Ko ʻEmau Fuʻu ʻAkau Kilisimasí: Mahulu Ange ʻi Ha Teuteu Pē

ʻI he taimi Kilisimasí ʻi Tonga he taimi ne u kei tupu hake aí, ne mau fakatuʻamelie maʻu pē ki hono fokotuʻu ʻo e fuʻu ʻakau Kilisimasí; ʻa ia ʻoku faʻa angamaheni ʻaki ko ha fuʻu Ahi pe ko ha fuʻu ʻŌlive. Ne mau teuteuʻi ia ʻaki ha pepa kuo kosi fakaseini, pula mo ha lole. Ne mau tau ai ha sisi ʻuhila lanu kehekehe pea ʻe tā maʻu pē ha ngaahi fasi he ʻaho kotoa pē. Ko ha faʻahitaʻu ia ʻo e hivá ʻi homau fāmilí.

Te mau tangutu takatakai heʻemau fuʻu ʻakau Kilisimasí he pō kotoa pē ʻo hivaʻi ha foʻi hiva. Te mau talanoa fekauʻaki mo ʻemau ngaahi manatu melié, lau folofola mo fai ʻemau lotú. Ko ha manatu melie lelei ʻeni kiate au.

ʻI he ngaahi efiafi kimuʻa pea aʻu ki he ʻaho Kilisimasí, te mau ʻaʻahi ki he fāmili kotoa pē ne nofo ofi mai kiate kimautolú. Ne mau hivaʻi ha ngaahi hiva Kilisimasi, tā ʻemau ngaahi meʻa leá, tauʻolunga mo fakafetongi meʻaʻofa. Te nau foaki mai ha tapaʻi ngatu mo ha meʻakai ke fakahaaʻi ʻaki ʻenau houngaʻia he vahevahe homau ngaahi talēnití mo kinautolú.

Naʻe ʻuhingamālie ange ʻa e foaki meʻaʻofá ai pea ʻi heʻemau ʻamanaki atu ke maʻu ha meʻaʻofa mei heʻemau mātuʻá, ne ʻikai ha lole sokoleti ia pe meʻa pehē ai. Naʻe hoko maʻu pē ia ko ha kiʻi meʻa siʻisiʻi kae mahuʻingamālie. Ko ha uasi, tohinoa, ngaahi tohi pe ko ha tā tongitongi. Ko ʻeku meʻaʻofa ki heʻeku ongomātuʻá naʻe ʻikai ko ha meʻa ia ne fakatau. Te u haiane homau valá kotoa kimuʻa he Sāpaté koeʻuhí ke ʻoua te nau toe fai ʻenautolu ia.

Ko ʻemau meʻaʻofa ki homau ngaahi fāmilí, naʻe teuteu maʻu pē ʻe heʻeku tangataʻeikí ha kato meʻakai naʻe ui ko e Tokonaki. Naʻe ʻi ai ha ngaahi foʻi ʻUfi ai, ko ha kiʻi puaka, ika mo ha ngaahi meʻa kehe. ʻI heʻemau hoko ko e fānaú, ne pau ke mau lau pe ko e toko fiha fakakātoa e fānau ne haʻu mei ai ʻeku tangataʻeikí kae pehē ki heʻene ongomātuʻá mo e fāmili foki ʻeku fineʻeikí. Naʻe maʻu ai ha kakai tokolahi. ʻI he ʻaho Kilisimasí, naʻe pau ke mau lau e tokolahi homau ngaahi kaungāʻapí koeʻuhí ke mau lava ʻo vahevahe ʻemau meʻatokoni hoʻatā he Kilisimasí mo kinautolu.

Ko e founga ʻeni ne mau fakafetongi meʻaʻofa ai ʻi heʻeku kei siʻí.

Ka kiate au, ʻoku ou saiʻia he ngaahi māmá mo e ngaahi teuteú. ʻOku ou saiʻia hono teuteuʻi ʻeku fuʻu ʻakau Kilisimasí he ʻokú ne fakamanatu mai e ngaahi aʻusia makehe mei heʻeku kei siʻí.

ʻI he taimi ní—ʻoku saiʻia hoku ʻofefiné hono fokotuʻu e fuʻu ʻakau Kilisimasí; ko ha taha ia ʻo e ngaahi meʻa ʻoku mau manako taha hono fakahoko fakafāmilí. Ko ha aʻusia mātuʻaki fakalaumālie ʻeni kiate kimautolu.

Ne mau fili ha fuʻu ʻakau lanu hinehina ke ne fakafofongaʻi e haohaoa ʻa Kalaisí. ʻOku fakamanatu mai ʻe he ngaahi māmá ʻa ʻEne māmá. ʻOku fakafofongaʻi ʻe he Fetuʻu ʻi ʻolungá ʻa e foʻi fetuʻu naʻá ne taki ʻa Tēvitá. ʻOku mau fakatahataha takatakai he fuʻu ʻakaú ʻo sio ki ʻolunga ki he foʻi fetuʻú mo fai e ngaahi talanoa fekauʻaki mo e founga kuo tākiekina ai kimautolú—ʻo hangē pē ko ia naʻá ku fai heʻeku kei siʻí.

Ne mau tuku he lalo ʻakaú ha fakatātā ʻo e ʻaloʻí pea mo ha tā ʻo e temipalé ke fakamanatu mai kiate kimautolu e ʻuhinga ʻo e ʻaloʻi ʻo e Fakamoʻuí pea mo homau fāmili taʻengatá.

Kiate kimautolú, ʻoku fakafofongaʻi foki ʻe he fuʻu ʻakaú e ʻakau ʻo e moʻuí. ʻI heʻemau fokotuʻu e fuʻu ʻakaú, ʻoku mau talanoa ai fekauʻaki mo ʻemau taumuʻa ko e fāmili ke pikitai ki he vaʻa ukameá mo fiefia he fua ʻo e fuʻu ʻakau ʻo e moʻuí.

ʻOku tuʻu ʻemau fuʻu ʻakaú ʻi he vaeuaʻangamālie ʻo e loki fakafāmilí. ʻOku mau fakaʻaongaʻi e fuʻu ʻakaú ko e feituʻu fakatahatahaʻanga ki homau fāmilí.

ʻI he pō kotoa pē, ʻo aʻu ki he Kilisimasí, ʻoku mau tangutu takatakai he fuʻu ʻakaú mo laukonga mei he tohi ʻa Luke vahe 1 mo e 2; pea vahevahe ʻemau ongo fekauʻaki mo e talanoa hono ʻaloʻi ʻa Kalaisí. ʻOku makehe e taimi fakafāmili takatakai he fuʻu ʻakaú pea kuo mau maʻu ha ngaahi aʻusia fakalaumālie he vahevahe pē ʻo e ngaahi talanoá, hiva ʻo e ngaahi himi Kilisimasi faka-Tongá mo hono tohi ʻemau ngaahi tohinoá.

ʻOku ʻikai ko ha teuteu pē ʻemau fuʻu ʻakaú. Kuo mau ngaahi ia ke hoko ko ha fakamanatu ʻo e ʻuhinga moʻoni ʻo e Kilisimasí.