Ko e Fekau ke Ngāue, ʻo Lahi Ange he Taimi Kilisimasí

Ne u tupu hake ʻi ha fāmili tokolahi. Naʻa mau toko fitu. ʻOku ou manatuʻi ʻa e ongo fakafiefia ʻo e faʻahitaʻu Kilisimasí ʻi he aʻu pē ki he māhina ko Tīsemá, pea ʻe lava ke u fakamatalaʻi atu hono ʻuhingá.

ʻI heʻeku tupu hake ʻi Tongá, naʻe fakahoko he taimi Kilisimasí ʻa e kaí mo e hivá, pea ko ha taimi ia mo e fāmilí mo e ngaahi kaungāmeʻá.

ʻI he ngaahi ʻaho kimuʻa he Kilimasí, te mau lau e talanoa ʻo e ʻaloʻi ʻo Kalaisí, talanoa fekauʻaki mo Hono ngaahi ʻulungāngá mo fakakaukau ki he founga ʻe lava ke mau hangē ai ko Iá.

Ko e meʻa naʻe makehe taha kiate aú ko e ngāue tokoní. Naʻe ngāue fakasevāniti maʻu pē ʻa Kalaisi ki ha tokotaha ʻi ha feituʻu. Naʻe maʻu ʻe heʻeku ongomātuʻá ha ʻulungaanga tatau. Naʻá na tokoni maʻu pē. ʻI he taimi Kilisimasí, naʻe liunga teau hono fakahoko ʻení.

Ne ʻikai ke mau hoko kotoa ko ha mēmipa [ʻo e Siasí]. Naʻe ʻi ai ha ngaahi tui fakalotu kehekehe ʻi homau fāmilí ka ʻi he taimi Kilisimasí, naʻa mau fevahevaheʻaki ʻemau ʻofa ki he Fakamoʻuí ʻo hangē pē ne mau [maʻu ha tui] tataú.

ʻOku ou manatuʻi ha Kilisimasi ʻe taha ne ʻave ai ʻe heʻeku tangataʻeikí ha paʻanga ki ha tangata kolekole. Naʻe ʻikai ke lahi ʻemau meʻa naʻe maʻú, ka naʻe ʻikai toe momou ʻeku tangataʻeikí he taimi naʻe kolea ai ʻene tokoní. Naʻe fakaangaʻi ia ʻe ha tangata ne ʻi homau ʻapí he taimi ko iá, ka naʻe tui moʻoni ʻeku tangataʻeikí ʻokú ne ngāue maʻá e ʻOtuá ʻi heʻene tokoniʻi ʻa e kau faingataʻaʻiá pea naʻá ne fakahā ia ki he tangatá.

ʻOku ou manatuʻi ʻi ha Kilisimasi ʻe taha ʻi heʻeku kei taʻu 14 nai, hono ʻeke mai ʻe heʻeku tangataʻeikí pe ko e hā e meʻa naʻá ku fie maʻu ki he Kilisimasí. Naʻá ku fakakaukau ki ai he ʻahó kotoa, pea lolotonga ʻeku kei ʻi he loto pasi akó, ne u fakatokangaʻi ha tangata kuó ne foua ha ngaahi taimi faingataʻa pea hangē ne nofo pē ʻi he veʻehalá. Naʻá ku maʻu ha ongo mālohi ke tokoni kiate ia. Naʻá ku hifo mei he pasí peá u ʻoange kotoa ki ai ʻeku paʻangá mahalo ne mei aʻu ʻo paʻanga nai ʻe hongofulu. ʻI heʻeku aʻu ki ʻapí, ne u talaange ki heʻeku tangataʻeikí ʻoku ou loto ke foaki ha meʻa maʻá e tangata ko ʻení pe fakaafeʻi mai ia ki homau ʻapí, ko ʻeku meʻaʻofa Kilisimasí ia.

Ne u maʻu mei heʻeku ongomātuʻá ʻa e fiefia ʻi he ngāue tokoní. Naʻa mo e taimí ni, ʻoku ou kei ongoʻi pē e ngaahi aʻusia ko iá. ʻI he taimí ni, ʻoku ou feinga ke maʻu ʻe hoku fakafotú e fiefia ko iá he founga tatau ne u maʻu ai iá. Kuo hoko e tukufakaholo ʻo e foakí mo e ngāue tokoní ko ha konga ʻo e Kilisimasí kiate au pea ʻe pehē maʻu ai pē.

Kuó u faʻa feinga kimuí ni mai ke fetuʻutaki ki he ʻū fale ʻoku tufa ai e poulu supó ka kuo nau fonu kinautolu. ʻOku ou toʻo leva ha paʻanga ʻe nimangofulu ke fakatau ʻaki ha meʻakai pea te u lue takai leva mo hoku fakafotú he halá ʻo kumi ha taha ke foaki ki ai. ʻOku ou saiʻia ai.