Si Presidente Nelson Nangalagad

Gamit ang mga sibya sa debosyonal ug mga post sa social media, si Presidente Russell M. Nelson nagpadayon sa pagdapit sa tanang katawhan sa pagduol ngadto ni Kristo ug pagkat-on gikan Kaniya.

Atol sa usa ka sibya sa debosyonal, si Presidente Nelson miawhag sa mga miyembro sa Simbahan sa Oklahoma ug Kansas, USA, sa pagpokus diha sa “usa sa labing mahinungdanong mga gasa sa Langitnong Amahan nga gihatag ngari nato nga isentro ang atong kinabuhi diha Kaniya ug sa Iyang Hinigugmang Anak,” siya miingon. “Ang akong gipasabot mao ang Basahon ni Mormon. Kini usa ka gasa ngari nato gikan sa Dios. Kini ang tukuranang bato [keystone] sa atong relihiyon tungod kay naglangkob kini sa labing mahinungdanong bahin, ang sentro sa Iyang doktrina.”

Namulong ngadto sa mga miyembro sa California, USA, atol sa laing sibya, si Presidente Nelson mihatag sa tulo ka pagdapit: (1) magtinguha sa kamatuoran pinaagi sa pag-ampo, pagsiksik sa mga kasulatan, ug pagtuon sa mga pulong sa mga propeta, mga manalagna, ug mga tigpadayag; (2) mopalambo sa espirituhanong gahom ug pag-ila pinaagi sa paghimo og mga pakigsaad ngadto sa Dios ug pagtuman niini; ug (3) aktibong moapil sa pagtabang sa pagpundok sa Israel.

Ug diha sa usa ka sibya ngadto sa 48 ka nasod, si Presidente Nelson mipahinumdom sa mga Santos sa Europe: “Daghan sa inyong mga higala nagtinguha nga makasabot kon nganong ania sila dinhi sa yuta. Sila gustong masayod kon ang kinabuhi aduna bay kahulogan ug katuyoan. Sila gusto nga makahimo og kalainan dinhi sa kalibotan. Sila naghunahuna kon kang kinsa sila mosalig. Naamgohan ba ninyo nga kamo ang mga tubag nga gipangita niana nga mga higala?”

Diha sa social media, si Presidente Nelson midapit nato nga dili lamang mobati og pasalamat kondili ipakita kini. Siya midapit nato nga hatagan og luna diha sa atong kasingkasing kadtong “kinsa tingali nanglimbasog aron makita ang kahayag sa Manluluwas ug aron mabati ang Iyang gugma.” Siya miawhag nato nga “magtinabangay sa pagpasiugda sa pagsalikway sa mga kinaiya ug mga binuhatan sa pagpihig.” Ug siya mipamatuod nga “adunay usa ka tinubdan nga kita makadangop aron sa pagpalambo sa gugma nga atong gibati alang sa uban o pag-ayo sa atong kasingkasing kon kini nasakitan—ang Manluluwas nga si Jesukristo.”