Mga Sister Naglig-on ug Nagserbisyo

Diha sa social media ug sa personal, ang Kinatibuk-ang Kapangulohan sa Relief Society mipadayon sa ilang buhat sa paglig-on sa mga pamilya ug sa mga indibidwal ug pagserbisyo sa mga anak sa Dios sa tibuok kalibotan.

Pagka-Marso 2022, si Presidente Jean B. Bingham namulong mahitungod sa ika-180 nga anibersaryo sa pagkatukod sa Relief Society. Karon, siya miingon, adunay pito ug tunga ka milyon nga mga sister ang naghupay sa nag-antos, nagluwas sa mga kalag, ug nagtuman sa samang mga katuyoan sa pagtukod sa Relief Society niadtong 1842.

Si Presidente Bingham ug Sister Sharon Eubank, Unang Magtatambag sa Kinatibuk-ang Kapangulohan sa Relief Society ug presidente sa Latter-day Saint Charities, mibisita sa pipila ka nasod sa Middle East. Sa Cairo, Egypt, si Presidente Bingham miingon nga nakadayeg siya sa “kamatinud-anon sa gugma sa mga Santos alang sa usag usa.” Si Presidente Bingham ug Sister Eubank mibisita usab sa kampo sa mga mikagiw sa Kurdistan, diin ang Simbahan mihatag sa pagsangkap og kapuy-an.

Si Sister Reyna I. Aburto, Ikaduhang magtatambag, mibisita sa Spain kuyog ni Sister Michelle D. Craig, Unang Magtatambag sa Kinatibuk-ang Kapangulohan sa Young Women. “Ang kalinaw sa Dios molahutay ug mas mopatigbabaw sa tanan nga daotan diha sa kalibotan,” si Sister Aburto miingon sa usa ka debosyonal alang sa kabataan ug kabatan-onan.

Gamit ang social media, ang Kinatibuk-ang Kapangulohan sa Relief Society nag-post og mga mensahe mahitungod sa nutrisyon, kaayohan, ug kahimsog sa mga bata, nakigtambayayong sa Welfare and Self-Reliance Services sa Simbahan aron maabot ang mensahe ngadto sa mga ginikanan mahitungod sa benepisyo sa pagpanghugas sa kamot, limpyo nga tubig nga mainom, mga pagpili og makahimsog nga mga pagkaon, pagpasuso, pagpabakuna, pagpanglimpyo, ug mga pagbisita sa klinika.

Ang kapangulohan miawhag usab sa mga sister sa pagpaambit sa ilang mga pagbati mahitungod sa unsay makapadasig nila nga moapil gayod sa Relief Society ug mahitungod kon unsaon paghimo sa Relief Society nga mas malakipon ug matinabangon.