Ngaahi Founga ʻe Fitu ke Maʻu ai e Laumālie ʻo e Kilisimasí
ʻOku fakalata e ngaahi fakamolé mo e ngaahi fakafiefiá, ka ʻoku hoko e ngāue fakaetauhi fakafiefiá ko e kī ki hono maʻu ʻo e laumālie ʻo e Kilisimasí.
Tā fakatātaaʻi ʻe Michael Mullan
“ʻOku ʻikai hangē ia ko e Kilisimasí.”
Kuó ke ʻosi fakakaukau nai ki ha meʻa pehē? Mahalo pē ʻokú ke ongoʻi pehē he taimí ni: Neongo pe ko e hā e lahi hoʻo tā leʻo lahi e ngaahi fasi Kilisimasí pē ko e hā e lahi e kūkisi ʻokú ke kai he Kilisimasí, he ʻikai pē ke ke ongoʻi ʻe koe e laumālie ʻo e Kilisimasí.
Kapau ko koe ʻeni, pe ʻokú ke feinga ke aʻusia e ongo fakakilisimasi ko iá ʻo lahi ange he taʻú ni, hoko atu hoʻo laukongá.
Naʻe fakalea ia ʻe Palesiteni Tēvita O. Makei (1873–1970) ʻo faingofua ʻaupito: “Ko e Laumālie ʻo e Kilisimasí ʻa e laumālie ʻo Kalaisí, ʻa ia ʻokú ne ʻai hotau lotó ke maamangia ʻi he feʻofaʻaki mo e fekaungāmeʻaʻaki fakatokouá mo ueʻi kitautolu ke fai ha ngaahi ngāue tokoni angaʻofa.”1 Naʻe poupou ki ai ‘a Poni L. ‘Osikasoni, Palesiteni Lahi mālōlō ʻo e Kau Finemuí: “Ko e founga ke hiki hake ai e laumālie ʻo e Kilisimasí ko e alanima atu ʻi he angaʻofa kiate kinautolu ʻoku tau feohí mo fai ha tokoni.”2
ʻOku hoko hono teuteuʻi e ngaahi fuʻu ʻakaú mo foaki e ngaahi meʻaʻofá ko ha ngaahi founga ki hono fakafiefiaʻi e Kilisimasí, ka ko e kī ki hono ongoʻi moʻoni e laumālie ʻo e Kilisimasí ko e ngāue fakaetauhi ki he niʻihi kehé. (Vakaiʻi e talanoa kimuʻá, “Ko e Ngāue Fakaetauhi ʻo Hangē ko ia Ne Fai ʻe he Fakamoʻuí,” ke ako lahi ange fekauʻaki mo e ngāue fakaetauhí.)
Mo ha ongoongo lelei! ʻOku lahi ha ngaahi founga fakaʻofoʻofa ke te ngāue fakaetauhi ai ki he niʻihi kehé ʻi he taimi Kilisimasí. ʻAhiʻahi’i ha niʻihi ʻo e ngaahi meʻa ko ʻení, pea ʻe vave ʻaupito hoʻo ongoʻi e Laumālié mo ongoʻi ofi ange ki he Fakamoʻuí—ʻa e laumālie moʻoni ʻo e Kilisimasí.
1. ʻAʻahi ki he kakai tuenoá.
Fakakaukau ki he niʻihi ʻokú ke ʻilo ʻoku ʻikai hanau fāmili pē ngaahi kaungāmeʻa ke nau feohi he ngaahi ʻaho fakafiefiá. Fakakaukau ke ke ʻaʻahi ki ha taha toulekeleka pe ko ha taha ne toki hiki atu ki homou feituʻú. ʻE ala mālohi fau ke te ala atu ʻo toe tokoniʻi mo ha taha ʻoku tuenoa. Hangē ko ia ne fakamahino mai ʻe ʻEletā Tēvita A. Petinā ʻo e Kōlomu ʻo e Kau ʻAposetolo ʻe Toko Hongofulu Mā Uá, naʻe “ngāue fakaetauhi ʻa [Kalaisi] ki he ‘tokotaha taki taha’”, ʻaki ʻEne tokoniʻi e kakaí.3 Te tau lava ʻo fai ʻa e meʻa tatau.
2. ʻAlu ʻo fai ha ngaahi hiva.
ʻOkú ke ʻilo ʻoku saiʻia hotau palōfitá ʻi he ngaahi hiva Kilisimasí? Neongo pe ko ʻete hivaʻi e “fakaoli ha hiva faingofua fekauʻaki mo Sanitā” pe ko ʻetau hivaʻi ʻi he loto ʻapasia e ngaahi himi ʻokú ke manako ai fekauʻaki mo e Fakamoʻuí, ʻoku tui ʻa Palesiteni Lāsolo M. Nalesoni ko hono vahevahe ʻo e hivá mo e niʻihi kehé ko ha founga fakaʻofoʻofa ia ke “ongoʻi mo’oni ai e laumālie totonu ʻo e Kilisimasí.”4
3. Vakavakai holo peá ke toki sio ki hoʻo telefoní.
ʻOku ʻikai fie maʻu ia ke ke faʻo holo ho telefoní he kató ʻi he ʻahó kakato, ka ʻoku hoko hoʻo ʻi ai tonú mo nofo taha hoʻo tokangá kiate kinautolu ʻoku mou feohí ko ha founga lelei ke toe ongoʻi ange ai e laumālie ʻo e Kilisimasí.
Naʻe pehē ʻe Sisitā ʻOsikasoni, “ʻOua te ke tali ho telefoní ke vakai pe ko e hā e meʻa hoʻo ngaahi kaungāmeʻá ʻoku faí, ka ke kiʻi tuʻu, vakai holo, pea ʻeke kiate koe, pe ‘Kohai ʻokú ne fie maʻu au he ʻaho ní?’” “Mahalo pē ko koe ʻa e kī ke alanima atu pea liliu e moʻui ʻo ha’o maheni pe fai ha poupou ki ha kaungāmeʻa ʻoku faingataʻaʻia fakalongolongo pē.”5
4. Fai ha ngāue ʻoku toe lahi angé.
ʻE lava nai ʻe he fakamaau falé, toʻotamá, pē fai ha ngāue ʻoku toe lahi angé ʻo tokoniʻi moʻoni koe ke ke ongoʻi e laumālie ʻo e Kilisimasí? Kapau te ke fai ia ʻaki e laumālie totonu, te ke maʻu ia! ‘I he taimi ‘okú ke fufulu ai pe fakamāʻopoʻopo ha meʻa, fakakaukau ki he tokotaha ʻokú ke ngāue tokoni ki aí. Fakakaukau ki he tuʻunga ʻe fakahoungaʻi ai ho fāmilí pe ngaahi kaungāmeʻá ʻa e meʻaʻofa hoʻo ngāue mālohí!
5. Foaki ha ngaahi meʻakai faka-Kilisimasi maʻamaʻa pē!
ʻI heʻetau lau ki he fanga foʻi kūkisi Kilisimasi naʻá ke kai kimuʻá, ko e hā ʻoku ʻikai ke ke ngaohi ai e meʻakai ʻokú ke manako taha ai he taimi Kilisimasí? Mahalo ʻoku totonu ke ke ʻahiʻahiʻi ha niʻihi, ka ko e kī ki hoʻo ongoʻi ʻo e laumālie ko ʻeni ʻo e Kilisimasí ko hoʻo foaki atu ia.
6. Vahevahe ha vitiō faka-Kilisimasi.
Vahevahe ha pōpoaki Kilisimasi ʻi he mītia fakasōsialé. Vakaiʻi e Ngaahi Pōpoaki Kilisimasi ʻa e Māmongá ki ha toe ngaahi fakakaukau. Mahalo te ke tāpuekina ai ha ʻaho ʻa ha taha ʻi hoʻo vahevahe e vitiō Kilisimasi ʻa e Siasí ʻi he Mormon.org. Te ke lava ʻo ʻave ia ki haʻo kaungāmeʻa pē vahevahe (share) ia ʻi hoʻo pēsí.
7. Fakahoko fakapulipuli ia.
Ko e hā nai e lahi e ngāue tokoni te ke lava ʻo fai taʻe ʻilo ki ai ha taha? Te ke lava ʻo tuku ha sōpingi meʻakai pē meʻaʻofa ʻi he veʻe matapā ʻo ha taha, fakahū ha kiʻi fakamatala angaʻofa ki ha kato ʻo ha kote, tata sāvolo e sinoú, pe tafi e ʻū lauʻi ʻakaú—kae fakapapauʻi ʻoku ʻikai ʻilo ki ai ha taha! Manatuʻi: ke lilo ʻa hoʻo foakí (vakai, Mātiu 6:4).
Ngāue Fakaetauhi ʻi he Kilisimasí
ʻE lava ke ʻomi ʻe he takamokamo ʻo e ngaahi maama Kilisimasí mo e polokalama fakafiefiá ha nēkeneka ʻi he taimi Kilisimasí, ka ʻi he taimi ʻe fie maʻu ai e laumālie moʻoni ʻo e Kilisimasí, ko e kií ʻa e ngāue fakaetauhí.
Naʻe pehē ʻe ʻEletā Tieta F. ʻUkitofa ʻo e Kōlomu ʻo e Kau ʻAposetolo ʻe Toko Hongofulu Mā Uá, “Ke fakalangilangiʻi moʻoni e hāʻele mai [ʻa e ʻEikí] ki he māmaní, kuo pau ke tau fai ʻa ia naʻá Ne faí mo alanima atu ʻi he manavaʻofa mo e ʻofa ki hotau kaungā fonongá.” “Te tau lava ʻo fai fakaʻaho ia, ʻi he lea pea ʻi he ngāue. Tuku ke hoko ia ko ʻetau tukufakaholo Fakakilisimasí, neongo pe ko fē feituʻu ʻoku tau ʻi aí—ke tau toe angalelei ange, faʻa fakamolemole ange, siʻi ange ʻetau fai fakamāú, toe houngaʻia lahi ange, mo toe fie foaki ange ʻetau koloá mo kinautolu ʻoku fie maʻu tokoní.”6