Elder Mark D. Eddy

Sa ting-init sa wala pa ang tuig sa senior high school ni Elder Mark D. Eddy, ang magtutudlo sa seminary midapit niya ug sa ubang mga sakop sa konseho sa mga estudyante sa ilang seminary nga mobasa sa Basahon ni Mormon. Siya nakabasa na niini sa daghang higayon uban sa iyang pamilya, apan unang higayon kadto nga siya ra.

Siya nakahukom nga mag-ampo sa dili pa magbasa ug inighuman sa pagbasa matag adlaw. Siya nanghinaot nga ang klaro nga tubag kalabot sa kamatuoran sa basahon moabot sulod sa usa o duha ka semana. Human sa pagbasa sulod sa sobra sa duha ka bulan, wala pa gihapon niya madawat ang iyang gipaabot nga pagkompirmar.

Mga oras sa wala pa ang “maayong pagbalik” nga debosyonal sa seminary diin siya gihangyo nga mohatag sa iyang pagpamatuod, si Elder Eddy miabot og sayo aron motabang sa pagpahimutang. Dayon nangita siya og hilom nga lugar aron mobasa sa Basahon ni Mormon ug mag-ampo.

“Dayon akong nadawat kanang klaro ug dili masaypan nga pagbati nga kini tinuod,” siya miingon. “Kini miabot gayod sa saktong panahon aron ako makahatag sa akong pagpamatuod nianang gabhiona. Ang pagbati nagkinahanglan og igong buhat aron madawat ug milungtad og igong kadugayon aron dili gayod nako malimtan.”

Si Elder Mark David Eddy natawo sa Long Beach, California, USA, niadtong Marso 30, 1973, ngadto nila ni Richard Cleighton Eddy ug Mary Louise Savage Eddy. Nagdako siya sa Orem, Utah, ug naminyo ni Annette “Annie” Allen sa Provo Utah Temple niadtong Agosto 1994. Sila adunay unom ka anak.

Si Elder Eddy migradwar sa Brigham Young University niadtong 1996 sa bachelor’s degree in communications ug nakadawat og Juris Doctor degree sa BYU niadtong 2001. Sukad pa kaniadto nagtrabaho siya isip abogado ug business executive.

Si Elder Eddy nakaserbisyo isip Area Seventy, presidente sa Uruguay Montevideo Mission, magtatambag sa kapangulohan sa stake, bishop, high councilor, magtatambag sa bishopric, presidente sa Young Men sa ward, ug full-time nga misyonaryo sa Dominican Republic Santo Domingo East Mission.