Lig-on diha sa mga Unos

Akong minahal nga kaigsoonan, napanalanginan kita karon nga nakadungog sa dinasig nga mga sulugoon sa Dios nga mihatag og tambag ug pagdasig. Matag usa kanato, bisan asa man kita, nakahibalo nga kita nagpuyo sa nagkaanam og kalisod nga mga panahon. Akong pag-ampo nga ako unta makatabang kaninyo nga mobarog nga lig-on diha sa mga unos nga atong giatubang, uban ang usa ka malinawon nga kasingkasing.¹

Ang dapit nga magsugod mao ang paghinumdom nga ang matag usa kanato usa ka hinigugma nga anak sa Dios ug nga Siya midasig og mga sulugoon. Kadto nga mga sulugoon sa Dios nakakita na daan sa mga panahon diin kita nagpuyo. Si Apostol Pablo misulat ngadto kang Timoteo, “Timan-i kini: sa kataposang mga adlaw moabot ang mga malisod nga panahon.”²

Si bisan kinsa nga adunay mga mata sa pagtan-aw sa mga timaan niining mga panahona ug mga dalunggan sa pagpamati sa mga pulong sa mga propeta nakahibalo nga kini tinuod. Ang mga kalisod nga adunay labing dako nga kakuyaw moabot kanato gikan sa mga pwersa sa kadaotan. Kana nga mga pwersa nagkakusog. Ug mao nga mahimong mas lisod, dili mas sayon, ang pagtahod sa mga pakigsaad nga kinahanglan natong himoon ug tumanon aron makasunod sa ebanghelyo ni Jesukristo.

Alang kanato kinsa nabalaka sa atong kaugalingon ug alang niadtong atong gihigugma, adunay paglaom diha sa saad nga ang Dios mihimo og dapit sa kasegurohan diha sa umaabot nga mga unos.

Aniay paghulagway gamit ang mga pulong niana nga dapit. Kini makadaghan nga gilarawan sa buhi nga mga propeta. Sama pananglit, sama sa narekord diha sa Basahon ni Mormon, usa ka nadasig ug mahigugmaon nga amahan misulti sa iyang mga anak nga lalaki kon unsaon sa pagpalig-on sa ilang kaugalingon nga mobarog nga lig-on diha sa mga unos nga umaabot kanila: “Ug karon, akong mga anak, hinumdomi, hinumdomi nga kini diha sa lig-on nga sukaranan sa atong Manunubos, kinsa mao si Kristo, ang anak sa Dios, nga kamo kinahanglan gayod motukod sa inyong tukoranan; nga sa panahon nga ang yawa mopadala sa iyang mapintas nga mga hangin, oo, ang iyang mga panâ diha sa alimpulos, oo, sa diha nga ang tanan niya nga ulan nga yelo ug ang iyang mapintas nga unos mohampak diha kaninyo, kini walay gahom ibabaw kaninyo sa pagbitad kaninyo ngadto sa bung-aw sa pagkauyamot ug walay kataposan nga pagkaalaot, tungod sa lig-on nga sukaranan diin kamo natukod, nga mao ang tinuod nga tukoranan, … diin kon ang mga tawo magtukod dili sila mapukan.”³

Ang pagkauyamot ug walay kataposan nga pagkaalaot nga iyang gihisgotan mao ang makalilisang nga mga epekto sa mga sala kon kita dili hingpit nga maghinulsol niini. Ang nagkadaghan nga mga unos mao ang mga tintasyon ug ang nagkadaghan nga mga pag-atake ni Satanas. Walay ingon ka importante kay sa karon nga makasabot unsaon pagtukod nganha sa tinuod nga tukoranan. Alang kanako, walay laing maayo pa nga dapit sa pagpangita kon dili diha sa kataposang pahayag ni Hari Benjamin, nga nasulat usab diha sa ang Basahon ni Mormon.

Ang propetikanhon nga mga pulong ni Hari Benjamin magamit nato sa atong panahon. Siya nakahibalo gikan sa iyang kaugalingong kasinatian sa kapintas sa gubat. Siya nanalipod sa iyang katawhan sa gubat, nagsalig sa gahom sa Dios. Siya tataw nga nakakita sa mabangis nga mga gahom ni Lucifer nga motintal, nga mosulay sa pagbuntog, ug mopawala sa kadasig sa mga anak sa Dios.

Siya midapit sa iyang katawhan ug kanato nga motukod diha sa bugtong nga tinuod nga lig-on nga sukaranan sa kahilwasan, nga mao ang Manluluwas. Siya miklaro nga gawasnon kita sa pagpili tali sa husto ug sayop ug nga kita dili makalikay sa mga sangpotanan sa atong mga pagpili. Siya misulti nga walay lipudlipod ug maisogon tungod kay siya nahibalo unsa nga kasubo ang moabot ngadto niadtong kinsa dili maminaw ug manumbaling sa iyang mga pasidaan.

Ania og giunsa niya paglarawan ang mga sangpotanan nga mosunod sa atong pagpili kon mosunod ba sa pag-aghat sa Espiritu o mosunod sa daotan nga mga mensahe nga nagagikan ni Satanas, kansang tuyo mao ang pagtintal ug paglaglag kanato:

“Kay tan-awa, adunay kaalaotan nga gitakda diha kaniya kinsa mopili sa pagsunod niana nga [daotan nga] espiritu; kay kon siya mopili pagsunod kaniya, ug nga magpabilin ug magpakamatay diha sa iyang mga kasal-anan, ang mao nag-inom sa panghimaraot sa iyang kaugalingon nga kalag; kay siya midawat alang sa iyang mga suhol og usa ka walay kataposan nga silot, ingon nga nakalapas sa balaod sa Dios supak sa iyang kaugalingon nga kahibalo. …

“Busa kon kana nga tawo dili maghinulsol, ug magpabilin ug mamatay nga kaaway sa Dios, ang mga gipangayo sa balaan nga kaangayan ang makapukaw sa iyang imortal nga kalag ngadto sa usa ka buhi nga salabotan sa iyang kaugalingon nga kasaypanan, diin mao ang mohimo kaniya nga mokulo gikan sa atubangan sa Ginoo, ug mopuno sa iyang dughan uban sa kasubo, ug kasakit, ug tuman nga kaguol, diin nahisama sa usa ka walay pagkapalong nga kalayo, kansang dilaab nagsaka hangtod sa kahangtoran.”

Si Hari Benjamin mipadayon sa pagsulti, “O, tanan kamo nga tigulang nga mga lalaki, ug usab kamo nga batan-on nga mga lalaki, ug kamo nga gagmay nga mga kabataan kinsa makasabot sa akong mga pulong, kay ako nakapamulong sa yano nganha kaninyo nga kamo unta makasabot, ako mag-ampo nga kamo unta mahigmata ngadto sa usa ka panumdoman sa makalilisang nga kahimtang niadto nga nahulog ngadto sa kalapasan.”⁴

Alang kanako, ang gahom niana nga pasidaan sa paghinulsol nakapahunahuna kanako sa segurado nga panahon sa dihang kamo ug ako mobarog sa atubangan sa Manluluwas human niini nga kinabuhi. Kita gusto sa atong tibuok kasingkasing nga dili mokulo apan motan-aw Kaniya, makakita Kaniya nga mopahiyom, ug makadungog Kaniya nga mosulti, “Maayo! Buotan ka ug matinumanon nga sulugoon: … sulod ngari.”⁵

Si Hari Benjamin mipatin-aw unsaon nato nga makadawat sa paglaom sa pagpaminaw niana nga mga pulong kon atong makit-an ang paagi dinhi niining kinabuhia nga ang atong mga kinaiya mausab pinaagi sa Pag-ula ni Jesukristo. Kana maoy bugtong paagi nga kita makatukod diha sa tinuod nga tukoranan ug busa lig-ong mobarog atol sa umaabot nga mga unos sa tintasyon ug mga pagsulay. Si Hari Benjamin mihulagway niana nga kausaban sa atong mga kinaiya gamit ang usa ka matahom nga pasumbingay nga kanunay nga nakatandog sa akong kasingkasing. Kini gigamit sa mga propeta sulod sa liboan ka tuig ug sa Ginoo Mismo. Kini mao nga: kita kinahanglan mahisama sa usa ka bata—usa ka gamay nga bata.

Alang sa uban, kana dili sayon nga dawaton. Kadaghanan kanato gusto nga mahimong kusgan. Tingali atong gikonsiderar nga ang pagkahimong sama sa usa ka bata huyang. Kadaghanan sa mga ginikanan naglantaw alang sa adlaw sa dihang ang ilang mga anak dili na kaayo magbinata. Apan si Hari Benjamin, kinsa nakasabot usab sama ni bisan kinsa nga mortal unsa ang gipasabot nga mahimong usa ka tawo nga may kalig-on ug kaisog, nagpatin-aw nga ang pagkasama sa usa ka bata wala nagpasabot nga magbinata. Kini mao nga mahisama sa Manluluwas, kinsa nag-ampo ngadto sa Iyang Amahan alang sa kalig-on aron makatuman sa kabubut-on sa Iyang Amahan ug mag-ula alang sa mga sala sa tanang anak sa Iyang Amahan ug dayon mibuhat niini. Ang atong mga kinaiya kinahanglan nga mausab aron mahisama sa usa ka bata aron makabaton sa kalig-on nga kinahanglan anaa kita aron lig-on nga makabarog ug magmalinawon atol sa mga panahon sa kalisod.

Ania ang makapadasig nga paghulagway ni Hari Benjamin kon sa unsang paagi kana nga kausaban moabot: “Kay ang kinaiyanhon nga tawo mao ang usa ka kaaway sa Dios, ug sa gihapon gikan pa sa pagkapukan ni Adan, ug mahimo, hangtod sa kahangtoran, gawas kon siya motugyan ngadto sa mga pagdani sa Balaang Espiritu, ug isalikway ang iyang kinaiyanhon nga pagkatawo ug mahimo nga usa ka santos pinaagi sa pag-ula ni Kristo ang Ginoo, ug mahimo nga ingon sa usa ka bata, manunuton, maaghop, mapainubsanon, mapailobon, puno sa gugma, mauyonon sa pagdawat sa tanan nga mga butang diin ang Ginoo makakita nga angay ipahamtang nganha kaniya, bisan ingon sa usa ka bata nga motugyan sa iyang kaugalingon ngadto sa iyang amahan.”⁶

Kita makadawat niana nga kausaban samtang kita mohimo ug mobag-o sa mga pakigsaad ngadto sa Dios. Kana magdala sa gahom sa Pag-ula ni Kristo aron sa pagtugot og kausaban sa atong mga kasingkasing. Kita mahimong mobati niini sa matag higayon nga kita moambit sa sakramento, mohimo og ordinansa sa templo alang sa usa ka mitaliwan nga katigulangan, mopamatuod isip usa ka saksi sa Manluluwas, o moatiman sa usa ka tawo nga nanginahanglan isip usa ka disipulo ni Kristo.

Niana nga mga kasinatian, sa hinay-hinay mahimo kitang sama sa usa ka bata sa atong kapasidad nga mohigugma ug motuman. Kita makabarog diha sa tinuod nga tukoranan. Ang atong hugot nga pagtuo kang Jesukristo modala kanato ngadto sa paghinulsol ug ngadto sa pagsunod sa Iyang mga sugo. Kita motuman, ug kita makabaton og gahom sa pagbatok sa tintasyon, ug kita makabaton sa gisaad nga pakig-uban sa Espiritu Santo.

Ang atong mga kinaiya mausab ngadto sa pagkahimong sama sa usa ka gamay nga bata, masulundon sa Dios ug mas mahigugmaon. Kana nga kausaban mopasarang kanato aron makatagamtam sa mga gasa nga moabot pinaagi sa Espiritu Santo. Ang pagbaton sa pakig-uban sa Espiritu mohupay, mogiya, ug molig-on kanato.

Akong nasabtan ang pipila sa unsay gipasabot ni Hari Benjamin sa dihang miingon siya nga kita pwede nga mahimong sama sa usa ka gamay nga bata sa atubangan sa Dios. Akong nakat-onan gikan sa daghang kasinatian nga ang Espiritu Santo kasagaran mamulong gamit ang usa ka hilom nga tingog, nga labing sayon nga madungog kon ang kasingkasing sa usa ka tawo maaghop ug manunuton, sama niana sa usa ka bata. Sa pagkatinuod, ang pag-ampo nga epektibo mao ang “Ang gusto lang nako mao ang unsay gusto Nimo. Sultihi lang ko kon unsa kana. Buhaton nako kana.”

Kon moabot ang mga unos sa kinabuhi, mahimo kamong lig-on tungod kay nagbarog kamo diha sa lig-on nga sukaranan sa inyong hugot nga pagtuo kang Jesukristo. Kana nga hugot nga pagtuo mogiya kaninyo ngadto sa inadlaw-adlaw nga paghinulsol ug makanunayon nga pagtuman sa pakigsaad. Dayon kamo kanunayng makahinumdom Kaniya. Ug latas sa mga unos sa kasilag ug kadaotan, mobati kamo nga lig-on ug malaomon.

Labaw pa niana, makita ninyo ang inyong kaugalingon nga motabang sa uban sa pagpalig-on sa ilang mga pagpamatuod. Ang hugot nga pagtuo kang Jesukristo kanunayng mosangpot sa mas dako nga paglaom ug sa mga pagbati og gugma nga putli ngadto sa uban, nga mao ang tinuod nga gugma ni Kristo.

Ako mohatag kaninyo sa akong ligdong nga saksi nga ang Ginoong Jesukristo mihatag kaninyo sa pagdapit nga “Duol kamo kanako.”⁷ Siya nagdapit kaninyo, tungod sa gugma alang kaninyo ug alang niadtong inyong gihigugma, nga moduol ngadto Kaniya alang sa kalinaw niini nga kinabuhi ug kinabuhi nga dayon sa umaabot nga kalibotan. Siya hingpit nga nasayod sa mga unos nga inyong atubangon sa inyong pagsulay isip kabahin sa plano sa kalipay.

Ako nangamuyo kaninyo nga dawaton ang pagdapit sa Manluluwas. Sama sa usa ka maaghop ug mahigugmaon nga bata, dawata ang Iyang tabang. Himoa ug tumana ang mga pakigsaad nga Iyang gitanyag diha sa Ang Simbahan ni Jesukristo sa mga Santos sa Ulahing mga Adlaw. Kini molig-on kaninyo. Ang Manluluwas nasayod sa mga unos ug sa mga dapit sa kahilwasan diha sa agianan pauli ngadto Kaniya ug ngadto sa atong Langitnong Amahan. Siya nasayod sa agianan. Siya mao ang Dalan. Sa ingon ako mopamatuod pinaagi sa sagradong ngalan ni Jesukristo, amen.