Kinasingkasing ang Tanan

Mga pipila lang ka adlaw sa wala pa Niya gitugyan ang Iyang kinabuhi alang nato, si Jesukristo didto sa templo sa Jerusalem, nagtan-aw sa mga tawo nga mihatag og mga donasyon ngadto sa panudlanan sa templo. “Daghang mga dato ang nanghulog og daghang kuwarta,” apan unya, miabot ang biyudang kabos, “ug mihulog ug duha ka gagmayng salapi.” Tungod kay gamay ra kaayo kini, dili na seguro importante nga ilista pa.

Imahe

Usa ka biyuda nga naghalad og duha ka diyot

Apan kining ingon og dili importante nga donasyon nakakuha sa pagtagad sa Manluluwas. Gani, nakapadani kini Niya pag-ayo nga “gitawag ni Jesus ang iyang mga tinun-an sa pagduol kaniya ug miingon siya kanila, Sa pagkatinuod magaingon ako kaninyo, nga kining kabos nga babayeng balo nakahulog og labaw pa kay sa tanan kanila nga nanagpanghulog ngadto sa panudlanan:

“Kay silang tanan miamot gikan sa ilang naghingapin nga kahamugaway; apan kini siya, gikan sa iyang kapit-os mihatag sa tanan nga diha kaniya, sa tanan nga iyang kabuhian.”¹

Niining yanong obserbasyon, ang Manluluwas mitudlo nato kon giunsa pagsukod ang mga halad diha sa Iyang gingharian—ug kini lahi kaayo gikan sa atong naandang pagsukod sa mga butang. Alang sa Ginoo, ang bili sa donasyon gisukod dili pinaagi sa epekto niini sa panudlanan apan pinaagi sa epekto niini diha sa kasingkasing sa naghatag.

Sa pagdayeg niining matinud-anong biyuda, ang Manluluwas mihatag nato og sumbanan sa pagsukod sa atong pagkadisipulo sa tanang daghan nga mga pagpahayag niini. Si Jesus mitudlo nga ang atong halad mahimong dako o mahimong gamay, apan bisan hain niini, kinahanglan nga kinasingkasing ang tanan.

Kini nga baroganan milanog sa pangamuyo sa propeta sa Basahon ni Mormon nga si Amaleki: “Duol ngadto kang Kristo, kinsa mao ang Usa nga Balaan sa Israel, ug moambit sa iyang kaluwasan, ug sa gahom sa iyang katubsanan. Oo, duol ngadto kaniya, ug ihalad ang inyong tibuok nga mga kalag ingon nga usa ka paghalad ngadto kaniya.”²

Apan sa unsang paagi kini posible? Kadaghanan kanato, mibati nga dili makahatag og tibuok kalag nga pasalig ngadto sa Manluluwas. Daghan na kaayong mga butang ang nagkinahanglan sa atong pagtagad. Unsaon nato sa pagbalanse ang daghan nga kinahanglang tagdon sa kinabuhi uban sa atong mga tinguha sa paghalad sa atong tibuok nga mga kalag ngadto sa Ginoo?

Tingali ang atong hagit mao nga kita naghunahuna nga ang pagbalanse nagpasabot nga angayon sa pagbahin ang atong panahon sa nagkompetensiya nga mga tinguha. Gitan-aw niining paagiha, ang atong pasalig ngadto ni Jesukristo mao ang usa sa daghang butang nga atong ipahaom sa atong bisi nga eskedyol. Apan tingali adunay laing paagi sa pagtan-aw niini.

Ang akong asawa, si Harriet, ug ako ganahang magbiseklita. Maayo kini nga paagi sa pag-ehersisyo samtang naggahin og panahon nga magkauban. Samtang kami nagbiseklita, ug samtang ako wala magpakita nga gikutasan, kami nalingaw sa maanindot nga kalibotan sa among palibot ug gani nag-istorya og nindot. Panagsa ra kaayo mi maghunahuna sa pagbalanse sa among mga biseklita. Kami dugay nang nagbiseklita nga wala na mi maghunahuna bahin niana—nahimo kining normal ug natural alang kanamo.

Apan kon ako makakita og usa ka tawo nga nagkat-on sa pagsakay og biseklita sa unang higayon, makahinumdom ko nga dili sayon ang pagbalanse sa imong kaugalingon niadtong duha ka nigpis nga mga ligid. Kini nagkinahanglan og panahon. Kini nagkinahanglan og pagbansay. Kini nagkinahanglan og pailob. Gani mosangpot kini sa pagkatumba og kausa o kaduha.

Labaw sa tanan, kadtong nagmalamposon sa pagbalanse sa biseklita nakat-on niining importante nga paagi:

Ayaw pagtan-aw sa inyong tiil.

Tan-aw sa unahan.

Ipunting ang inyong panan-aw diha sa dalan sa inyong atubangan. Tutoki ang inyong destinasyon. Ug padayon sa pagsikad. Ang pagpabilin nga balanse mao ang pagpadayon sa unahan.

Susama nga mga baroganan ang magamit bahin sa pagpangita og balanse sa atong kinabuhi isip mga disipulo ni Jesukristo. Ang pagbahin-bahin sa inyong panahon ug kabaskog diha sa inyong daghan nga importanteng mga buluhaton magkalahi sa matag tawo ug magkalahi sa mga panahon sa atong kinabuhi. Apan ang atong komon, kinatibuk-ang tumong mao ang pagsunod sa Pamaagi sa atong Agalon, si Jesukristo, ug sa pagbalik ngadto sa presensya sa atong minahal nga Amahan sa Langit. Kini nga tumong kinahanglan nga magpabilin nga makanunayon, bisan kinsa kita ug bisan unsa pay nanghitabo sa atong mga kinabuhi.³

Karon, alang niadtong mahinamon nga mga seklista, ang pagtandi sa pagkadisipulo ngadto sa pagsakay og biseklita mahimong makatabang nga analohiya. Alang niadtong dili, ayaw kabalaka. Aduna koy laing analohiya nakaseguro ko nga ang matag lalaki, babaye, ug bata makasabot niini.

Ang pagkadisipulo, sama sa kadaghanang butang sa kinabuhi, mahimo usab nga ikatandi sa pagpalupad og eroplano.

Nakahunahuna ba kamo sukad kon unsa ka talagsaon nga ang usa ka dako kaayong jet nga depasahero makahimo sa pagkawan gikan sa yuta ug sa paglupad? Unsa ang nakapahimo niining naglupad nga mga makina nga eleganting molupad sa kapanganoran, tabok sa mga kadagatan ug mga kontinente?

Sa yano, ang usa ka eroplano makalupad lamang kon ang hangin naglihok diha sa mga pako. Kana nga paglihok makahimo sa mga kalainan sa presyur sa hangin nga mopakawan sa eroplano. Ug unsaon nga makakuha kamo og igong hangin nga naglihok diha sa mga pako aron kini makahimo sa pagkawan? Ang tubag mao ang abante nga pagpadagan.

Ang eroplano dili mokawan kon naghunong lang diha sa runway. Bisan sa hanginon nga panahon, ang pagkawan dili mahitabo gawas kon ang eroplano magdagan, uban sa igong gikusgon aron malupig ang puwersa nga nagpugong niini.

Sama nga ang abante nga pagpadagan makapabalanse ug tul-id ang dagan sa biseklita, ang abante nga pagpadagan makatabang sa usa ka eroplano nga mabuntog ang pagbira sa gravity.

Unsa ang kahulogan niini alang kanato isip mga disipulo ni Jesukristo? Kini nagpasabot nga kon kita buot mangita og balanse sa kinabuhi, ug kon kita buot nga ang Manluluwas moalsa nato paingon sa langit, nan ang atong pasalig ngadto Kaniya ug sa Iyang ebanghelyo kinahanglan nga dili kaswal o panagsa ra. Sama sa biyuda sa Jerusalem, kinahanglan nga kita mohalad Kaniya sa atong tibuok nga mga kalag. Tingali ang atong halad gamay ra, apan kinahanglan nga kini gikan sa atong kasingkasing ug kalag.

Ang pagkadisipulo ni Jesukristo dili lang usa sa daghang butang nga atong buhaton. Ang Manluluwas mao ang makapadasig nga gahom luyo sa tanan nga atong buhaton. Dili lang kita mohimo sa espirituwal nga butang sa panahon nga kita walay buhaton. Dili lang buhaton panagsa apan mao ang tanan sa atong kinabuhi. Siya “ang dalan, ang kamatuoran, ug ang kinabuhi: walay makaadto sa Amahan, kon dili moagi ni [Jesukristo].”⁴ Kana mao ang Dalan ug ang atong kataposang destinasyon.

Ang pagbalanse ug pagkawan moabot kon kita “mopadayon uban ang pagkamakanunayon kang Kristo, magbaton sa usa ka hingpit nga kahayag sa paglaom, ug usa ka gugma sa Dios ug sa tanan nga mga tawo.”⁵

Ug unsa kaha ang daghang buluhaton ug mga responsibilidad nga nakapabisi pag-ayo sa atong kinabuhi? Ang paggahin og panahon sa mga minahal, pag-eskwela o pag-andam alang sa trabaho, pagpanginabuhi, pag-atiman sa pamilya, pagserbisyo sa komunidad—asa kaha kining tanan ipahaom? Ang Manluluwas miseguro kanato:

“Ang inyong langitnong Amahan nasayod nga kamo nanginahanglan sa tanan niini nga mga butang.

“Apan pangita una kamo sa gingharian sa Dios ug sa iyang pagkamatarong, ug kining tanan nga mga butang idugang nganha kaninyo.”⁶

Apan kana wala magpasabot nga sayon.⁷ Nagkinahanglan kini og sakripisyo ug pagpahinungod.

Nagkinahanglan kini nga ang pipila ka butang biyaan ug pipila ka laing mga butang gahinan og panahon.

Ang sakripisyo ug pagpahinungod mao ang duha ka langitnong balaod nga atong gisaad nga tumanon diha sa balaan nga templo. Kining duha ka balaod managsama apan dili pareho. Ang pagsakripisyo nagpasabot sa paghunong sa usa ka butang alang sa butang nga mas bililhon. Sa karaan, ang katawhan sa Dios misakripisyo sa ilang panganay sa kahayopan sa pagpahingod sa pag-abot sa Mesiyas. Sa tibuok kasaysayan, ang matinud-anong mga Santos misakripisyo sa personal nga mga tinguha, mga kaharuhay, ug gani sa ilang kinabuhi alang sa Manluluwas.

Kitang tanan adunay mga butang, dagko ug gagmay, nga kinahanglan nga atong isakripisyo aron mas makasunod sa hingpit ni Jesukristo.⁸ Ang atong mga sakripisyo nagpakita kon unsay tinud-anay nga gihatagan nato og bili. Ang mga sakripisyo sagrado ug gipasidunggan sa Manluluwas.⁹

Ang pagpahinungod lahi gikan sa sakripisyo sa dili moubos sa usa ka importante nga paagi. Kon kita mopahinungod og butang, dili nato kini biyaan ug kalimtan. Kondili, gamiton nato kini diha sa pagserbisyo sa Ginoo. Gipahinungod nato kini ngadto Kaniya ug sa Iyang balaan nga mga katuyoan.¹⁰ Kita makadawat sa mga talento nga gihatag sa Ginoo kanato ug maningkamot sa pagpalambo niini, pilopiloon, aron mas makatabang pa sa pagtukod sa gingharian sa Ginoo.¹¹

Gamay ra kaayo nato ang hangyoon sa pagsakripisyo sa atong kinabuhi alang sa Manluluwas. Apan kitang tanan gidapit sa pagpahinungod sa atong kinabuhi ngadto Kaniya.

Samtang maningkamot kita sa paglimpyo sa atong kinabuhi ug pagtan-aw ngadto ni Kristo sa matag hunahuna,¹² ang tanan magsugod sa pagkahan-ay. Ang kinabuhi dili na sama sa usa ka taas nga lista sa managlahi nga paningkamot nga gipahigayon sa makuyaw nga pagbalanse.

Paglabay sa panahon, tanan kini mahimong usa ka buhat.

Usa ka kalipay.

Usa ka balaan nga katuyoan.

Kini mao ang buhat sa paghigugma ug pagserbisyo sa Dios. Kini mao ang paghigugma ug pagserbisyo sa mga anak sa Dios.¹³

Kon motan-aw kita sa atong kinabuhi ug makakita sa gatosan ka buhatonon nga butang, mobati kita nga nabug-atan. Kon kita makakita og usa ka butang—paghigugma ug pagserbisyo sa Dios ug sa Iyang mga anak, sa gatosan ka laing paagi—nan kita makatutok niadtong mga butang uban sa kalipay.

Mao kini ang paagi nga kita makahalad sa atong tibuok kalag—pinaagi sa pagsakripisyo og bisan unsa nga nakapugong nato ug sa pagpahinungod sa uban ngadto sa Ginoo ug sa Iyang mga katuyoan.

Minahal kong mga kaigsoonan ug akong mga higala, dunay mga higayon nga kamo naghandom nga kamo makabuhat og dugang pa. Ang inyong mahigugmaong Amahan sa Langit nasayod sa inyong kasingkasing. Nasayod Siya nga kamo dili makabuhat sa tanan nga gustong buhaton sa inyong kasingkasing. Apan kamo makahigugma ug makaserbisyo sa Dios. Kamo makahimo sa inyong labing maayo sa pagsunod sa Iyang mga sugo. Kamo makahigugma ug makaserbisyo sa Iyang mga anak. Ug ang inyong mga paningkamot naglimpyo sa inyong kasingkasing ug nag-andam kaninyo alang sa mahimayaon nga umaabot.

Mao kini ang nasabtan sa biyuda didto sa panudlanan sa templo. Sigurado nga nasayod siya nga ang iyang halad dili makapausab sa kahimtang sa Israel, apan kini makapausab kaniya—tungod kay, bisan gamay, mao kadto ang tanan.

Mao nga, akong minahal nga mga higala ug minahal nga isig ka disipulo ni Jesukristo, dili kita “magluya sa maayo nga buhat,” kay [kita] “nagpahimutang sa tukoranan sa usa ka mahinungdanon nga buhat.” Ug gikan sa gagmay nga mga butang magagikan ang “mga dagko.”¹⁴

Ako mopamatuod nga kini tinuod, sama nga ako mopamatuod nga si Jesukristo mao ang atong Agalon, ang atong Manunubos, ug ang atong usa ug bugtong nga Dalan balik ngadto sa atong minahal nga Amahan sa Langit. Sa sagradong ngalan ni Jesukristo, amen.