Elder James W. McConkie III

Sa dihang si Elder James W. McConkie III miabot sa Czechoslovakia niadtong 1990 isip usa ka batan-ong misyonaryo, ang nasod nahaw-as na gikan sa komunismo ug andam na nga mosugod sa pagsinati pag-usab og relihiyoso nga pagpahayag ug hugot nga pagtuo. “Ako anaa sa tukma nga dapit sa tukma nga panahon uban sa tukma nga katawhan,” miingon siya.

Siya sa kaulahian mibalik didto sa lugar isip usa ka batan-ong propesyonal, kaubang nagtukod og usa ka dili pangnegosyo nga foundation, ug dayon miserbisyo isip presidente sa Czech/Slovak Mission.

Sa dihang nag-edad siya og 12, ang iyang mga ginikanan midapit niya sa pagtuon sa mga libro sa mga lider sa Simbahan ug dayon hisgotan unsay iyang nabasa. “Ang akong papa ug mama nagtuo sa kaimportante sa pagtudlo sa ilang mga anak sa ebanghelyo, sama sa gisugyot diha sa Doktrina ug mga Pakigsaad,” miingon si Elder McConkie. “Ang Seksiyon 68 nagdapit sa mga ginikanan sa pagtudlo sa ilang mga anak sa ‘doktrina sa paghinulsol’ ug ‘hugot nga pagtuo diha ni Kristo’ (bersikulo 25). Ang akong mga ginikanan mihimo gayod niana.”

Ang iyang tinguha alang sa gahom sa ebanghelyo sa pag-usab sa mga tawo nahipatik sa iyang kalag. Mao usab kana ang iyang nakita nga nahitabo sa mga Santos sa Czech Republic ug Slovakia.

Si Elder James Wilson McConkie III natawo sa Siyudad sa Salt Lake, Utah, USA, niadtong Agosto 27, 1971, ngadto nila ni James Wilson McConkie II ug Judith Miller McConkie. Naminyo siya ni Laurel Springer niadtong Hulyo 1995 sa Salt Lake Temple. Sila adunay upat ka anak.

Si Elder McConkie migradwar sa University of Utah sa bachelor’s degree sa history niadtong 1995 ug nakabaton og law degree niadtong 1999 sa National Law Center sa George Washington University. Bag-ohay lang nagtrabaho siya isip abogado sa Workman Nydegger ug direktor sa Wallace Toronto Foundation, nga usa siya sa nagtukod.

Si Elder McConkie nagserbisyo isip presidente sa stake sa dihang gitawag siya. Siya nakaserbisyo usab isip bishop, high councilor, magtatambag sa bishopric, ward mission leader, magtatambag sa kapangulohan sa korum sa mga elder, magtutudlo sa pagpangandam sa misyon, magtutudlo sa Doktrina sa Ebanghelyo, ug presidente sa Young Men sa ward.