Ngāue ʻa e Māmá ʻi Hono Fai ʻe he Kau Ngāue Tokoni kei Talavou ʻi Kuinisilaní

ʻOku tokoni ʻa e kāingalotu kei talavou ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní mo honau ngaahi kaungāmeʻa Mosilemi ʻi Kuinisilaní ki ha kautaha ngāue ʻofa ʻi ʻAositelēlia ke ʻomi ha maama ki he tukui kolo ʻi Vanuatu ʻoku uesia ʻe he nounou fakaeʻuhilá.

ʻI he ʻOkatopa kuo ʻosí, naʻe tānaki fakataha ai ʻe ha kau ngāue tokoni kakai lalahi taautaha kei talavou ʻe toko 186, kau ai ha ngaahi kaungāmeʻa mei he kolo ʻĀmataiā Musilemí, kāingalotu mo e ngaahi kaungāmeʻa ʻo e Siasí, ha ngaahi maama sola ke fokotuʻu ʻe 1,000.

Naʻe tohi foki ʻe he kau ngāué ha fakamatala pe pōpoaki fakalotolahi ʻi he pepa fakahinohino naʻe ʻave fakataha mo e maama takitaha.

Naʻe pehē ʻe ha tokotaha ngāue tokoni ʻe taha, “ʻIkai ngata pē heʻemau faʻu ha ngaahi māmá, ka ʻoku mau hiki foki ha tohi ke ʻave fakataha mo e ngaahi māmá, pea ʻokú ne ʻai moʻoni ia ke fakataautaha, pea ʻoku fakafiefia ʻaupito ke tokoni ki he niʻihi kehé.”

Naʻe pehē ʻe Pili Mefi, ko ha fakafofonga mei he kautaha SolarBuddy, “ʻE fakaʻaongaʻi ʻa e ngaahi maama ko ʻení ki he ako ʻa e fānaú ʻi he poʻulí pea ke malu e fefonongaʻaki ʻi he koló pea ʻofa pē te nau maʻu ai ha faingamālie lelei ʻaupito ʻi heʻenau fakalakalaka atu ki muʻá.”

Naʻe pehē ʻe Kali Mola, ko e pule ʻi he Moʻui Fakafalala Pē Kiate Kitá mo e Fitungofulu Fakaʻēlia (taki fakavahe) ki he Siasí ʻi aí, “ʻOku ou vakai ko ha faingamālie ʻeni ke fakasiʻisiʻi ʻa e faingataʻaʻiá, ke fakatupulaki ʻa e malava ke akó ke hoko ko ha puipuituʻa ʻi he ʻapi ʻo ha taha, ke ʻoatu ha ngaahi faingamālie fakaemoʻui lelei ange ʻi honau ngaahi ʻapí, ʻa ia te nau hoko ai ʻo moʻui fakafalala ange kiate kinautolu pē.”

ʻOku lesisita ʻa e kau ngāue tokoní ʻi he JustServe, ko ha feituʻu taʻetotongi ki hono langa ʻo e uouangatahá ʻi he ngāue tokoni ʻi he koló, ʻa ia ne fakamatalaʻi ai ʻa e ngāue tokoní.

Naʻe fakatau ʻa e ngaahi māmá ko ha ngāue tokoni fakaetangata, ʻe he Ngaahi Kautaha Tokoni ʻa e Kau Māʻoniʻoni ʻi he Ngaahi ʻAho Kimui Ní, ko e uma ngāue tokoni ʻa e Siasí, mei he Solar Buddy, ʻa ia ko ha kautaha ngāue ʻofa ʻAositelēlia ia ʻoku taumuʻa ʻaki ʻa hono fakangata ʻo e masivesiva fakaeʻuhila ʻa e fānau kotoa pē.

Hili hono fokotuʻu ʻa e ngaahi māmá, ʻa ia ne meimei miniti ʻe nima takitaha, naʻe hoko atu ʻa e feohi e kakai lalahi kei talavoú ʻi ha ngaahi keimi, ʻekitivitī mo e meʻatokoni foki.

Naʻe pehē ʻe Kali Mola, “Fakatauange ʻe hoko ʻeni ko ha faingamālie lahi maʻá e ngaahi fāmilí mo e fakafoʻituituí ke vakai ʻo ʻikai ngata pē ʻi he maama mei he ngaahi māmá, ka ko e maama ʻo ʻenau moʻuí, ʻa Sīsū Kalaisi.”