ʻE lava Ke Ke Ongoʻi e Laumālie ʻo e Kilisimasí ʻi Tongá ni

Ko e konga lelei taha ʻo e Kilimasí ʻi Tonga ní ʻa e taimi pongipongí. ʻOku mau teuteu mo e fāmilí ha peleti fakaneifua maʻa homau ngaahi kaungāʻapí. ʻOku mau taʻo ha ngaahi foʻi keke, kumi ha pisikete mo ha lole mei he falekoloá pea tuku ia ʻi ha peleti. ʻI he pongipongi Kilisimasí, ʻoku mau tufa ia ki homau ngaahi kaungāʻapí ke nau fakapongipongi. ʻI he ʻosi ʻemau fai iá, ʻoku mau maʻu foki ʻa e meʻa tatau mei homau ngaahi kaungāʻapí.

Ko ha tukufakaholo angamaheni ʻeni ʻi Tonga. Kiate au, ko ha aʻusia fakalaumālie hono fakahoko ʻeni he taʻu kotoa peé, ʻa ia ʻoku teʻeki ngalo ʻiate au.

ʻOku fekauʻaki ʻa e Kilisimasí mo e ʻaloʻi hotau Fakamoʻuí. ʻOku hoko e Kilisimasí ko ha taimi lelei ke tau fakataha ai mo e fāmilí mo e ngaahi kaungāmeʻá. Kae mahuʻinga tahá, ko ha faingamālie lelei ia ke tokoni ai ki he niʻihi kehé.

ʻOku mahuʻinga ange heni hono foaki ʻo e taimí mo e ngaahi talēnití he Kilisimasí ʻi hono foaki ʻo e ngaahi meʻa fakamatelié. ʻOku ou fiefia lahi he ngāue tokoni ki he niʻihi kehé, tautautefito ʻi he Kilisimasí.

Hangē ko e ngāue tokoní, ʻoku ou manatuʻi hono fakafonu ʻe he laumālie ʻo e Kilisimasí hoku motu tupuʻanga ko Vavaʻú ʻi hono hivaʻi e ngaahi himi ne leʻolahi ʻo ongona ʻi he motú kotoa.

ʻI heʻemau lue takai holo homau kaungāʻapí, ʻo tufa ʻemau ʻū peletí ki he ngaahi ʻapí, ne mau lava maʻu pē ʻo fanongo ki he ngaahi siasi kehekehé ʻenau hiva e ngaahi himi ʻo e Kilisimasí. Te ke lava moʻoni ʻo ongoʻi e laumālie ʻo e Kilisimasí ʻi Tongá ni.

ʻOku ou mataʻikoloaʻaki e ngaahi manatu melie mo e ngaahi tukufakaholo ko ʻení mo fakamahuʻingaʻi e laumālie ʻokú ne ʻomi ʻi he Kilisimasí.

Ne u mali mo hoku husepāniti ko ʻAlofá, ʻi he temipale Tongá ʻi he konga kimuʻa ʻo e taʻu ní. Ko ʻema fuofua Kilisimasi fakataha ʻeni ko ha husepāniti mo ha uaifí. ʻOkú ma loto ke hoko homa ʻapí pea tupu hake ʻema fānaú ʻo ongoʻi e laumālie ʻo e ngāue tokoni he Kilisimasí, ʻo hangē ko ia ne ma aʻusiá.

ʻOku ʻi ai ha tukufakaholo faka-Kilisimasi te ma kamataʻi mo hoku husepānití ʻi heʻema fuofua Kilisimasi fakatahá, ʻa ia ʻe nofo taha ange he ngāue tokoni ki he niʻihi kehé kae ʻikai ko e fakatau ha ngaahi meʻa maʻa maua peé. Te ma tātānaki ha fanga kiʻi koloa meʻakai mo taʻo ha meʻa ʻo faʻo ʻi ha kiʻi kato takitaki. Te ma hiki e ngaahi hingoa kotoa ʻo e kau mēmipa homa fāmilí pea fili ha fāmili ʻe taha he efiafi kimuʻa he ʻaho Kilisimasí ke foaki ki ai e kató. ʻI he pongipongi Kilisimasí, te ma ʻalu ʻo ʻave e kató ki he fāmili ko ia naʻe filí.