Maisogon nga Pagkadisipulo sa Ulahing mga Adlaw

Ang moral nga kabubut-on usa ka bililhon nga gasa sa Dios sa matag usa sa Iyang mga anak.¹ Kita “gawasnon sa pagpili sa kalingkawasan ug sa kinabuhi nga dayon, pinaagi sa halangdon nga Tigpataliwala sa tanan nga mga tawo, o pagpili sa pagkabihag ug sa kamatayon, sumala sa pagkabihag ug sa gahom sa yawa.”² Ang Dios dili mopugos kanato sa pagbuhat og maayo, ug ang yawa dili makapugos kanato sa pagbuhat og daotan.³ Bisan kon ang uban maghunahuna nga ang mortalidad usa ka panagsangka tali sa Dios ug sa kaaway, usa ka pulong gikan sa Manluluwas “ug si Satanas mahilom ug mapapahawa. … Ang [atong] kalig-on mao ang gisulayan—dili ang sa Dios.”⁴

Sa kataposan kita hinuon moani sa unsa ang gipugas sa atong tibuok kinabuhi nga mga pagpili.⁵ Mao nga unsa ang gipakita sa katingbanan sa atong mga hunahuna, mga tinguha, mga pulong, ug mga buhat mahitungod sa atong gugma alang sa Manluluwas, sa Iyang pinili nga mga sulugoon, ug sa Iyang gipahiuli nga Simbahan? Ang atong mga pakigsaad sa bunyag, sa pagkapari, ug sa templo mas mahinungdanon ba kanato kaysa pagdayeg sa kalibotan o sa gidaghanon sa “likes” sa social media? Ang atong gugma sa Ginoo ug sa Iyang mga sugo mas lig-on ba kaysa atong gugma alang sa bisan unsa o bisan kinsa pa dinhi niini nga kinabuhi?

Ang kaaway ug ang iyang mga sumusunod kanunay nga nagtinguha sa pagguba sa mga buhat ni Kristo ug sa Iyang mga propeta. Ang mga sugo sa Manluluwas, kon dili dungan nga gibaliwala, gipangatarongan nga walay kahulogan sa daghan dinhi sa kalibotan karon. Ang mga mensahero sa Dios kinsa nagtudlo sa “dili komportable” nga mga kamatuoran sa kasagaran gibaliwala. Bisan gani ang Manluluwas Mismo gitawag og “hangol siya sa pagkaon ug palahubog,”⁶ gipasanginlan nga mipaukyab sa sentimento sa publiko ug usa ka manggugubot. Huyang ug malipoton nga mga tawo “nagsabot sa pagbitik [kaniya] pinaagi sa iyang isulti,”⁷ ug ang Iyang “pundok” sa nag-una nga mga Kristiyano “ginasupak … bisan diin.”⁸

Ang Manluluwas ug ang Iyang nag-unang mga sumusunod miatubang og seryoso nga oposisyon sa sulod ug sa gawas, ug kita nakasinati gihapon niini. Karon hapit imposible ang maisogon nga pagpuyo sa atong hugot nga pagtuo nga dili usahay makadani og pipila ka aktuwal ug birtuwal nga mabiay-biayong pagtulisok sa mga tudlo gikan sa mga tawo nga kalibotanon. Ang masaligon nga pagsunod sa Manluluwas magantihon, apan usahay kita maoy gipuntarya niadtong nagpaluyo sa “kaon, inom, ug paglipay”⁹ nga pilosopiya, diin ang hugot nga pagtuo diha ni Kristo, pagtuman, ug paghinulsol giilisan sa ilusyon nga ang Dios mohatag og kaangayan diha sa pagbuhat og usa ka gamay nga sala tungod kay Siya nahigugma kaayo kanato.

Nagsulti “pinaagi sa [Iyang] kaugalingon nga tingog o pinaagi sa tingog sa [Iyang] mga suluguon,”¹⁰ ang Manluluwas wala ba magsulti mahitungod sa atong mga adlaw nga “moabot ang panahon nga ang mga tawo dili na mamati sa matuod nga pagtulon-an. Ang ila na hinuong gusto mao na lang ang ilang sundon ug magtawag silag daghang mga magtutudlo” ug daghan ang “dili na [sila] mamati sa kamatuoran kon dili sa mga tinumotumo nga mga sugilanon”?¹¹ Wala ba Siya motuaw nga “walay kapuslanan ang ilang pagsimba kanako, kay ilang gitudlo ingon nga balaod sa Dios ang mga sugo nga hinimo lamang sa tawo”?¹² Wala ba Siya magpasidaan nga “may pipila unya ka mga tawo diha sa inyong pundok nga manudlo og bakak aron pagdani sa mga magtutuo sa pagsunod kanila”?¹³ Wala ba Siya makapanglantaw nga ang “daotan [tawagon] nga maayo ug [ang] maayo nga daotan,”¹⁴ ug nga “ang labing ngil-ad nga kaaway sa tawo mao ra unya ang mga sakop sa iyang kaugalingong panimalay”?¹⁵

Unya kita kaha? Kinahanglan ba kita nga magpahadlok o mahadlok? Kinahanglan ba nga magpuyo sa atong relihiyon sa paagi nga dili lang mabantayan sa uban? Dili gayod! Uban sa hugot nga pagtuo diha ni Kristo, dili ta kinahanglan nga mahadlok sa pagbadlong sa mga tawo o mahadlok sa ilang mga pagbiay-biay.¹⁶ Uban sa Manluluwas nga maoy nagdumala ug buhi nga mga propeta nga nangulo ug naggiya kanato, “kinsay makigbatok kanato”?¹⁷ Magmasaligon kita, dili magmabasolon, maisogon, dili maulawon, matinud-anon, dili magmahadlokon samtang atong ipakita ang kahayag sa Ginoo niining kataposan nga mga adlaw.¹⁸

Ang Manluluwas miklaro nga “ang moila ug moangkon kanako atubangan sa mga tawo, angkonon ko usab atubangan sa akong Amahan. … Apan ang dili moangkon nga siya akoa, dili ko usab angkonon atubangan sa akong Amahan didto sa langit.”¹⁹

Tungod niini, samtang ang uban mas ganahan og usa ka Dios kinsa moabot nga walay mga sugo, magmaisogon kita nga mopamatuod sa mga pulong ni Elder D. Todd Christofferson nga “ang Dios nga dili mobungat sa mga tawo sama ra gayod nga walay Dios.”²⁰

Samtang ang uban mas gusto mopili lamang sa mga sugo nga ilang sundon, magmalipayon kitang modawat sa pagdapit sa Manluluwas nga “mopuyo sa matag pulong nga mogawas gikan sa ba-ba sa Dios.”²¹

Samtang daghan ang nagtuo nga ang Ginoo ug ang Iyang Simbahan motugot sa pagbuhat sa “bisan unsa nga gipangandoy sa [atong] kasingkasing,”²² magmaisogon kitang mopahayag nga sayop ang “pagpahiuyon sa kadaghanan sa pagbuhat og daotan,”²³ tungod kay “ang kadaghanan dili makapahimong husto sa unsa ang gipahayag sa Dios nga sayop.”²⁴

“O hinumdomi, hinumdomi … unsa ka higpit [apan makapagawasnon] ang mga sugo sa Dios.”²⁵ Ang pagtudlo kanila usahay mahimong makita nga usa ka buhat sa dili pagkamatugtanon. Busa kita matinahoron nga mopakita nga dili lamang kini posible apan gikinahanglan nga higugmaon ang anak sa Dios kinsa mohangop sa mga tinuohan nga lahi gikan sa atong kaugalingon.

Mahimo kitang modawat ug morespeto sa uban nga dili motuboy sa ilang mga tinuohan o mga buhat nga wala mahisubay sa kabubut-on sa Ginoo. Dili kinahanglan nga isakripisyo ang kamatuoran aron lamang mauyonan ug magustohan sa katilingban.

Ang Zion ug ang Babilonia dili magkauyon. “Walay bisan kinsa nga arang makaalagad sa duha ka agalon,”²⁶ Atong hinumdoman ang makapahinuklog nga pangutana sa Manluluwas, “Nganong nagtawag man kamo kanakog, Ginoo, Ginoo, nga dili man kamo mobuhat sa akong gisugo kaninyo?”²⁷

Atong ipakita ang atong gugma alang sa Ginoo pinaagi sa atong tibuok kasingkasing, boluntaryo nga pagkamasulondon.

Kon inyong gibati nga naglibog tali sa inyong pagkadisipulo ug sa kalibotan, palihog hinumdomi nga ang inyong mahigugmaon nga Manluluwas “nagpadala og usa ka pagdapit … , kay ang mga bukton sa kalooy gitunol [nganha kaninyo], ug siya miingon: Paghinulsol, ug Ako modawat kaninyo.”²⁸

Si Presidente Russell M. Nelson mitudlo nga si Jesukristo “mohimo sa uban Niyang labing gamhanan nga mga buhat karon ug sa higayon nga Siya moanhi na pag-usab.”²⁹ Apan siya usab mitudlo nga “kadtong mopili sa dalan sa Ginoo mahimong makalahutay sa pagpanglutos.”³⁰ Ang “giisip nga [sila] angayan diayng pakaulawan tungod sa iyang ngalan”³¹ usahay mahimong atong sagubangon samtang atong “tugotan ang Iyang tingog nga maoy prayoridad kay sa bisan unsa pang uban.”³²

“Bulahan kadtong,” ang Manluluwas miingon, “wala magduhaduha kanako.”³³ Sa laing dapit atong makat-onan nga “malinawon kaayo ang nagmahal sa imong balaod, ug walay makapukan kanila.”³⁴ Wala! Mao nga atong pangutan-on ang atong kaugalingon, “Molahutay ba ako sa makadiyot, apan inig-abot sa kasakitan o pagpanglutos tungod sa pulong, mobiya ba dayon ako?³⁵ Natukod ba ako sa bato ni Jesukristo ug sa Iyang mga sulugoon?”

Ang moral nga mga relatibista nagtuboy nga ang kamatuoran usa lamang ka ideya nga hinimo og gidawat sa katilingban, nga walay moral nga mga sumbanan. Ang ila gayong gipasabot nga walay sala,³⁶ nga “bisan unsa ang buhaton sa tawo dili kalapasan,”³⁷ usa ka pilosopiya nga mapasigarbuhon nga giangkon sa kaaway! Busa magmatngon kita sa mga karnero apan ang tinuod sama sila sa bangis nga mga lobo nga kanunay nagdani ug “[kasagaran mogamit] sa ilang kinaadman sa pagtabon sa ilang [kaugalingong] mga kalapasan.”³⁸

Kon gusto gayod kita nga mahimong maisogon nga mga disipulo ni Kristo, makakita kita og paagi. Kon dili, ang kaaway motanyag og makapadani nga mga alternatibo. Apan isip matinud-anon nga mga disipulo, “dili kita kinahanglan mangayo og pasaylo tungod sa atong mga pagtuo o moatras gikan niadtong atong nahibaloan nga tinuod.”³⁹

Sa pagtapos, usa ka pulong bahin sa 15 ka sulugoon sa Dios nga naglingkod sa akong luyo. Samtang ang mga kalibotanon “[mo]ingon sa mga mananagna, Ayaw pangitag panan-awon; ug ngadto sa mga propeta, Ayaw kamig sultihi unsay matarong,”⁴⁰ ang matinud-anon “pagakoronahan uban sa mga panalangin nga gikan sa kahitas-an, oo, ug uban sa daghan nga mga sugo, ug uban sa mga pagpadayag diha sa ilang panahon.”⁴¹

Dili ikahibulong, kini nga mga tawo kanunay nga mahimong duolonon niadtong dili malipayon sa pulong sa Dios sama sa gipahayag sa mga propeta. Kadtong mosalikway sa mga propeta wala makaamgo nga “walay bisan kinsa nga makasaysay sa kahulogan sa mga propesiya sa kasulatan pinaagi sa iyang kaugalingong panabot” o gumikan sa pagbuot sa tawo, “[apan nga ang] Espiritu Santo maoy nagmando sa ilang pagsulti sa mensahe nga gikan sa Dios.”⁴²

Sama ni Pablo, kini nga katawhan sa Dios “[dili] … [ma]ulaw sa pagsaksi alang sa atong Ginoo” ug sa Iyang “[mga] binilanggo”⁴³ niini nga diwa nga ang doktrina nga ilang gitudlo dili ilaha apan Kaniya nga nagtawag kanila. Sama ni Pedro, sila “dili makapugong pagsulti sa [ila] gayong nakita ug nadungog.”⁴⁴ Ako mopamatuod nga ang Unang Kapangulohan ug ang Korum sa Napulog Duha maayo ug matinud-anon nga mga tawo kinsa nahigugma sa Dios ug sa Iyang mga anak ug kinsa gihigugma Niya. Ang ilang mga pulong kinahanglan natong dawaton sama nga kini gikan sa kaugalingon nga ba-ba sa Ginoo “sa tanan nga pagpailob ug hugot nga pagtuo. Kay pinaagi sa pagbuhat niini nga mga butang ang mga ganghaan sa impyerno dili makabuntog batok [kanato]; … ug ang Ginoong Dios mopatibulaag sa mga gahom sa kangitngit gikan sa [atong] atubangan.”⁴⁵

“Walay dili balaan nga kamot ang makapugong sa buhat sa paglambo”;⁴⁶ magpadayon kini nga magmadaogon anaa o wala man kamo o ako, mao nga “pagpili karong adlawa kon kinsay alagaran ninyo.”⁴⁷ Ayaw pailad o pagpahadlok sa lanog nga mga pagsaba-saba sa kaatbang nga naggikan sa dako ug lapad nga gambalay. Ang ilang desperado nga kalangas dili makalupig sa malinawon nga impluwensiya sa ligdong, hinagawhaw nga tingog sa masulub-on nga kasingkasing ug mahinulsulon nga mga espiritu.

Ako nagpamatuod nga si Kristo buhi, nga Siya mao ang atong Manluluwas ug Manunubos, ug nga Siya ang nangulo sa Iyang Simbahan pinaagi sa Unang Kapangulohan ug sa Korum sa Napulog Duha ka Apostoles, sa ingon nagpaniguro nga kita dili “maanod-anod sa mga balod ug mapadpad ngadto-nganhi sa nagbalibali nga hangin sa pagtulon-an.”⁴⁸

“Ang tinuod nga mga disipulo ni Jesukristo,” si Presidente Nelson mitudlo, “andam nga magpabantang, motingog, ug magpalahi gikan sa mga tawo sa kalibotan. Sila walay kahadlok, maunongon, ug maisogon.”⁴⁹

Mga kaigsoonan, maayo karong adlawa nga mahimong maayo! Sa sagradong ngalan ni Jesukristo, amen.