“ʻOku ʻikai ke u taau ke ʻofeina au ʻe he Fakamoʻuí. Te u ikunaʻi fēfē e ongo ko ʻení pea fakatokangaʻi hoku mahuʻingá?”

Ko e ngaahi foha mo e ngaahi ʻofefine kotoa kitautolu ʻo ʻetau Tamai Hēvaní. ʻOku taʻe-fakangatangata ʻa ʻEne ʻofa ʻiate kitautolú. Kapau ʻoku tau ongoʻi ʻoku ʻikai ke tau feʻunga mo ʻEne ʻofá, ʻoku totonu leva ke tau lotu kiate Ia. Lotu ke ke ongoʻi ʻa ʻEne ʻofá. Lotu ke ke ongoʻi ʻokú ke feʻunga mo ʻEne ʻofa ʻiate koé pea ke ke lava ʻo vakai kiate koe ʻo hangē ko ʻEne ʻafioʻi koé. ʻI Heʻene taimí mo ʻEne foungá, te Ne tali maʻu pē ʻetau ngaahi lotú mo ha fakapapau ʻo ʻEne ʻofa haohaoá. Kuo hoko maʻu pē ʻeku lotua ʻEne ʻofá ke ne hiki hake au, ʻi he taimi ʻoku ou ongoʻi ai ʻoku ou liʻekina pe tuenoá.

Ne mau toki fai ha alēlea ʻi heʻemau kalasi teuteu ngāue fakafaifekaú fekauʻaki mo e founga ke ʻā ai homau matá ʻo ʻilo e ʻofa ʻa e ʻOtuá kiate kimautolú. Ne mau talanoaʻi ha ngaahi meʻa kehekehe te mau lava ʻo fai ke mau toe ongoʻi ange ai homau mahuʻingá; ne kau he ngaahi meʻa ko ʻení ʻa e ngāue tokoni ki ho kaungāʻapí, lotua ha tokoni ʻi he ngaahi meʻa ʻoku mahuʻinga kiate koé, lau e folofolá, pea hoko ko ha faifekau. ʻOku fakataumuʻa e ngaahi meʻa ko ʻení ke ne ʻomi kitautolu ke tau toe ofi ange kia Sīsū Kalaisi mo tokoniʻi kitautolu ke tau vakai ki he tuʻunga te tau lava ai ʻo hangē pē ko Iá.

ʻOku ou ongoʻi ʻi he taimi ʻe niʻihi ʻoku ʻikai ke u taau ke ʻofeina au ʻe he Fakamoʻuí he ʻoku ʻikai ke u talangofua kakato ki he ngaahi fekau ʻa e ʻEikí. Te u lava ke ikunaʻi e ngaahi ongo ko ʻení ʻaki ʻeku fakatomala, pea tokoni mai e pīsope ʻi ha ngaahi taimi ʻaki ʻene akoʻi au ʻoku ʻofa ʻa e ʻEikí ki Heʻene fānaú kotoa.

ʻOku tau faiangahala kotoa, pea koeʻuhí ko ia, mahalo te tau ongoʻi taʻefeʻunga mo e ʻofa ʻa e Fakamoʻuí. Ka naʻá Ne foaki ʻEne moʻuí maʻatautolu—Naʻá Ne feilaulau maʻatautolu. Naʻe fai ʻa e ngāue taʻesiokita ko iá koeʻuhí ko e ʻofá. Ko e meʻa pē ʻoku fie maʻu ke tau fai ke tau ongoʻi feʻunga ai mo ʻEne ʻofá, ko ʻetau ngāue ʻaki ʻa e mālohi ʻo ʻEne Fakaleleí ʻi haʻatau fakatomala mei heʻetau ngaahi angahalá. ʻOku hoko ʻa e fakatomalá ko e kī ki hono ʻiloʻi hotau mahuʻingá pea mo e ʻofa ʻa e Fakamoʻuí.

Ko e founga ʻe taha ke tau ʻilo ai hotau mahuʻingá ko ʻetau ʻiloʻi e mahuʻinga ʻo e niʻihi ʻoku tau feohí. ʻE tokoniʻi kitautolu he tuku taha ʻetau tokangá ki he niʻihi kehé ke tau ongoʻi fiefia ʻiate kitautolu koeʻuhí he ʻoku tau langaki hake ai e niʻihi kehé. ʻOku tau fakatou ikuna ai! ʻI heʻeku faingataʻaʻia ʻi he loto-falala pē kiate aú, ne u fili ai ke u ngāue tokoni ki ha taha ʻoku fie maʻu ʻeku tokoní. Naʻá ku fai ha lea lelei ki ha tokotaha naʻe faingataʻaʻia ʻi he ʻaho kotoa pē ʻi ha māhina kakato ʻe taha. Ne tokoniʻi au ʻe he tuku taha ʻeku tokangá ki he niʻihi kehé ke u ongoʻi taau mo fie maʻua ai. ʻI he taimi ʻoku tau feinga ai ke akoʻi e niʻihi kehé fekauʻaki mo honau tuʻungá, ʻe toe faingofua ange ʻetau vakai ki he lahi e ʻofa ʻa e ʻOtuá kiate kitautolú. ʻI heʻetau tokoni ke ongoʻi ʻe he niʻihi kehé ʻoku nau taau ke ʻofaʻi kinautolú, ʻe tokoni ia ke tau ongoʻi ʻoku tau taau foki ke ʻofaʻi kitautolu.