Ang Simbahan Naghatag og Tabang, Kahupayan

Sa tibuok kalibotan, ang mga Santos sa Ulahing mga Adlaw aktibong miapil sa mga paningkamot sa kahupayan alang sa mga mikagiw [refugees]. Sa Europe, sila nagtinabangay sa paghatag og pagkaon, sinina, mga gamit sa masuso, kapuy-an, ug uban pa aron matabangan ang mga gipalayas. Ang Simbahan bag-ohay lang midonar og $2 ka milyon nga US nga dolyar ngadto sa United Nations High Commissioner for Refugees ug laing $2 ka milyon nga US nga dolyar ngadto sa World Food Programme. Ang mga donasyon motabang sa WFP sa paghatag og pagkaon alang sa mga 11,000 nga katawhan sulod sa upat ka bulan.

“Kita adunay mga miyembro diha sa tanang nasod nga naapektohan,” miingon si Sister Sharon Eubank, Unang Magtatambag sa Kinatibuk-ang Kapangulohan sa Relief Society ug presidente sa Latter-day Saint Charities. Tungod kay ang Simbahan nagtipig og reserba nga pundo, kini adunay nabutang nang daan nga mga pagkaon ug tubig sa wala pa ang krisis didto sa Ukraine, siya miingon, nagpasabot nga ang Simbahan mapasaligon ngadto sa taas og termino nga mga panginahanglan sa naapektohan nga mga nasod.

Sa Paraguay ug Peru, ang mga pundo sa Simbahan nakatabang sa paghatag og medikal nga mga ekipo alang sa mga ospital, ug sa Peru ang Simbahan nagpadala og mga electric fan, mga suga, mga gamit sa balay, mga lingkoranan, appliances, ug pito ka laptop nga computer ngadto sa mga organisasyon nga nagserbisyo sa mga bata ug mga tigulang, konseho sa lainlaing relihiyon, ug puy-anan sa mga batang babaye. Sa Colombia, ang halad sa puasa nga pundo gigamit sa paghatag og 1,200 ka kahon sa pagkaon ug mga suplay niadtong nanginahanglan. Sa Panama, ang Simbahan midonar og ekipo aron sa pagtabang nga mapreserbar ang mga bakuna alang sa COVID-19.

Ang mga tawo sa 10 ka siyudad sa Estados Unidos mibisita sa Light the World Giving Machine panahon sa Pasko sa 2021, nga nagdonar og $5.8 ka milyon nga US nga dolyar. Ang mga machine motugot sa usa ka tawo sa pagpalit og mga aytem (sama sa sinina, pagkaon, limpyong tubig, ug buhi nga mga hayop) nga sa dili madugay iapud-apod pinaagi sa 44 ka charity sa Estados Unidos ingon man sa lima ka ahensiya sa tibuok kalibotan.

Ang Simbahan mitabang usab niadtong naapektohan sa mga alimpolos didto sa tunga-tungang habagatan sa Estados Unidos, sa bagyo sa Pilipinas, ug pag-ulbo sa bulkan ug tsunami sa Tonga.