Mga Balita sa Templo

Sukad sa kataposang komperensiya , ang mga templo gipahinungod o gipahinungod pag-usab, ang mga open house gipahibalo, ug mga groundbreaking gieskedyul sa tibuok kalibotan.

Ang Winnipeg Manitoba Temple (Canada) ug ang Pocatello Idaho Temple (USA) gipahinungod, ug ang Mesa Arizona Temple (USA) gipahinungod pag-usab. Ang mga petsa sa pagpahinungod ug pagpahinungod pag-usab ug ang mga open house gipahibalo alang sa mga templo sa Yigo, Guam; Praia Cape Verde; Rio de Janeiro, Brazil; Washington, D.C., USA; ug Tokyo, Japan.

Nag-groundbreaking alang sa Casper Wyoming Temple (USA), sa Pago Pago American Samoa Temple, sa Bacolod Philippines Temple, ug sa Freetown Sierra Leone Temple. Ang mga groundbreaking gieskedyul alang sa mga templo diha sa mosunod nga mga dapit diha sa USA: Grand Junction, Colorado; Lindon, Utah; Farmington, New Mexico; Elko, Nevada; Burley, Idaho; Yorba Linda, California; ug Smithfield, Utah.

Ang mga dapit gipahibalo, ang mga hinimo sa artist gihatag, alang sa Cape Town South Africa Temple, sa Querétaro Mexico Temple, ug sa Ephraim Utah Temple.

Ang trabaho sa konstruksiyon ug pag-ayo nagpadayon diha sa daghang templo sa tibuok kalibotan, lakip sa pag-ayo sa Salt Lake Temple ug sa mga nataran niini, kauban ang plaza sa Gambalay sa Buhatan sa Simbahan. Ang proyekto mopalambo, mobag-o, ug mopanindot sa templo ug sa mga nataran nga naglibot niini, moilis sa karaan nga mga sistema, ug motubag sa mga problema bahin sa seguridad ug linog.

Ang templo gipalig-on pa aron makabarog sa magnitude 7.2 nga linog; ang pundasyon gipalig-on ug gisuportahan alang sa linog; ang mga elektrikal ug mga tubo gi-update; bag-ong entrada nga mga dapit gitukod; ang guba nga mga konkreto sa plaza giilisan ug ang landscaping giusab aron pakunhoran ang gibug-aton sa yuta diha sa mga estruktura sa nataran; ug ang mga nataran sa templo ug ang plaza sa gambalay sa buhatan usbon ang desinyo aron sa pagmugna og mas abli ug mabiabihon nga palibot. Ang pag-ayo, nga nagsugod niadtong 2020, gieskedyul nga mahuman inigka-2025.

Ang mga pag-ayo magpadayon usab diha sa mga templo sa Hamilton, New Zealand; Hong Kong, China; ug Columbus, Ohio, ug St. George ug Manti, Utah, USA. Alang sa kahimtang sa konstruksyon sa ubang mga templo, tan-awa sa link sa ubos.

Diha sa usa ka sulat ngadto sa mga lider sa Simbahan nga pinetsahan og Marso 15, 2022, ang Unang Kapangulohan mipahibalo nga ang mga templo sa tibuok kalibotan hinayhinay na nga mobalik sa normal nga pagpadagan. Maglakip kini sa pagwagtang sa mga face mask ug mga restriksiyon sa gidaghanon, base sa lokal nga mga kahimtang. Ang pag-implementar alang sa matag templo itino sa mga presidente sa templo ug sa mga Kapangulohan sa Area, nga makigkonsulta sa Departamento sa Templo.