Fokotuʻu ha Ngaahi Tukufakaholo Faka-Kilisimasi Foʻou ʻi he Tupulaki Homau Fāmilí

ʻI heʻeku tupu hake ʻi Kolofoʻou, Tongá, ne nofo ʻemau ngaahi tukufakaholo he Kilisimasí ʻi he laumālie ʻo e fuofua Kilisimasí—ʻa e fakatōkilaló, faingofuá, mo e loto ʻapasiá.

Ne ʻikai maʻu ʻe homau fāmilí ha fuʻu ʻakau pe foaki ha ngaahi meʻaʻofa; ka ne mau hiva mo homau ngaahi kaungāʻapí mo e kau mēmipa ʻo e uōtí ha ngaahi hiva kilisimasi pea fakafiefiaʻi e aloʻi hotau Fakamoʻuí ʻi he founga lelei taha ʻoku ʻiloʻi ʻe he kakai Tongá: ʻa e meʻatokoní.

Hili ʻeku mali mo hoku uaifí, ne ma palani ke fokotuʻu ha ngaahi tukufakaholo faka-Kilisimasi foʻou te ne ʻomi fakataha e ngaahi faikehekehe ʻi homa ngaahi anga fakafonuá.

ʻOku ou akoʻi hoku uaifí mo homa ʻofefine ko Hēvaní ke hiva e ngaahi hiva kilisimasí ʻi he lea faka-­Tongá. ʻOku mau lau mei he Tohi Tapú fekauʻaki mo e ʻaloʻi ʻo Sīsuú kimuʻa pea mau toki fai ha meʻa kehe he ʻaho Kilisimasí.

Kuo teʻeki ai ke u teuteuʻi ha kūkisi Kilisimasi kimuʻa peá u toki mali mo hoku uaifí, ka ʻoku mau fai ʻeni he taimí ni ko ha ʻekitivitī fakafāmili ke vahevahe mo e niʻihi kehé. ʻOkú ma akoʻi homa ʻofefiné fekauʻaki mo e pō mālū ko ia ʻi Pētelihemá ʻo fakaʻaongaʻi ha fakatātā ʻo e ʻAloʻí ne ngaohi ʻe hoku uaifí maʻa homau fāmilí. ʻOku mau laukau ʻaki ia ʻi homau ʻapí he taimi Kilisimasí.

ʻI he tupu homa ʻofefiné ʻokú ma ʻamanaki atu ai ke fokotuʻu ha tukufakaholo faka-Kilisimasi foʻou mo ia. ʻOkú ma poupouʻi e fāmili kotoa pē ke nau kumi e ngaahi founga makehe ke hoko ai ʻa Sīsū Kalaisi ko e meʻa ʻoku nau nofotaha ai ʻi he Kilisimasí mo fiefia he ngaahi tāpuaki ʻokú ne ʻomi ki homou ʻapí pea mo e ngaahi manatu melie ʻokú ne ʻomi ki homou fāmilí.”