Kita Mao Ang Simbahan ni Jesukristo sa mga Santos sa Ulahing mga Adlaw

Human makadawat og pagdapit sa “pagduol ug pagtan-aw,”¹ ako mitambong sa Ang Simbahan ni Jesukristo sa mga Santos sa Ulahing mga Adlaw sa unang higayon sa edad nga 26. Ako bag-ohay lang nga nagbulag sa akong unang bana. Ako adunay tres anyos nga anak nga lalaki. Ug gibati nako ang kawalay gahom tungod sa kahadlok. Sa dihang misulod na ako sa gambalay, napuno ako sa init nga pagbati samtang akong nasabtan ang hugot nga pagtuo ug hingpit nga kalipay sa mga tawo nga nagpalibot kanako. Kadto tinuod gayod nga “panalipod batok sa mga bagyo.”² Tulo ka semana human niadto, ako mihimo sa pakigsaad sa pagbunyag uban sa Langitnong Amahan ug misugod sa akong panaw isip usa ka disipulo ni Kristo, bisan kon ang akong kinabuhi dili hingpit subay niana nga panaw.

Aron nga ako makadawat niadto nga mga mahangtorong panalangin, daghan nga pisikal ug espirituhanon nga mga elemento ang kinahanglan nga anaa sa saktong dapit. Ang ebanghelyo ni Jesukristo gipahiuli na ug gisangyaw; kadto nga meetinghouse natukod ug gimintinar, adunay eklesiyastikanhon nga estraktura, gikan sa propeta ngadto sa lokal nga mga lider; ug usa ka branch nga napuno sa nakigsaad nga mga miyembro ang andam sa pagsuporta kanako ug sa akong anak samtang kami gidala ngadto sa Manluluwas, “[gi]amumahan pinaagi sa maayo nga pulong sa Dios,”³ ug gihatagan og mga kahigayonan sa pagserbisyo.⁴

Gikan sa sinugdanan, ang Dios nagtinguha sa pagpundok ug paghan-ay sa Iyang mga anak⁵ “sa pagpahinabo sa [atong] pagka-imortal ug kinabuhi nga dayon.”⁶ Niana nga katuyoan diha sa hunahuna, Siya misugo kanato sa pagtukod og mga dapit sa pagsimba⁷ diin kita makadawat og kahibalo ug mga ordinansa sa kaluwasan ug kahimayaan; mohimo ug mosunod sa mga pakigsaad nga mobugkos kanato ngadto kang Jesukristo;⁸ gitugahan sa “gahom sa pagka-diosnon”;⁹ ug kanunay nga magpundok aron hinumdoman si Jesus ug lig-onon ang usag usa diha Kaniya.¹⁰ Ang organisasyon sa Simbahan ug ang mga gambalay niini anaa alang sa atong espirituhanong kaayohan. “Ang Simbahan … mao ang suporta diin kita makatukod og mahangtorong pamilya.”¹¹

Samtang nakig-istorya ngadto sa usa ka higala nga nagsagubang og malisod nga panahon, nangutana ko kon giunsa niya pagsangkap sa iyang pamilya sa pinansiyal nga paagi. Uban sa mga luha, siya mitubag nga ang iyang bishop mitabang kaniya gamit ang mga pondo sa halad sa puasa. Siya midugang, “Ako wala makahibalo kon asa kaha ang akong pamilya ug ako kon dili pa tungod sa Simbahan.” Ako mitubag, “Ang Simbahan mao ang mga miyembro. Sila mao ang mga tawo kinsa andam ug malipayon kaayo nga mohatag og mga halad sa puasa aron sa pagtabang ni kinsa kanato nga nanginahanglan. Kamo nagdawat sa mga bunga sa ilang hugot nga pagtuo ug determinasyon sa pagsunod ni Jesukristo.”

Akong kauban nga mga disipulo ni Kristo, kinahanglan dili nato ipakaubos ang kahibulongan nga buhat nga gihimo sa Ginoo pinaagi kanato, ang Iyang Simbahan, bisan pa sa atong mga kakulangan. Usahay kita mga tighatag ug usahay kita mga tigdawat, apan kita tanan usa ka pamilya diha ni Kristo. Ang Iyang Simbahan mao ang estraktura nga Iyang gihatag aron sa paggiya ug pagpanalangin kanato samtang kita mosimba Kaniya ug moserbisyo sa matag usa.

Ang ubang mga sister nangayo og pasaylo kanako, naghunahuna nga sila dili aktibo nga mga sakop sa Relief Society tungod kay nagserbisyo sila sa Primary o Young Women. Kadto nga mga sister lakip sa labing aktibo nga mga sakop sa Relief Society tungod kay sila nagtabang sa atong bililhon nga kabataan ug kabatan-onan nga mapalig-on ang ilang pagtuo diha ni Jesukristo.

Ang Relief Society dili limitado sa usa ka lawak diha sa usa ka gambalay, usa ka leksiyon sa Dominggo, usa ka kalihokan, o usa ka kapangulohan diha sa lokal o kinatibuk-an nga lebel. Ang Relief Society mao ang kababayen-an sa pakigsaad sa Simbahan; kini mao kita—matag usa kanato ug kitang tanan. Kini mao ang atong “tibuok kalibotan nga komunidad sa kalooy ug serbisyo.”¹² Bisan asa ug sa tanang dapit nga kita moadto, kita kanunay nga kabahin sa Relief Society samtang kita maningkamot sa pagtuman sa balaanong katuyoan niini, nga mao nga ang kababayen-an makatuman sa buluhaton sa Dios diha sa indibidwal ingon man sa kolektibo nga mga paagi¹³ pinaagi sa paghatag og kahupayan: “kahupayan gikan sa kakabos, kahupayan gikan sa sakit; kahupayan gikan sa pagduhaduha, kahupayan gikan sa pagka-ignorante—kahupayan gikan sa tanang babag … sa kalipay ug kalamboan.”¹⁴

Ang susama nga pagkahisakop makita diha sa mga korum sa mga elder ug mga organisasyon sa Simbahan alang sa tanang edad, lakip na ang atong kabataan ug kabatan-onan. Ang Simbahan labaw pa kay sa mga gambalay ug sa eklesiyastikanhong estraktura; ang Simbahan kay kita, ang mga miyembro. Kita mao Ang Simbahan ni Jesukristo sa mga Santos sa Ulahing mga Adlaw, nga si Kristo ang anaa sa ulohan ug ang propeta isip Iyang tigpamaba. Ang Ginoo miingon:

“Tan-awa, mao kini ang akong doktrina—kinsa kadto nga maghinulsol ug moduol ngari kanako, ang ingon mao ang akong simbahan. …

“Ug … kinsa kadto nga sakop sa akong simbahan, ug makalahutay sa akong simbahan ngadto sa kataposan, ako mopahimutang kaniya diha sa akong lig-on nga sukaranan.”¹⁵

Mga kaigsoonan, atong amgohon kon unsa kita kadako og pribilehiyo nga kita nahisakop sa Simbahan ni Jesukristo, diin kita makahiusa sa atong hugot nga pagtuo, mga kasingkasing, mga kalig-on, mga hunahuna, ug mga kamot aron sa paghimo sa Iyang gamhanan nga mga milagro. “Kay ang lawas [sa Simbahan ni Kristo] dili usa ra ka bahin, kon dili daghan.”¹⁶

Usa ka batan-on nga lalaki misulti sa iyang inahan, “Sa dihang gamay pa ko, sa matag higayon nga mohatag ko og usa ka dolyar sa ikapulo, nagtuo ko nga kana nga usa ka dolyar usa ka tibuok nga meetinghouse ang matukod. Dili ba kana kataw-anan?”

Natandog, siya mitubag, “Nindot kana! Imo ba kini nga nahulagway sa imong hunahuna?”

“Oo!” siya mituaw. “Mga nindot kini, ug adunay minilyon niini!”¹⁷

Minahal ko nga mga higala, magbaton kita og hugot nga pagtuo sa usa ka bata ug maglipay sa pagkahibalo nga bisan ang atong labing gamay nga mga paningkamot nakahimo og mahinungdanon nga kalainan sa gingharian sa Dios.

Ang atong katuyoan sa Iyang gingharian kinahanglan mao ang pagdala sa matag usa ngadto ni Kristo. Sama sa atong mabasa diha sa mga kasulatan, ang Manluluwas mihatag niini nga pagdapit ngadto sa mga Nephite:

“Aduna ba kamo dihay mga masakiton? Dad-a sila ngari. Aduna ba kamo dihay … gitakboyan sa tanan nga mga matang sa sakit? Dad-a sila ngari ug Ako moayo kanila, kay Ako adunay kalooy diha kaninyo; ang akong kasingkasing napuno sa kalooy.

“… Kay Ako nakakita nga ang inyong hugot nga pagtuo igo nga Ako moayo kaninyo.”¹⁸

Kitang tanan wala bay mga sakit nga mahimong dad-on ngadto sa mga tiil sa Manluluwas? Samtang ang uban kanato adunay pisikal nga mga hagit, mas daghan ang nakigbatok sa emosyonal nga panagbingkil, ang uban nakigbisog sa pag-amuma og sosyal nga mga koneksiyon, ug kitang tanan nagtinguha og kapahulayan kon ang atong mga espiritu gihagit. Kitang tanan nasakit sa pipila ka paagi.

Atong mabasa nga “ang tanan nga pundok sa mga katawhan, nagkahiusa, ug miduol uban sa ilang mga masakiton ug … uban sa tanan kanila nga gitakboyan sa tanan nga matang sa sakit; ug siya miayo kanila matag usa kanila nga gidala ngadto kaniya.

“Ug silang tanan, kadto kinsa nangaayo ug kadto kinsa mga maayo, miluhod sa iyang tiilan, ug misimba kaniya.”¹⁹

Gikan sa usa ka batang lalaki nga nagbayad og ikapulo uban sa hugot nga pagtuo, ngadto sa usa ka inahan nga wala maminyo nga nagkinahanglan sa makagagahom nga grasya sa Ginoo, ngadto sa usa ka amahan nga nanlimbasog sa pagsangkap sa iyang pamilya, ngadto sa atong mga katigulangan nga nanginahanglan sa mga ordinansa sa kaluwasan ug kahimayaan, ngadto sa matag usa kanato nga nagbag-o sa mga pakigsaad uban sa Dios matag semana, nagkinahanglan kita sa matag usa, ug kita makadala sa matag usa ngadto sa makatubos nga pagkaayo sa Manluluwas.

Akong minahal nga mga sister ug mga brother, sundon nato ang pagdapit ni Jesukristo sa pagdala sa atong mga kaugalingon ug sa atong mga kasakit ngadto Kaniya. Kon kita moduol Kaniya ug modala niadtong atong gihigugma ngadto Kaniya, Iyang makita ang atong hugot nga pagtuo. Siya moayo kanila, ug Siya moayo kanato.

Isip “malinawon nga mga sakop ni Kristo,”²⁰ kita naningkamot nga mahimong “usa sa kasingkasing ug usa sa hunahuna”²¹ ug magpaubos; magmasinugtanon; magmalumo; sayon nga hangyoon; puno sa pailob ug mainantoson; mapugnganon sa tanan nga mga butang; makugihon sa paghupot sa mga sugo sa Dios sa tanan nga mga panahon; adunay hugot nga pagtuo; paglaom; ug gugma nga putli; ug kanunay puno sa maayo nga mga buhat.²² Kita naningkamot nga mahimong sama ni Jesukristo.

Ako mopamatuod nga isip Simbahan ni Kristo, kita mao ang paagi diin, sama sa gitudlo ni Presidente Russell M. Nelson, “ang atong Manluluwas ug Manunubos, si Jesukristo, mohimo sa uban Niyang labing gamhanan nga mga buhat karon ug sa higayon nga Siya mobalik na pag-usab.”²³

Ang Ginoo miingon:

“Tan-awa, Ako modali sa akong buluhaton diha sa iyang angay nga panahon.

“Ug Ako mohatag nganha kaninyo … usa ka sugo nga kamo magtigom sa inyong mga kaugalingon, ug maghan-ay sa inyong mga kaugalingon, ug mag-andam sa inyong mga kaugalingon, ug magbalaan sa inyong mga kaugalingon; oo, limpyohi ang inyong mga kasingkasing, ug hugasi ang inyong mga kamot ug ang inyong mga tiil diha sa akong atubangan, aron Ako makahimo kaninyo nga limpyo.”²⁴

Kita unta motubag niini nga balaanong pagdapit ug malipayong magtigom, maghan-ay, mag-andam, ug magbalaan sa atong mga kaugalingon mao ang akong mapaubsanong pag-ampo sa ngalan ni Jesukristo, amen.