NGAAHI PEESI FAKALOTOFONU
Founga Hono Tokoniʻi Au ʻe he Seminelí ke u Lavameʻa ʻi he Akó
Hangē ko ha toʻu tupu fakaʻapaʻapaʻiaʻi ʻi he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, ne u ʻalu ki he seminelí ʻi ha taʻu hokohoko ʻe fā. Naʻe ʻuhinga ʻeni ko ha ngaahi houa lōloa ʻo e ako e ongoongoleleí ʻo tānaki atu ki he ngaahi houa ako ʻi he Sāpaté mo e fāmilí. Naʻe hoko ia he taimi ʻe niʻihi ko ha aʻusia faingataʻa mo ʻahiʻahi.
Naʻá ku kamata semineli ʻi he 2017 ʻi homau Uooti Pare ʻo e Siteiki Arue Tahiti. Naʻá ku ʻi he foomu 3 ʻi he taimi ko iá, pea ne u vēkeveke ke kau ʻi he kulupu toʻu tupu ko ʻení.
Lolotonga hoku taʻu ʻuluakí, ne u ʻā kimuʻa ʻi he 5:00 am he lolotonga ʻo e uiké ke maʻu e taimi seminelí. Ne u fai ʻeku laukongá, pea ne u tokanga ʻaupito ʻi he kalasí. Ne u fakatokangaʻi ne tokoni ʻa e seminelí ki hono fakaloloto ʻeku vā fetuʻutaki mo e ʻOtuá. Ka ne taʻe ʻoua Ia, naʻe ʻikai ke u mei lava ʻi he Sivi Fakamoʻoni Ako Fakafonuá ʻi he fakaʻosinga ʻo ʻeku Foomu 3.
ʻI he taʻu ʻe ua hono hokó, ne u fakavaivai ʻi hoku ngaahi fatongiá, nofo ʻi he seminelí pe lahi ange ʻeku taimi tōmuí. Ne mole ʻeku holi ke ʻalu ki he seminelí, ko ia ne vaivai ange ʻeku feinga ke fai iá.
Tatau pē mo e faingataʻa ʻeku foomu 4, ka naʻe ʻikai ke u fakatokangaʻi ia ʻi he taimi ko iá ʻa ʻene kaunga ʻeni ki heʻeku seminelí.
ʻI he foomu 5, ne u kamata feohi mo hoku kaungāmeʻa ne nau fai ha ngaahi meʻa ne ʻikai poupouʻi hotau Siasí, hangē ko e ʻolokaholó mo e sikaletí. Ne u ongoʻi mā foki ʻi he ʻikai ke u hangē ko hoku kaungāmeʻa ko ʻení pea mo ʻikai feohi lahi ange mo kinautolú.
Ko hono nunuʻá, ne maʻulalo ʻeku maaka ki he taʻú pea kapau ne u sivi ʻi he sivi ki he fakaʻilonga ako BA ʻi he taʻu ko iá, ʻoku ou veiveiua pe te u lava.
Pea ne liliu leva ʻe he mahaki fakaʻauha fakaemāmani lahi ko e Covid ʻetau moʻui fakaʻahó, ʻa ia ʻoku ou fakamālō ai ki he ʻOtuá.
ʻI hono kamata fakahoko e ngaahi kalasi seminelí ʻi heʻemau telefoni toʻotoʻó, naʻe hangē ia ʻoku fepaki mo e kovi ʻoku ʻi aí.
Neongo naʻe kei ʻi ai ha ngaahi momeniti ne u vaivai ai, ne u fili ke hokohoko atu ʻeku feinga fakamātoato ke muimui ʻi he ngaahi lēsoni seminelí, ke maʻu ʻa e lelei mei he tokoni ʻa e ʻOtuá ʻi heʻeku akó.
Ko hoku taula faifakamoʻuí
ʻOku ou houngaʻia ki heʻeku ongomātuʻá. Ka naʻe taʻe ʻoua kinaua, kuó u ʻosi liʻaki ʻa e seminelí pea muimui ʻi he hala tatau ʻo hoku ngaahi kaungāmeʻa taʻe-siasí. ʻI heʻena hoko ko ʻeku ongo faiako ʻoku ou saiʻia taha aí, naʻá na tokangaʻi au ke fakapapauʻi ʻoku ou nofo maʻu pē ki he ʻOtuá.
Pea naʻe hoko ʻa e ngaahi vā fetuʻutaki lelei mo e toʻu tupu ʻo e uōtí ko hoku fakahaofí. Naʻe fakafoʻou au ʻi heʻemau ʻekitivitī kotoa pē ʻi he taimi ne ʻikai ke u ongoʻi vēkeveke ai. Naʻe kau he ngaahi kaungāmeʻa ko ʻení ʻa Koleili Soma, ʻa ia ne ʻikai ke ne teitei fakamaau ka naʻe fanongo maʻu pē mo poupou pea langaki hake au ʻi heʻene tā-sīpingá. ʻI he founga pē ʻanautolú, ne nau kau takitaha ki hono fakapalanisi fakataautaha aú.
ʻOku ʻi ai maʻu pē ʻa e ngaahi pale ʻo e feingá
Naʻe ola lelei ʻa hono tauhi ʻo e ako fakaʻaho ʻo e folofolá ʻi hoku taʻu fakaʻosi ʻo e seminelí, ʻa ia ko ʻeku foomu 6 mo e taʻu fakaʻosi foki ia ʻi he akó.
ʻI heʻeku tōʻonga ako seminelí, ne u lava ʻo maau ange ai. Lolotonga ʻa e ʻikai ke u saiʻia ʻi he laukongá, ne u feinga ke laukonga maʻu pē. Ne fakangofua au heni ke tauhi ʻeku vā fetuʻutakí—pea neongo ʻene siʻisiʻi—mo e Tamai Hēvaní. ʻI he taʻu ko iá, ne u lava māʻolunga ʻi heʻeku fakaʻilonga ako BA.
Ne maʻu ʻeku laiseni fakaʻulí ʻi heʻeku fuofua feingá. Ne maʻu hoku uiuiʻí ke ngāue fakafaifekau ʻi Pālesi. Ko hono fakakātoá, naʻe ʻi heʻeku moʻuí ʻa e toʻukupu ʻo e ʻOtuá ʻi he taimi kotoa pē ne u ʻi he seminelí mo e akó aí. ʻI heʻeku manatu ki aí, ʻoku ou fakamoʻoni ʻe tokoni maʻu pē ʻa e ʻOtuá koeʻuhí ʻokú Ne ʻofeina kitautolu.
ʻOku tau fie maʻu ʻa e seminelí ʻi heʻetau hoko ko ha kakai kei talavoú ke tokoni ke tau falala ki he ʻOtuá pea tuku ke Ne lāngilangiʻia ʻi heʻetau moʻuí. Naʻá Ne falala maʻu pē kiate au.