Kristin M. Yee

Ikaduhang Magtatambag sa Kinatibuk-ang Kapangulohan sa Relief Society

Sa kalibotan nga nagkadaghan ang panagbahin ug pag-iyahay, si Sister Kristin M. Yee nakakita og mga pamaagi nga matambalan ang mga sakit sa katilingban pinaagi sa ebanghelyo ni Jesukristo ug sa Relief Society.

“Ang Relief Society mohiusa nato ubos Kaniya,” siya miingon. “Bisan asa ko mobiyahe sa kalibotan, mangita ko sa akong mga sister sa Relief Society, ug dihadiha dayon mobati nga gihigugma ug managkaila. Sila adunay pagkaparehas bahin ni Kristo ug sa atong mga pagpamatuod Kaniya.”

Si Sister Yee, kinsa nagserbisyo sa Primary general advisory council, mihangop sa iyang bag-ong calling isip Ikaduhang Magtatambag sa Kinatibuk-ang Kapangulohan sa Relief Society uban sa kasiguroan nga siya wala mag-inusara sa pagtrabaho.

“Ang Ginoo ang nagdumala, ug ako misalig Kaniya,” siya miingon. “Ako mibati usab nga kita nagkinahanglan sa tanan diha sa Iyang trabaho. Kitang tanan adunay tahas nga angayng himoon, ug kita mahimong kabahin niini nga buhat. Ako mapasalamaton alang sa oportunidad sa pagserbisyo.”

Si Kristin Mae Yee natawo niadtong Mayo 5, 1981, sa Sacramento, California, USA, ngadto nila ni Ryan R. Yee ug Jaydean Fox McKay. Sa kaulahian mibalhin siya ngadto sa Idaho, USA, ug dayon ngadto sa Utah.

Iyang nadiskobrehan sa pagkabata ang hilig ug talento sa art, nga mao ang naggiya sa iyang dalan sa edukasyon ug sa propesyon. Siya naghupot og undergraduate degrees sa fine arts sa Brigham Young University–Idaho ug Brigham Young University. Niadtong 2019 nakabaton siya og master of public administration sa BYU.

Ang mga kahanas sa art ni Sister Yee ug ang iyang pagpokus midala niya ngadto sa posisyon isip artist ug producer sa Disney Interactive Studios, diin nagtrabaho siya sulod sa 13 ka tuig. Siya ang nagdumala karon sa animation team sa Simbahan. Ang iyang mga dibuho nga ang tema bahin sa ebanghelyo naglakip sa mga hulagway sa mortal nga pangalagad sa Manluluwas.

Si Sister Yee nakaserbisyo og daghang calling sa Simbahan, lakip na isip presidente sa Relief Society sa stake, magtatambag sa kapangulohan ug magtutudlo sa Relief Society sa ward, presidente sa Young Women sa ward, magtutudlo sa Doktrina sa Ebanghelyo, ward missionary, ug ordinance worker sa templo.