Ko e Loto ʻApasiá Ko e ʻOfa
Naʻe kole mai heʻeku faiakó ke u lau ki he fānau akó, kau faiakó mo e ngaahi mātuʻá ha maau naʻá ku faʻu lolotonga e fakataha homau ʻapiakó. Naʻá ku fuʻu fiefia lahi, peá u talaange, “ʻIo!” Ka naʻá ku fuʻu ongoʻi manavasiʻi foki.
Naʻe tā vave hoku mafú ʻi heʻeku tangutu mei he funga siteisí ʻo teuteu ke lau ʻeku māú. Naʻá ku ongoʻi manavasiʻi ʻi hono vahevahe ha meʻa naʻá ku tohi ʻi he haʻohaʻonga ʻo ha kakai tokolahi.
Pea ne u maʻu ha fakakaukau. Naʻá ku fakakaukau ki he founga ne mau lau fakataha ai mo hoku fāmilí ʻa e Tohi ʻa Molomoná ʻi he pongipongí kimuʻa pea fai e akó. Naʻe ʻai au ʻe he fakakaukau ki hono lau e folofolá mo hoku fāmilí ke u fakakaukau ai ki he Tamai Hēvaní. Naʻá ku fakakaukau ki Heʻene ʻofa ʻiate aú. Naʻá ku ongoʻi fiemālie pea ʻikai ke u toe ongoʻi tuenoa. Naʻe ʻikai ke toe tā vave hoku mafú, pea naʻá ku ongoʻi loto ʻapasia.
ʻI he Tohi Hiva ʻa e Fānaú ʻi he peesi 12, ʻoku hā ʻi he fakaleá,
ʻApasia ʻikai ko e nofo maʻu
ka ko e manatua e Tamaí
Ongoʻi tuʻunga he ngaahi tāpuakí
ʻApasia he ko e ʻofá ia.
Hā ʻi heʻeku ngāue mo e leá
Mahino hala ke fouá
ʻApasia pea mahino ʻoku
Ofi e Tamai mo Sīsū.
ʻOku ou houngaʻia ko ʻeku ongoʻi e ʻofa ʻa e Tamai Hēvaní ʻi he taimi naʻá ku ongoʻi manavasiʻi ai ʻi he fakataha e akó. Pea ʻoku hounga kiate au ʻeku ʻilo ʻokú Ne ʻofa lahi ʻiate aú.
ʻOku ou ʻilo te u lava ʻo fili ke u loto ʻapasia mo fakakaukau ki he ʻOtuá ʻi he taimi ʻoku ou ʻi he ngaahi tūkunga faingataʻá aí.