Ngāue ʻOfa ʻa e Toʻu Tupú ʻi he Faʻitoka Pilisipeiní

Ne aʻu atu ha kakai kei talavou ʻe toko 180, taʻu 14–17, mo ha taulani ʻoku fonu ʻi he meʻangāué, ʻo nau vahevahe ki ha ngaahi kulupu kehekehe ke tā mo tuʻusi ʻa e ngaahi vaʻá, fakamaʻa ʻa e ngaahi maka fakamanatú, fakaʻatā ʻa e ngaahi halá, fakamaʻa ʻa e ngaahi faʻitoká, mo faitaaʻi e ʻū maka fakamanatú ki he maʻuʻanga fakamatala ʻo e faʻitoka ʻa e BillionGraves.

Naʻe hoko ʻa e ngāué ko ha polokalama makehe ki he Konifelenisi Siteiki ʻa e Toʻu Tupú ʻo e siteiki Senitenelí ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní.

Ko ha siteikí ko ha kulupu ʻo e ngaahi fakatahaʻanga.

Ko e kakai kei talavou ne nau lesisita ki he ngāue ko ʻení ʻi he uepisaiti JustServe ʻa ia ko ha feituʻu ngāue ʻokú ne fakahoa ʻa e kau ngāue ʻofá mo e ngaahi ngāue mei he ngaahi kautaha fakakolo fakalotofonua ʻoku nau fie maʻu ha tokoní, ʻi he taimi ko ʻení, ko e Ngaahi Kaungāmeʻa ʻo e Faʻitoka Pilisipeini Sauté.

Naʻe pehē ʻe Mele Manu, ko ha toʻu tupu ngāue tokoni ʻofa, “Ko e kulupu tokolahi taha kimautolu kuo nau maʻú, pea naʻa nau pehē ko e ngāue kuo mau fai he houa ʻe taha mo e kongá, ʻoku tatau ia mo e ngāue ne nau mei fakahoko he taʻu ʻe taha!”

Naʻá ne tānaki atu, “Naʻe fakafiefia ʻaupito mo fakalata ʻi hono ʻiloʻi kuo mau kau ko ha konga ʻo e ngāue maʻongoʻonga ko ʻeni ʻi he tafaʻaki fakatouʻosi ʻo e veilí.”

Naʻe pehē ʻe Tuleisi ʻOliveti, ko e tokotaha naʻá ne kamataʻi pea ko e palesiteni foki ia ʻo e Ngaahi Kaungāmeʻa ʻo e Faʻitoka Pilisipeini Sauté, “ʻOku mau ongoʻi fiefia ʻaupito ʻi he ngāue mo e ʻofa mei heʻemau kau tokoni makehe ʻo e ʻaho ní pea hangē ʻoku ʻikai feʻunga ʻa e fakamāló.”

Naʻá ne hoko atu ʻo pehē, “ʻOku lahi ha ngaahi faʻitoka ʻi he Faʻitoka Pilisipeini Sauté ʻoku ʻikai toe ʻi ai hanau ngaahi fāmili ke tauhi kinautolu; kuo mālōlō kotoa ha ngaahi fāmili ʻe niʻihi. Ko e ʻuhinga ʻeni ʻe taha ʻoku tau fakamaʻa ai kinautolú. ʻOku totonu ke manatua ʻa e ngaahi kui kotoa kuo mamaʻo atú.”