Fakahaofi meí he Pelepelá
ʻEletā Adilson de Paula Parrella
ʻO e Kau Fitungofulú
“Fakahā e ʻofá, tokoniʻi ha taha” (Tohi Hiva ʻa e Fānaú, 42).
Naʻe nofo homau fāmilí ʻi São Paulo, Brazil. Naʻe ʻi ai ha ʻulutongo ʻi he tafaʻaki ʻe taha homau halá. ʻOku ʻi ai ha ngaahi vaitafe ʻoku tafe atu ʻi he ʻulutongó. ʻOku pelepela ʻaupito e kelekelé.
ʻOku langa ʻe ha kakai tokolahi honau ngaahi falé ʻi he pelepela ko iá. Ne nau tuku ha ngaahi fuʻu kupuʻi ʻakau ʻi he pelepelá. Pea langa leva honau falé ʻi ʻolunga ai. Ka ʻi he taimi naʻe ʻuha aí, naʻe hake e vaitafé. Naʻe hū e vai ki honau ngaahi falé. Pea ne ʻikai leva ha feituʻu ke mohe ai e kakaí ʻi he poʻulí.
ʻI he taimi naʻe hoko ai iá, naʻe fakaafeʻi leva kinautolu ʻe heʻeku tangataʻeikí ki homau ʻapí. ʻI he taimi ʻe niʻihi naʻe aʻu pē ʻo toko 15 e kakaí! Naʻá ne ʻomi ia ki homau loto falé pea ʻoange mo honau kafu. Naʻe ngaahi leva ʻe heʻeku fineʻeikí ha meʻa ke nau kai. Pea nau mohe leva ʻi homau ʻapí ʻo aʻu ki he ʻaho hokó.
Naʻe tuʻo tolu pē fā nai ʻene hoko iá. ʻOku ou manatu ki heʻeku fakakaukau ʻo pehē, “ʻOku ʻikai tokolahi ha niʻihi te nau tokoniʻi ha kakai sola ki honau ʻapí.” Naʻe hanga ʻe heʻemau tamaí ʻo ʻomi ha kakai naʻe ʻikai ke mau fuʻu maheni ke nau mohe ʻi homau falé! Ka naʻá ku fakakaukau ʻo pehē, “ʻOku ʻikai ha toe fietuʻu ke nau ō ki ai.”
Naʻe fai maʻu pē ʻe heʻeku mātuʻá ha meʻa ke tokoniʻi ai e kakaí. Ka naʻe mahulu hake ʻena ngāué ʻi he tokoní mo e foakí. Naʻá na fakahaaʻi ʻena ʻofá ki homau kaungāʻapí, ʻo tatau ai pē kapau naʻe ʻikai ke mau maheni lelei mo homau kaungāʻapí.
ʻOku totonu ke tau ala atu ki he kakai ʻoku fie maʻu tokoní. ʻOku totonu ke tau tokoni ʻi he lahi taha te tau lavá. ʻOku ʻikai totonu ke fakangatangata e meʻa ʻoku tau fai ke tokoniʻi e kakaí. Te tau lava ʻo foaki ha nofoʻanga mo ha ngaahi tokoni kehe. Te tau lava ke vahevahe mo hotau taimí. Te tau lava ke vahevahe ʻetau ʻilo fekauʻaki mo ʻetau Tamai Hēvaní pea mo Sīsū Kalaisi, kae tautautefito ʻi he faʻahitaʻu Kilisimasí.