Mga Importanting Panghitabo sa ika-192 nga Tinuig nga Kinatibuk-ang Komperensiya

Unsa kanindot kini nga panalangin niining mahagitong mga panahon nga makadawat og giya ug tambag gikan ni Ginoong Jesukristo, kinsa mao ang nangulo sa Iyang gipahiuli nga Simbahan pinaagi sa buhing mga propeta ug apostoles.

Atol sa kinatibuk-ang komperensiya, ang Ginoo mihatag og daghang pagdapit pinaagi sa Iyang propeta, si Presidente Russell M. Nelson. Ania ang pipila lang niini:

1. Ipakigbahin ang Gahom ug Kalinaw ni Jesukristo

Si Presidente Nelson mipahinumdom sa mga miyembro bahin sa atong “sagrado nga responsibilidad sa pagpakigbahin sa gahom ug kalinaw ni Jesukristo ngadto sa tanan kinsa maminaw.” Niining mahagitong mga panahon, “matag tawo angayan nga mahibalo asa sila makakaplag sa paglaom ug sa kalinaw nga ‘dili matugkad sa tawo’ [Mga Taga-Filipos 4:7].”

Aron mabasa ang panawagan ni Presidente Nelson alang sa matag takos, makahimo nga batan-ong lalaki sa pagpangandam ug pagserbisyo sa misyon, tan-awa sa “Pagsangyaw sa Ebanghelyo sa Kalinaw” diha sa pahina 6.

2. Pag-ugmad og Positibo nga Kadasig sa Espirituhanong Paglambo

Si Presidente Nelson mitudlo, “Wala kita sukad magkinahanglan og positibo nga espirituhanong paglambo labaw kay sa karon, aron mabatokan ang gipaspason diin ang daotan ug ang nagkangitngit nga mga timailhan sa mga panahon nagkagrabe.”

Pangitaa ang lima ka pihong mga pagdapit gikan ni Presidente Nelson aron madugangan ang atong espirituhanong paglambo diha sa “Ang Gahom sa Kadasig sa Espirituhanong Paglambo” sa pahina 97.

3. Pagpili kon Unsaon Nimo Paggahin sa Imong Oras

Si Presidente Nelson mipasabot nga adunay pipila ka butang nga dili nato makontrolar. “Apan adunay mga butang nga atong makontrolar,” siya miingon, “lakip ang unsaon nato paggahin ang atong oras.”

Basaha ang pagdapit ni Presidente Nelson sa paggahin og panahon sa pagpokus sa mga panalangin sa templo diha sa “Karon Mao ang Panahon” diha sa pahina 126.

Samtang ikaw magtuon ug mobuhat niini nga mga pagdapit, kami modapit nimo sa pagkonsiderar sa pagpakigbahin sa imong kasinatian ngadto sa uban pinaagi sa Liahona.