“Ko Hoʻomou Fai Ia Kiate Au”

ʻĪmisi

shaking hands

Tā fakatātā ʻa Allen Garns

ʻOku maʻu ʻe homau fāmilí ha tukufakaholo faka-Kilisimasi ʻi hono foaki ha ngaahi kato meʻakai, kofu nima, tātā mo ha ngaahi fie maʻu kehe kiate kinautolu ʻoku faingataʻaʻiá. Ne momoko makehe e Efiafi Kilisimasi ʻo e 2016 ʻi he feituʻu ne mau nofo ai ʻi Kalefōnia, USA. Naʻa mau vala māfana, ka naʻa mau kei tetetete pē he mokosiá.

ʻI heʻemau lele atu ki ha paʻake ofi mai pē ki homau ʻapí ʻa ia ne nofo ai ha kakai tokolahi ne nau tukuhausia, naʻa mau vakai atu ki ha tangata ʻokú ne nofo ʻi ha kiʻi feituʻu ne ʻikai fuʻu sai ʻi he tauʻanga pasí, ʻo ne kafu ha sipi motuʻa. Naʻe taʻofi ʻe hoku husepāniti ko Tenisí ʻa e meʻalelé ʻo ne taki atu homa foha ko Sonatané ke foaki ange ʻa e kato meʻaʻofá ki he tangatá. Ne u sio atu pē mo homa ʻofefine ko ʻEpí, mei he meʻalelé.

Naʻe kiʻi māmalanga hake e ʻulu ʻo e tangatá ʻi hono mono ange ʻe Tenisi e kató. Ne fotu malimali e tangatá. Naʻá na lulululu pea kamata ke na pō talanoa. Ne ngali kehe ʻeni he ko e angamahení ʻoku ʻikai faʻa fai ha fepōtalanoaʻaki ia.

Hili ha ngaahi miniti siʻi, ne foki mai ʻe Tenisi ki he meʻalelé ʻo fakaava e putí

“ʻOku sai pē meʻa kotoa?” Naʻá ku fehuʻi ange.

Naʻá ne tali mai, “ʻIo” “Te u foaki ange ʻe au hoku falani fakamāfaná. ʻOkú ne fie maʻu lahi ange ʻe ia ʻiate au.”

Naʻe ʻikai ke u ʻilo e meʻa ke u lea ʻakí. Ko ha falani fakamāfana fakaʻofoʻofa ia pea naʻe ʻikai ke faʻa tui ia ʻe Tenisi! Naʻe foki atu ʻe Tenisi ki he tangatá ʻo tokoni ki ai hono tui e falani fakamāfaná. Naʻe fiefia ʻauptio ʻa e tangatá. Ne toe hoko atu e pō talanoa ʻa Tenisi mo e tangatá.

Naʻá ku ongoʻi mālohi ke u feʻiloaki mo e tangatá. Naʻá ku fakaava e matapā ʻo e meʻalelé, pea muimui mai mo ʻEpi. Naʻe malimali ʻa Tenisi ʻi heʻema aʻu atú, peá ne fakafeʻiloaki kimaua ki he tangatá. Naʻá ku ala atu ʻo ma lulululu peá u ʻeke ange hono hingoá.

Naʻá ne puke hoku nimá, ʻo ne malimali mo pehē mai, “Heisū.”

Ne hoko atu e pō talanoa homau fāmilí, ka naʻe ʻikai ke u toe fanongo ki ha toe meʻa. Naʻá ku faʻa fakakaukau ki he mahuʻinga ʻo e hingoa e tangata angalelei ko ʻení: Heisū (Jesús)—ʻa ia ko e hingoa ʻo e Fakamoʻuí. ʻI he mōmeniti ko iá, naʻá ku manatuʻi ai e akonaki ʻa e Fakamoʻuí: “Ko e meʻa ʻi hoʻomou fai ia ki ha taha ʻoku kihiʻi siʻi hifo ʻi hoku kāingá ni, ko hoʻomou fai ia kiate aú” (Mātiu 25:40). Naʻe hanga ʻe he aʻusia ko iá ʻo liliu ʻeku moʻuí.