Ngaahi Tukufakaholo Leleí mo e Ngaahi Fakakaukau Tuʻuloá

ʻI he ngaahi Motu ʻo Tongá, ʻoku fatu ʻe he ngaahi fakafiefia Kilisimasí ha fakamanatu mālohi ʻo hono ʻAloʻi tonu ʻo e Fakamoʻuí. Hangē ko e tuʻunga maʻulalo ʻo e potu naʻe ʻaloʻi ai e Fakamoʻuí, ʻoku ʻikai tokanga e kakaí ki he ngaahi meʻa fakamatelié. Hangē ko e kau ʻāngelo ne nau hiva fakafetaʻi ʻi Hono ʻaloʻí, ʻoku ongona e hiva ʻa e kāingalotú ʻi he ngaahi halá, ngaahi kuaeá mo e ngaahi fāmilí ʻi heʻenau hiva fakafetaʻi ki he ʻOtuá.

Hangē ko e fakatahataha ʻa Mele, Siosefa, mo ʻena tama naʻe toki ʻaloʻí ʻi he ʻaiʻangakai ʻo e manú, ko e taimi mo e fāmilí mo e ngaahi kaungāmeʻá ʻoku mahuʻinga tahá.

Pea hangē ko e ʻaʻapa ʻoku fakahaaʻi ʻe kinautolu ʻoku nau kau ki he polokalama toputapu ko ʻení, neongo pe ko e hā e tui fakalotú, ʻe maʻu e kakai ʻo Tongá ʻi honau ngaahi ʻapí pe ʻi he siasí ʻoku nau lau e talanoa hono ʻaloʻi ʻo Sīsū Kalaisí.

Kuo hanga ʻe he ngaahi tukufakaholo fakaʻofoʻofá ni ʻo fakatōkakano ha ngaahi ongo ʻe tuʻuloa ʻi ha tokolahi. Kuo hokohoko atu ʻe ha tokolahi ʻa e ngaahi tukufakaholo ko iá talu mei heʻenau tupu hake ʻi honau ngaahi fāmilí ʻi heʻenau feinga ke fakaʻapaʻapaʻi e Fakamoʻuí ʻi he taimi Kilisimasí.