Elder Ryan K. Olsen

Sa dihang si Elder Ryan K. Olsen nagdako sa Sandy, Utah, USA, ang iyang mga ginikanan dili gayod motugot niya nga mobiya sa balay nga wala kining makahuloganong pahinumdom: “Hinumdomi kon kinsa ka.”

“Makalagot kini niadtong batan-on pa ko,” siya miingon, nga nagkatawa. “Apan kadto nga mga pulong nakatabang kanako nga hinumdoman ang akong balaanong kailhanan. Kini nakatabang nako nga hinumdoman nga ako adunay Langitnong Amahan nga nahigugma nako ug nga ang akong Manluluwas mao ang akong suod nga higala. Ang tanan nga atong gilaoman nga buhaton o kab-oton mahimo lamang pinaagi Kaniya.”

Kanang makahupay nga kailhanan sa kaugalingon ug ang mga ehemplo sa iyang mga ginikanan, kauban nga mga misyonaryo, mga kaubanan sa Simbahan, ug maalamon nga mga magtutudlo sa negosyo mao ang bililhong mga himan nga gamiton ni Elder Olsen samtang siya magsugod sa iyang pagserbisyo isip Kinatibuk-ang Awtoridad nga Seventy.

Natawo niadtong Oktubre 11, 1974, ug nagdako sa Salt Lake Valley sa Utah, si Ryan Kirk Olsen mao ang anak ni Kirk ug Cathy Olsen.

Ang gugma ni Elder Olsen alang sa Latin America ug sa pinulongan nga Kinatsila naumol sa dihang nagserbisyo siya isip full-time nga misyonaryo sa Argentina Resistencia Mission. Sa kaulahian, siya ug ang iyang asawa, si Julie Dorrington Olsen, magkaubang nagserbisyo sa dihang nagdumala siya sa Uruguay Montevideo West Mission gikan sa 2016 ngadto sa 2019.

Siya ug si Sister Olsen naminyo niadtong Nobyembre 20, 1998, sa Salt Lake Temple. Mga ginikanan sila sa upat ka anak.

Sa panahon sa iyang pagkatawag isip Kinatibuk-ang Awtoridad nga Seventy, si Elder Olsen nagserbisyo isip Area Seventy. Nakaserbisyo usab siya isip presidente sa stake, presidente sa misyon sa stake, high councilor, bishop, magtatambag sa bishopric, ug magtatambag sa kapangulohan sa Young Men sa ward.

Si Elder Olsen nakabaton og degree sa mass communications sa University of Utah ug nagtrabaho sa nagkalainlaing natad sa negosyo. Siya nahimong area president alang sa Arthur J. Gallagher & Co., usa ka global insurance firm, hangtod nga siya natawag isip presidente sa misyon. Sa panahon sa iyang pagkatawag sa Seventy, nagtrabaho siya isip area senior vice president alang niana nga kompanya.