Ko e Sala ʻa ha Taha Kehe

Naʻá ku faʻa faingataʻaʻia ke ngāue ʻaki ʻeku tuí ko ha tali ki ha fehuʻi faingofua hangē “Ko e hā ʻoku ʻikai ke ke inu kofi aí?” Naʻá ku faʻa ʻohake ʻi he kuohilí ha ngaahi ʻuhinga hangē ko e “ʻOku fuʻu tamala” pe “ʻOku ʻikai ke u saiʻia au ʻi hono ifó.”

Ko e hā naʻá ku mā aí? Ko e hā naʻá ku fuʻu ilifia ai ke taukaveʻi e meʻa ʻoku ou tui ki aí? ʻI heʻeku vakai atu he taimi ní, ʻoku ʻikai fuʻu mahino kiate au pe ko e hā koā naʻá ku ilifia aí? Ka ʻoku ou manatuʻi lelei ʻa e taimi naʻe tuku ai ʻeku toitoi ʻi he ngaahi ʻuhinga ko iá.

Naʻe fakahā ʻe he faiakó ʻi ha ʻaho ʻe taha ʻi heʻeku kalasi lea Faka-Pilitānia ʻi he ako māʻolungá te mau mamata ʻi ha konga heleʻuhila he TV, naʻá ku ʻiloʻi naʻe ʻikai totonu ke u sio ai. Lolotonga e mavava ʻa e fānau kehé ʻi heʻenau fiefiá, ne hiki ʻe hoku kaungā ako ko Salá hono nimá ʻo kole pe ʻe sai pē ke mavahe ia.

Ko e taimi ne ʻeke ai ʻe he faiakó hono ʻuhingá, ne tali hangatonu ange ʻe Sala, “Koeʻuhí he ko e Māmonga au pea ʻoku ʻikai ke mau sio he ngaahi heleʻuhila ʻoku lea taʻe-feʻungá.”

Naʻe fakaofo ʻene loto-toʻa ke tuʻu ʻi muʻa ʻi he kalasí. ʻOku ou fakamālō kia Sala, he naʻá ku tuʻu mo au ʻo tatali ʻi tuʻa mo ha konisēnisi tauʻatāina ke ʻosi ʻa e foʻi heleʻuhilá.

Talu mei ai mo e liliu ʻeku moʻuí. Naʻá ku kamata ke fakamatalaʻi ʻeku tuí kae ʻikai toe heliaki mei he tefitó. Pea ko hono olá, naʻá ku maʻu ha loto- fakapapau peá u kau lahi ange ʻi he ngaahi ʻekitivitī ʻa e Siasí pea mo e akó.

Naʻe ʻikai ke u teitei fakahā kia Sala ʻa e mahuʻinga lahi kiate au ʻene tā sīpingá, ka naʻá ku feinga ke u muimui ki he sīpinga ʻo ʻene maʻu ha loto-fakapapaú. ʻOku ou ʻilo he taimí ni ʻoku ʻikai ko ha teitei meʻa ke te mā ai ʻa ʻete hoko ko ha mēmipa ʻo e Siasi lelei mo toputapu ʻo e ʻOtuá. ʻOku ou fakatauange te u lava ʻi heʻeku sīpingá ke u hoko ko ha Sala ki ha taha.