakafoki mai ki he lotoʻaá i he poʻulí. ʻOku lau ʻe he tauhí ʻa e fanga sipí ʻi heʻenau foki maí, pea kumi ʻa e fanga sipi heé kapau ʻoku pulia ha niʻihi. Hili ia pea toki tokoto leva ʻi he hūʻanga ki he lotoʻaá ke maluʻi kinautolu.
Naʻe ui ʻe Sīsū Kalaisi Ia ko e Tauhi Sipi Lelei (vakai, Sione 10:11–15) koeʻuhí he naʻá Ne foaki ʻEne moʻuí koeʻuhí ko kitautolu. Naʻá Ne toe fakatātā foki Ia ki he matapā ʻo e lotoʻā-sipí (vakai, Sione 10:1–9) koeʻuhí he ʻoku fou ʻiate Ia ʻa ʻetau maʻu ʻa e meʻakai fakalaumālié, mālōloó, nongá, fakamoʻuí, mo e hakeakiʻí.
Naʻe fakatatau ʻe he ʻAposetolo ko Paulá ʻa e Siasí ki ha tākanga sipi (vakai, Ngāue 20:28).

Ko e Meʻa Te Tau Lava ʻo Akó

Ko e ngaahi lotoʻā sipí:

Ko e feituʻu ia ʻoku tānaki ai ʻa e tākangá. ʻI heʻetau hoko ko e kāingalotu ʻo e Siasí, ʻoku tau ʻinasi ʻi he uouangataha ʻi heʻetau tuí mo ʻetau ngaahi fuakavá, pea pehē ʻi hono tānaki fakatahá. Naʻe fakamoʻoni ʻa Palesiteni Henelī B. ʻAealingi, ko e Tokoni ʻUluaki ʻi he Kau Palesitenisī ʻUluakí, “Oku ʻikai ke fakafoʻituitui ʻa e fiefia ʻi he uouangataha ʻoku finangalo ʻa e [Tamai Hēvaní] ke tuku kiate kitautolú. [Kuo pau ke tau kumi ki ai pea mo taau mo ia fakataha mo e niʻihi kehé.] ʻOku ʻikai leva ha ofo ʻi he naʻinaʻi ʻa e ʻOtuá ke tau taha ka Ne lava ʻo tāpuakiʻi kitautolú. ʻOkú Ne finangalo ke tau taha ʻi ha ngaahi fāmili. Kuó Ne fokotuʻu ha ngaahi kalasi, uooti mo e ngaahi kolo pea fekau ke tau faʻa fakataha. Te tau lava ʻi he ngaahi fakatahaʻanga ko iá, … ke [lotua] mo ngāueʻi ʻa e uouangataha ko ia te tau maʻu ai ʻa e fiefiá mo lahi ange ai hotau mālohi ke ngāué” (“Ke Taha Hotau Lotó,” Liahona Nōvema 2008, 69).

Ko ha feituʻu ʻo e malu mo e fiemālie. ʻOku tau “maʻu ʻa e fiemālie ki [hotau] laumālié” ʻia Sīsū Kalaisi (Mātiu 11:29). ʻOku hoko Hono Siasí ko ha “maluʻanga, pea … ko ha ungaʻanga” (T&F 115:6). Pea hangē ko hono akoʻi ʻe Palesiteni Poiti K. Peeka ʻo e Kōlomu ʻo e Kau ʻAposetolo ʻe Toko Hongofulu Mā Uá, “ʻOku tau ongoʻi hao mo malu mo ʻetau fānaú ʻi hono tauhi ʻo e ngaahi fuakava kuo tau faí mo moʻui talangofua ki he meʻa ʻoku fie maʻu ke fai ʻe he kau muimui ʻo Kalaisí” (“ʻOku Ou ʻIloʻi ʻa e Ngaahi Meʻá Ni,” Liahona, Mē 2013, 7).

Leʻohi ʻe he tauhi-sipí. Ko Sīsū Kalaisi ʻa e Tauhi-sipi Lelei ʻokú Ne fakamoʻui kitautolú. Naʻe mamahi mo pekia koeʻuhí ke tau lava ʻo ikunaʻi ʻa e angahalá mo e maté pea foki ki heʻetau Tamai Hēvaní. ʻI heʻetau haʻu kia Kalaisi mo talangofua ki Heʻene ngaahi fekaú, ʻokú Ne tāpuakiʻi, tataki, mo fakatou maluʻi fakafoʻituitui kitautolu pea mo Hono kakai ʻi he fuakavá.