Pagtabang sa Tibuok Kalibotan

Alang sa minubo sa pangalagad ni Presidente Russell M. Nelson sukad sa kinaulahian nga kinatibuk-ang komperensiya, tan-awa sa pahina 135.

Namulong didto sa usa ka unibersidad sa Rome, Italy, si Presidente Dallin H. Oaks, Unang Magtatambag sa Unang Kapangulohan, miingon nga ang kagawasan sa relihiyon nagdala og daghang kaayohan sa katilingban, ug siya miawhag sa katawhan sa pagtuo nga “mangita og mga paagi nga magkat-on sa usag usa ug sa pagpatuman sa parehas nga mga panglantaw nga naghiusa kanato.”

Si Presidente M. Russell Ballard, Akting nga Presidente, ug sila si Elder Jeffrey R. Holland ug Quentin L. Cook nangalagad sa tibuok Great Britain, nakighimamat sa mga misyonaryo ug sa mga miyembro sa Simbahan. Silang tulo miserbisyo og misyon didto sa United Kingdom sa dihang mga batan-on pa sila, ug si Elder Holland ug Elder Cook managkompanyon.

Si Elder David A. Bednar namulong sa usa ka debosyonal sa Jordan. Sa United Arab Emirates, nakighimamat siya sa mga lider sa Abu Dhabi Stake ug mibisita sa expo area diin ang templo ipahimutang sa umaabot. Sa Bahrain, nakighimamat siya sa mga miyembro sa Manama Ward ug nagpahigayon og usa ka debosyonal alang sa kabatan-onan.

Si Elder D. Todd Christofferson mao ang unang Apostol nga mibisita sa Republic of the Gambia. Nakighimamat siya sa presidente, asawa sa presidente, ug bise presidente sa republika ug mihisgot bahin sa paningkamot nga pakigtambayayong tali sa Simbahan ug sa foundation sa asawa sa presidente sa pagtabang niadtong nanginahanglan. Si Elder Christofferson mibisita usab sa Ivory Coast, Nigeria, ug Ghana.

Atol sa mga miting ug pagbansay didto sa Colombia ug Ecuador, si Elder Neil L. Andersen mihinumdom sa daghang miyembro sa Simbahan nga namatay tungod sa COVID. Nakighimamat siya sa mga misyonaryo, 36 ka mga presidente sa misyon ug sa ilang mga asawa, ug mga lider sa stake, sagad mosulti sa Kinatsila. Sa usa ka debosyonal sa Colombia, siya namulong mahitungod sa paglig-on sa mga kaminyoon ug mga pamilya.

Sa Panama, si Elder Gary E. Stevenson mao ang unang Apostol nga mibisita sa isla sa Carti Tupile sa San Blas Archipelago, nga nahimutang sa Guna Yala nga distrito sa mga lumad mga duha ka oras ug tunga gikan sa Siyudad sa Panama.

Si Elder Gerrit W. Gong namulong sa kabatan-onan sa Pilipinas mahitungod sa paghimo og maalamong mga desisyon ug mahitungod sa pagdala diha sa ilang kaugalingon sa ngalan ni Jesukristo. Nakighimamat siya sa mga misyonaryo ug, diha sa usa ka kalihokan nga gisibya sa tibuok Pilipinas, namulong sa mga young single adult.

Sa iyang lumad nga nasod sa Brazil, si Elder Ulisses Soares mitambag sa mga young adult sa pagsentro sa ilang kinabuhi diha sa Manluluwas. Siya misulti sa mga misyonaryo sa paggamit sa ilang hugot nga pagtuo diha ni Jesukristo ug sa pagpabiling lig-on diha sa kamatuoran. Mga bulan ang milabay, si Elder Soares mibalik sa Brazil aron mamulong sa usa ka symposium bahin sa kagawasan sa relihiyon. Nakighimamat usab siya sa bise presidente sa Dominican Republic ug sa ambassador sa Cuba niana nga nasod. Ang Simbahan adunay usa ka district ug upat ka branch sa Cuba.

Diha sa virtual nga mga miting, si Elder Dieter F. Uchtdorf namulong sa kabatan-onan, mga misyonaryo, ug mga lider sa Simbahan sa Asya; si Elder Quentin L. Cook ngadto sa mga young adult sa Europe, Europe East, Africa, ug Middle East Areas; si Elder D. Todd Christofferson ngadto sa Portuguese og pinulongan nga mga young adult; si Elder Neil L. Andersen ngadto sa mga young adult nga nagpuyo sa Latin America ug Spain; si Elder Ronald A. Rasband ngadto sa Iningles og pinulongan nga mga young adult; ug si Elder Dale G. Renlund ngadto sa French og pinulongan nga mga young adult.