Pagsunod kang Jesus: Pagkahimong Magbubuhat og Kadaitan

Ang gamhanan nga epekto sa internet usa ka panalangin ug usa ka hagit, nga talagsaon sa atong panahon.

Sa panahon sa social media ug sa nagkalain-laing mga plataporma sa impormasyon, ang tingog sa usa ka tawo mahimong moabot ngadto sa kadaghanan sa daling panahon. Kana nga tingog, tinuod man o bakak, makaayo man o makadaot, mabination man o mabangis, dali kaayong mokatap sa tibuok kalibotan.

Ang mga post sa social media nga puno sa panghunahuna ug kamaayo sa kasagaran dili kaayo matagad, samtang ang mga pulong sa pagtamay ug kasuko kanunay natong madunggan, kabahin man sa politikanhong pilosopiya, mga tawo sa mga balita, o mga opinyon sa pandemya. Walay usa o walay hilisgotan, lakip sa Manluluwas ug sa Iyang gipahiuli nga ebanghelyo, ang makalingkawas gikan niining sosyal nga tilimad-on sa nagkabahin-bahin nga mga tingog.

Ang Wali sa Ibabaw sa Bungtod usa ka mensahe alang sa tanan apan piho nga gihatag ngadto sa mga disipulo sa Manluluwas, niadtong kinsa mipili sa pagsunod Kaniya.

Ang Ginoo mitudlo unsaon sa pagpakabuhi, kaniadto ug karon sa usa ka kalibotan nga puno sa panagbingkil. “Bulahan ang magbubuhat og kadaitan,” Siya mipahayag, “kay sila pagatawgon nga mga anak sa Dios.”¹

Pinaagi sa taming sa inyong hugot nga pagtuo diha kang Jesukristo, kita mahimong magbubuhat og kadaitan, mopalong—buot ipasabot mopakalma, mopabugnaw, o mosanta—sa tanang nagsiga nga mga pana sa kaaway.²

Kon buhaton nato ang atong bahin, ang Iyang saad mao nga kita pagatawgon nga “mga anak sa Dios.” Ang matag tawo sa yuta mao ang “mga anak”³ sa Dios, apan ang pagatawgon nga “mga anak sa Dios” nagpasabot og mas labaw pa. Samtang kita moduol ngadto ni Jesukristo ug mohimo og mga pakigsaad uban Kaniya, kita mahimong “iyang binhi” ug “mga manununod sa gingharian,”⁴ “mga anak ni Kristo, ug anak nga mga lalaki ug iyang anak nga mga babaye.”⁵

Sa unsa nga paagi nga ang usa ka magbubuhat og kadaitan mopakalma ug mopabugnaw sa nagsiga nga mga pana? Sigurado dili ang pagnunot ngadto niadtong nagsulti og daotan kanato. Hinoon, kita magpabilin nga masaligon sa atong hugot nga pagtuo, mopaambit sa atong mga gituohan uban ang kombiksyon, apan kanunay nga maglikay sa kasuko o malisya.⁶

Karong bag-o human sa usa ka kusganon nga pulong sa pagsaway sa Simbahan, si Reverend Amos C. Brown, usa ka nasyonal nga lider sa sibil nga mga katungod ug pastor sa Third Baptist Church sa San Francisco, mitubag nga:

“Akong gitahod ang kasinatian ug panglantaw sa maong indibidwal kinsa misulat niadto nga mga pulong. Ibutang nato, nga ako wala makakita unsay iyang nakita.”

“Akong giisip kini nga usa sa akong dakong kalipay nga makaila niini nga mga lider [sa Simbahan], lakip ni Presidente Russell M. Nelson. Sila, sa akong pagbanabana, ang ehemplo sa labing maayong pagkapangulo nga ikatanyag sa atong nasod.”

Imahe

Si President Nelson uban ni Reverend Brown

Siya dayon midugang: “Kita makabagulbol mahitungod sa paagi sa mga butang sa una. Kita makadumili sa pagdawat sa tanang maayo nga anaa karon. … Apan kini nga mga paagi dili makaayo sa atong nasyonal nga mga pagkabahinbahin. … Sama sa gitudlo ni Jesus, dili nato mapuhag ang daotan pinaagi sa mas daotan. Kita mahigugmaong mohatag ug magpuyo nga maloloy-on, bisan niadtong sa atong hunahuna atong mga kaaway.”⁷

Si Reverend Brown usa ka magbubuhat og kadaitan. Siya kalma ug matinahorong mipabugnaw sa nagsiga nga mga pana. Ang magbubuhat og kadaitan aktibo; sila maawhagon sa pamaagi sa Manluluwas.⁸

Unsa ang nakahatag nato og kalig-on sa kaugalingon sa pagpabugnaw, pagpakalma, ug pagsanta sa nagsiga nga mga pana nga gitumong ngadto sa mga kamatuoran nga atong gimahal? Ang kalig-on nagagikan sa atong hugot nga pagtuo ni Jesukristo ug sa atong hugot nga pagtuo sa Iyang mga pulong.

“Bulahan [kamo] kon biaybiayon ug daugdaogon, … ug butangbutangan sa tanang matang sa kadaotan tungod sa inyong pagsunod kanako.

“… Kay dako ang ganti nga gitagana alang kaninyo didto sa langit: giingon usab nila niini pagpasipala ang mga propeta nga nahiuna kaninyo.”⁹

Duha ka importante nga baroganan mogiya sa atong tinguha nga mahimong magbubuhat og kadaitan.

Una, ang atong Langitnong Amahan mihatag sa matag indibidwal sa iyang moral nga kabubut-on, uban sa abilidad sa pagpili sa kaugalingong dalan.¹⁰ Kini nga kabubut-on mao ang usa sa labing mahinungdanon nga mga gasa sa Dios.

Ikaduha, uban niini nga kabubut-on, ang atong Langitnong Amahan mitugot sa “katugbang sa tanan nga mga butang.”¹¹ “Kita “motilaw sa kapait, aron [kita] masayod sa paghatag og bili sa maayo.”¹² Ang katugbang dili angay nga makapatingala nato. Kita magkat-on sa pag-ila sa maayo gikan sa daotan.

Kita magmaya sa panalangin sa kabubut-on, mosabot nga adunay daghan kinsa dili motuo unsay atong gituohan. Gani, pipila ra sa ulahing mga adlaw ang mopili sa paghimo sa ilang hugot nga pagtuo diha kang Jesukristo nga sentro sa tanan nilang hunahunaon ug buhaton.¹³

Tungod sa social media nga mga plataporma, ang usa ka tingog nga walay pagtuo mopatumaw og daghang negatibo nga mga tingog,¹⁴ apan bisan kon kining daghan nga mga tingog, kita mopili sa dalan sa magbubuhat og kadaitan.

Ang uban mitan-aw sa Unang Kapangulohan ug sa Korum sa Napulog Duha nga adunay kalibotanon nga mga motibo nga mahimong mga lider sa politika, sa negosyo, ug sa kultura.

Apan, kami gihatagan og mga responsibilidad sa lahi kaayo nga paagi. Kami wala pilia o gipili gikan sa mga application. Nga walay bisan unsa nga piho nga propesyonal nga pagpangandam, kami gitawag ug giordinahan nga mopamatuod sa ngalan ni Jesukristo sa tibuok kalibotan hangtod sa among kataposang gininhawa. Kami maningkamot sa pagpanalangin sa masakiton, sa nagsubo, sa nagmasulub-on, ug sa kabos ug sa paglig-on sa gingharian sa Dios. Kami magtinguha nga makahibalo sa kabubut-on sa Ginoo ug sa pagpahayag niini, ilabi na niadtong kinsa nagtinguha og kinabuhing dayon.¹⁵

Bisan og ang among mapainubsanong tinguha mao nga mapasidunggan sa tanan ang mga pagtulon-an sa Manluluwas, ang mga pulong sa Ginoo pinaagi sa Iyang mga propeta sa kasagaran sukwahi sa panghunahuna ug sa uso sa kalibotan. Nahitabo kini sukad pa sa una.¹⁶

Ang Manluluwas miingon sa Iyang mga Apostoles:

“Kon [nasilag] kaninyo ang kalibotan, hinumdomi nga akoy unang gikasilagan niini. …

“… Apan kining tanan buhaton nila kaninyo … tungod kay wala man sila makaila kaniya nga nagpadala kanako.”¹⁷

Kita tinud-anay nga nahigugma ug nag-atiman sa tanan natong mga silingan, mituo man sila o wala sama sa atong gituohan. Si Jesus mitudlo kanato sa sambingay sa Maayong Samarianhon nga kadtong lahi og mga pagtuo kinahanglan sinserong motabang ni bisan kinsa nga nanginahanglan, isip mga magbubuhat og kadaitan, mopadayon sa maayo ug halangdon nga mga katuyoan.

Niadtong Pebrero, usa ka ulohan [headline] sa Arizona Republic mipahayag, “Ang bipartisan nga balaodnon nga gisuportahan sa mga Santos sa Ulahing mga Adlaw manalipod sa mga gay ug transgender nga mga taga-Arizona.”¹⁸

Kita, isip mga Santos sa Ulahing mga Adlaw, “nalipay nga nahimong kabahin sa koalisyon sa mga lider sa tinuhoan, negosyo, LGBTQ nga mga tawo ug sa komunidad kinsa nagtambayayong sa diwa sa pagsalig ug pagtahod sa tanan.”¹⁹

Si Presidente Russell M. Nelson sa makausa mahunahunaon nga nangutana, “Dili ba mahimong maanaa ang mga linya sa utlanan nga dili mahimong mga linya sa panggubatan?”²⁰

Kita maningkamot nga mahimong “malinawon nga mga sakop ni Kristo.”²¹

Ang pipila ka pagpang-ataki ngadto sa Manluluwas hugaw kaayo nga Siya wala motubag. “Miduol ang mga kadagkoan sa mga pari ug ang mga magtutudlo sa balaod … ug mipasakag bug-at nga mga sumbong batok kang Jesus … ug gibugalbugalan siya,” apan “wala gayod motubag [kanila] si Jesus.”²² Adunay mga panahon nga ang pagbuhat og kadaitan nagpasabot nga pugngan nato ang tinguha sa pagtubag ug hinoon uban sa kaligdong, magpabilin nga hilom.²³

Makapasubo kaayo alang natong tanan kon ang dili maayo o matamayon nga mga pulong mahitungod sa Manluluwas, ngadto sa Iyang mga sumusunod, ug sa Iyang Simbahan gisulti o gimantala niadtong kinsa sa makausa aktibo nga miyembro sa Simbahan, miambit sa sakramento uban nato, ug mipamatuod uban nato sa balaan nga misyon ni Jesukristo.²⁴

Kini nahitabo usab panahon sa pangalagad sa Manluluwas.

Ang pipila ka disipulo ni Jesus kinsa uban Kaniya atol sa Iyang labing halangdon nga mga milagro nakahukom nga dili na gayod “[mokuyog] kaniya.”²⁵ Subo lang, dili tanan ang magpabilin nga lig-on sa ilang gugma alang sa Manluluwas ug sa ilang determinasyon sa pagtuman sa Iyang mga sugo.²⁶

Si Jesus mitudlo nato nga mopalayo gikan sa mga dapit diin adunay kasuko ug panagbingkil. Sa usa ka ehemplo, human nga gisukmatan sa mga Pariseo si Jesus ug gisabotan unsaon nila sa paglaglag Kaniya, ang mga kasulatan miingon nga si Jesus mibiya sa Iyang Kaugalingon gikan kanila,²⁷ ug ang mga milagro nahitabo “mikuyog kaniya ang daghang mga tawo, ug giayo niya ang tanang masakiton.”²⁸

Kita usab makabiya gikan sa panagbingkil ug mopanalangin sa mga kinabuhi sa uban,²⁹ samtang dili nato itago ang atong kaugalingon sa ubang tawo.

Sa Mbuji-Mayi, Democratic Republic of the Congo, sa sinugdanan pipila ang kritikal sa Simbahan, wala makasabot sa atong mga pagtuo o makaila sa atong mga miyembro.

Pila ka tuig na ang milabay, si Kathy ug ako mitambong og espesyal kaayo nga tulumanon sa Simbahan sa Mbuji-Mayi. Ang mga bata nindot og mga sinina, nga nagpahayag sa paglaom ug kalipay. Ako naglaom nga mamulong ngadto kanila mahitungod sa ilang edukasyon apan nahibalo nga daghan ang wala na moeskwela. Ang atong mga lider, nga adunay gamay nga makitawhanon nga pundo, nakakita og paagi sa pagtabang.³⁰ Karon, sobra sa 400 ka estudyante—mga batang babaye ug mga batang lalaki, mga miyembro ingon man niadtong dili sakop sa atong tinuhoan—mahimong moapil ug gitudloan sa 16 ka magtutudlo kinsa mga miyembro sa Simbahan ni Jesukristo.

Imahe

Kalanga Muya

Ang katorse anyos nga si Kalanga Muya miingon, “[Gamay ra ang kwarta,] ako migahin sa upat ka tuig nga wala makaeskwela. … Ako mapasalamaton kaayo unsay nahimo sa Simbahan. … Ako makabasa na karon, makasulat, ug makasulti og French.”³¹ Naghisgot niini nga inisyatibo, ang mayor sa Mbuji-Mayi miingon, “Ako nadasig sa Ang Simbahan ni Jesukristo sa mga Santos sa Ulahing mga Adlaw tungod kay samtang ang [ubang] simbahan naghunahuna lang sa ilang kaugalingon … [kamo nagtrabaho] sa [uban] sa pagtabang sa komunidad nga nanginahanglan.”³²

Matag higayon nga ako mobasa sa Juan kapitulo 13, napahinumdoman ko sa hingpit nga ehemplo sa Manluluwas isip usa ka magbubuhat og kadaitan. Si Jesus mahigugmaong mihugas sa mga tiil sa mga Apostoles. Dayon mabasa nato “nasubo siya pag-ayo,”³³ samtang Siya naghunahuna mahitungod sa usa ka tawo nga Iyang gimahal nga nangandam sa pagbudhi Kaniya. Ako naningkamot sa paghanduraw sa mga hunahuna ug mga pagbati sa Manluluwas sa dihang mibiya si Judas. Makapaikag, nianang masulub-ong higayon, si Jesus wala na maghisgot mahitungod sa Iyang “subo” nga mga pagbati o mahitungod sa pagbudhi. Hinoon, Siya namulong ngadto sa Iyang Apostoles bahin sa gugma, ang Iyang mga pulong adunay dakong impluwensya sa daghang katuigan:

“Ako magahatag kaninyog bag-ong sugo, nga kinahanglan maghigugmaay kamo ang usa sa usa; ingon nga ako nahigugma kaninyo. …

“Ang tanang tawo makaila nga kamo mga tinun-an ko pinaagi niini , kon kamo maghigugmaay ang usa sa usa.”³⁴

Hinaot nga kita mahigugma Kaniya ug maghigugmaay sa usag usa. Hinaot nga kita mahimong magbubuhat og kadaitan, aron nga kita matawag nga “mga anak sa Dios,” Ako nag-ampo sa ngalan ni Jesukristo, amen.