Ko ha Kilimasi ke Mataʻikoloa ʻAki

ʻOku ou ʻalu he taʻu kotoa mo hoku husepānití ʻo kemi fakataha mo homa ongo fāmili fakalahí fakatouʻosi ke fakafiefiaʻi ʻa e faʻahi taʻu mālōlō he fakaʻosinga ʻo e taʻú. ʻOku mau fili ha feituʻu fakatatau ki homau tokolahí pea mau kemi ai ʻi he Efiafi Kimuʻa e Kilisimasí ʻo aʻu ki he ʻosi e ʻAho ʻUluaki ʻo e Taʻu Foʻoú.

ʻOku hoko ʻa e ngaahi kemi ko ʻení ko ha taimi lelei ke mau fakamālohia ai e ngaahi haʻo fakafāmilí. Koeʻuhí ko e tokolahi ʻo kimautolu ko e kāingalotu ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, ʻoku fakamālohia foki ʻe he ngaahi kemi ko ʻení ʻemau fakamoʻoni kia Kalaisi mo Hono Siasí ʻi heʻemau fakafiefiaʻi Hono ʻaloʻí.

ʻI he fakaʻosinga ʻo e 2020, ne mau ʻilo ai ha feituʻu ʻi he Kolo ʻo Pikenipeu, Talauaá, ʻa ia ʻoku ʻi ai ha mwaneaba (ko ha fale fakatahaʻanga tukufakaholo) lahi ʻe lava ʻo mohe fakataha kotoa ai homau fāmilí. Hangē ko ia ʻoku hoko maʻu peé, naʻe kau mai hoku tokoua ʻi he fono ko Metetá ʻi he kemi fakafiefia ko ʻení.

Naʻá ku nofo fakataha mo hoku husepānití mo Meteta, pea ʻi hono taʻu 71, ne hangē ange ia ha faʻē kiate kimauá. Naʻá ne kei moʻui lelei mo longomoʻui pē, tukukehe ʻene fakaʻaongaʻi ha ongo tokotoko ko ha ola ʻo ha tafa ne fai ki ai ʻi he taʻu ʻe 20 kuohilí. Naʻe saiʻia ʻaupito ʻa Meteta ʻi heʻemau ngaahi kemi faka-Kilisimasí pea vēkeveke ke kau ʻi heʻemau ngaahi vaʻinga mo e ʻekitivitī fakafāmilí.

Pea ʻi he lotolotonga ʻo e ngaahi teuteú, ne fanafana mai ʻa Meteta, “ʻOku ou ongoʻi ʻoku langa lahi hoku fatafatá.”Ne u tuku e meʻa kotoa, ʻo ui hoku husepānití mo ha tokoua ʻi he fono ʻe taha, pea vave ʻemau feinga ke tokoniʻi iá.

Naʻe vave ʻaupito ʻene hokó. Fakafuofua ki ha miniti ʻe hongofulu mā nima mei ai, naʻe kamata ke feinga mānava ʻa Meteta.Naʻe fakahoko ʻe hoku husepānití mo e fohá ha tāpuaki ʻo e Lakanga Fakataulaʻeikí kiate ia ʻi heʻemau tatali ki he meʻalele tokoni fakavavevave fakafalemahakí. Ne fakamamahí, ne ʻikai ke lava e kau toketaá ʻo tokoni lahi ange kiate ia. Hili ha kiʻi taimi nounou ʻemau aʻu ki he falemahakí, ne siʻi mole atu ʻa Meteta.

ʻI he efiafi ko iá, kiate kimautolu, ne tuʻu ʻa e māmaní. ʻI heʻemau foki māmālie ki he faiʻanga kemí—ke vahevahe ʻa e ongoongo fakamamahí mo tala ki he taha kotoa kuo pau ke tuku ʻemau kemí—ne u fakakaukau mo hoku husepānití ki he ngaahi momeniti fakaʻosi e moʻui ʻa Meteta. Naʻe fai e lelei taha ʻo e kau toketaá ke fakamoʻui ia, pea ne mau feinga ke mau maʻu ʻa e ʻamanaki leleí, ka ne mau ongoʻi ha nonga makehe naʻá ne fakahoko mai kuo taimi ke siʻi mavahe atu ʻa Meteta.

Naʻe tokoni mai foki ʻemau tui kia Sīsū Kalaisí mo ʻemau fakamoʻoni ki Heʻene ongoongoleleí ki he toenga homau fāmilí ke tali e meʻa ne hokó. Kuo mau toki fakamoleki pē ha uike ʻi he fakafiefia fakamāmani mo fakalaumālié, ka ʻi he liliu ko ia ʻemau kemí ki ha meʻafakaʻeikí, ne mau sītuʻa kakato mei he māmaní.

Ne mau tengihia e mole ʻa siʻi Meteta—kuó ne hoko ia ko ha maʻuʻanga mālohi ʻi homau ʻapí, pea kuo pau ke mau fai ha ngaahi liliu lahi ʻi heʻene mole atú—ka ʻi hono meʻafakaʻeikí, ne mau talanoa lahi ange ki he ʻuhinga ʻo ʻemau moʻuí takitaha.

Ne mau nofotaha ʻi homau Fakamoʻuí pea ʻi Heʻene meʻaʻofa fakalangi ʻo e hakeakiʻí. Ne mau fakahaaʻi ʻa e houngaʻia lahi ki Heʻene feilaulau fakaleleí mo ʻEne ikunaʻi ʻa e maté. Ne hoko ia ko ha taimi ʻo e fakafoʻou fakalaumālie kiate kimautolu kotoa. ʻI heʻemau ngāue fakataha ke fokotuʻutuʻu mo teuteu ki he fakamāvae fakamāmani ʻo Metetá, ne tuku ʻemau fakakaukaú ʻi he Palani ʻo e Fakamoʻui ʻa e Tamai Hēvaní, pea ʻi Hono ʻAló, ʻa ia naʻe malava ai ke mau toe fakataha mo Meteta ʻi ha ʻaho.

Naʻe hoko ʻemau ngaahi kemi ʻaho mālōlō fakafāmilí ko ha ngaahi polokalama fakafiefia, fonu ʻi he hivá mo e hulohulá, ngaahi fakaʻaliʻali talēnití, kakatá mo e fiefiá, ka ʻi he Kilisimasi makehe ko ʻení, naʻe hangē ne kiʻi hōloa e fiefia ʻo ʻemau fakafiefiá ʻi he maama ʻo e fiefia moʻoní—ko e fiefia ne ʻomai ʻe hotau Fakamoʻui ko Sīsū Kalaisí ʻi hono ʻaloʻi Ia ki he māmani ko ʻení ke ʻomai ʻa e moʻuí.

Ko e mahino ko ia ʻo ʻEne ongoongoleleí naʻá ne ʻomi e nonga ki homau fāmilí hili e pekia ʻa Metetá. Naʻá ne tokoniʻi kimautolu ke manatuʻi ʻa e ʻuhinga totonu ʻo e Kilisimasí.