Tracy Y. Browning

Si Tracy Y. Browning mga 15 anyos sa dihang ang iyang inahan nakakita sa pahinumdom bahin sa Basahon ni Mormon sa gabii na kaayo nga infomercial sa telebisyon ug nangayo og libre nga kopya.

Sulod sa mubo nga panahon, ang mga Santos sa Ulahing mga Adlaw nga mga misyonaryo nanuktok sa iyang pultahan, mihatag sa Basahon ni Mormon, ug misugod sa pagtudlo niya sa ebanghelyo ni Jesukristo.

Nianang higayona, si Tracy nagpuyo sa New Jersey, USA, uban sa iyang amahan, apan kanunay siya nga mobisita sa iyang inahan sa New York, USA. Sa pagbisita, si Tracy nakaobserbar uban sa kakuryoso samtang ang iyang inahan nag-uswag paingon sa bunyag.

Kuyog sa iyang lola, si Tracy mitambong sa usa ka Kristohanon nga Simbahan, diin siya nakakat-on og pangpundasyon nga Kristohanon nga mga tinuohan. Wala madugay si Tracy misugod sa pagtambong sa Dominggo nga mga tulumanon sa mga Santos sa Ulahing mga Adlaw sa pagsimba kuyog sa iyang inahan.

Ang labing nindot nga kasinatian miabot sa dihang ang inahan ug ang anak mitambong sa Hill Cumorah Pageant. Ang pagbarog diha sa Sagrado nga Kakahoyan, pagtambong sa simbahan, ug pagpaminaw sa mga mensahe sa ebanghelyo diha sa bag-ong mga paagi mao ang nakapatandog niya. Si Tracy miingon sa iyang inahan nga siya andam na sa pagkat-on pa og dugang mahitungod sa Simbahan.

“Gipaatubang dayon ko niya sa mga misyonaryo human niana,” si Sister Browning miingon.

Si Tracy Yeulande Browning natawo sa New Rochelle, New York, niadtong Oktubre 9, 1976, ngadto ni Clive Adams ug Sharon Cox. Nagdako siya sa Jamaica, New Jersey, ug New York. Naminyo siya ni Brady Browning sa Salt Lake Temple niadtong Mayo 2, 1997. Sila adunay duha ka anak.

Si Sister Browning nag-eskwela sa St. John’s University. Nagtrabaho siya sa pinansyal nga mga pagserbisyo sulod sa 15 ka tuig ug karon usa ka direktor sa Publishing Services Department sa Simbahan. Si Sister Browning miboluntaryo usab sa National Multiple Sclerosis Society, Habitat for Humanity, ug sa United Way’s Day of Caring.

Si Sister Browning nakaserbisyo isip magtambag sa kapangulohan sa Relief Society sa ward ug stake, isip magtutudlo sa Relief Society ug Sunday School, ug diha sa organisasyon sa Young Women. Siya nagserbisyo diha sa Relief Society general advisory council sa dihang gitawag siya ngadto sa Kinatibuk-ang Kapangulohan sa Primary.