Ang Inyong Diosnong Kinaiya ug Mahangtorong Padulngan

Minahal nga mga sister, salamat sa pag-anhi. Akong dungog nga makaapil niining sesyon sa mga babaye sa kinatibuk-ang komperensiya. Dihay higayon nga ako nakapribilehiyo sa pagtambong og mga klase sa Young Women. Apan tugoti ko nga isulti ang klaro kaayo—ako dili batan-on, ug ako dili usa ka babaye! Hinoon, akong nahibaloan, nga wala kaayo ko mobati nga wala sa lugar kon ako makasag-ulo sa tema sa Young Women apil sa mga batan-ong babaye. Ang mahinungdanong doktrina gitudlo diha sa tema sa Young Women¹ importante alang sa mga batan-ong babaye, apan magamit kini sa tanan, lakip kanamo nga dili mga batan-ong babaye.

Ang tema sa Young Women gisugdan og, “Ako usa ka hinigugmang anak nga babaye sa langitnong mga ginikanan, nga adunay diosnong kinaiya ug mahangtorong padulngan.”² Kini nga pamahayag naglangkob og upat ka importante nga kamatuoran. Una, ikaw hinigugmang anak nga babaye. Walay butang nga buhaton nimo—o dili buhaton—ang makausab niana. Gimahal ka sa Dios tungod kay ikaw Iyang espiritu nga anak nga babaye. Usahay kita mahimong dili mobati sa Iyang gugma, apan anaa kini sa kanunay. Ang gugma sa Dios hingpit.³ Ang atong abilidad sa pagbati niana nga gugma ang dili hingpit.

Ang Espiritu mao ang mahinungdanong bahin sa komunikasyon sa gugma sa Dios ngari kanato.⁴ Apan ang impluwensiya sa Espiritu Santo mahimong “masapawan sa kusog nga mga emosyon, sama sa kasuko, kasilag, … [o] kahadlok … sama ra kini sa pagtagamtam sa malumo nga lami sa usa ka ubas samtang nagkaon og sili nga jalapeño. … Ang [usa ka lasa] hingpit nga mosapaw sa lain.”⁵ Busa mao usab, ang mga pamatasan nga mopahilayo kanato gikan sa Espiritu Santo, lakip ang sala,⁶ nga makapahimo kanato nga maglisod sa pagsabot sa gugma sa Dios alang kanato.

Sa samang paagi, ang atong pagbati sa gugma sa Dios lagmit nakunhoran sa malisod nga mga kahimtang ug ang sakit nga pisikal o sa pangisip, nalakip sa uban pang mga butang. Sa tanan niini nga sitwasyon, ang tambag sa masaligan nga mga lider o mga propesyonal sa kasagaran makaayo. Kita mahimo usab nga mosulay sa pagpalambo sa atong pagkadali nga modawat sa gugma sa Dios pinaagi sa pagpangutana sa atong kaugalingon, “Ang ako bang gugma alang sa Dios makanunayon, o gihigugma ba nako Siya kon ako anaa sa maayong mga panahon, apan dili kaayo tanto kon ako anaa sa dili maayong panahon?”

Ang ikaduha nga kamatuoran mao nga kita adunay langitnong mga ginikanan, usa ka amahan ug usa ka inahan.⁷ Ang doktrina bahin sa usa ka Langitnong Inahan naggikan sa pagpadayag ug nagpalahi sa pagtuo sa mga Santos sa Ulahing mga Adlaw. Si Elder Dallin H. Oaks mipasabot sa kaimportante niining kamatuoran, “Ang atong teyolohiya nagsugod sa langitnong mga ginikanan. Ang atong kinatas-an nga pangandoy mao nga mahisama kanila.”⁸

Gamay lang kaayo ang gipadayag kabahin sa Inahan sa Langit, apan ang unsay atong nasayran giminubo diha sa Gospel Topic Essays nga makita diha sa atong Gospel Library application.⁹ Sa higayon nga inyong mabasa unsay anaa diha, masayran ninyo ang tanang butang nga akong nahibaloan mahitungod sa hilisgotan. Nanghinaot ko nga masayod pa og dugang. Kamo usab mahimong aduna pay mga pangutana ug gustong makakita og dugang pa nga mga tubag. Ang pagpangita og mas dako nga pagsabot mao ang usa ka importante nga bahin sa atong espiritwal nga paglambo, apan palihog pagmatngon. Ang pangatarongan dili ikapuli sa pagpadayag.

Ang pagpangagpas dili mosangpot ngadto sa mas dakong espiritwal nga kahibalo, apan kini makadala ngadto sa pagkalingla o makatipas sa atong pag-focus gikan sa unsay gipadayag.¹⁰ Pananglitan, ang Manluluwas nagtudlo sa Iyang mga disipulo, “Kamo kinahanglan gayod nga mag-ampo sa kanunay ngadto sa Amahan sa akong ngalan”¹¹ Kita mosunod niining sumbanan ug modirekta sa atong pagsimba ngadto sa atong Langitnong Amahan sa ngalan ni Kristo ug dili mag-ampo ngadto sa Langitnong Inahan.¹²

Sukad pa sa una ang Dios mipili og mga propeta, sila gihatagan og awtoridad sa pagpamulong alang Kaniya. Apan sila dili mosulti og mga doktrina nga mugna-mugna “sa [ilang] kaugalingong hunahuna”¹³ o magtudlo sa unsay wala gipadayag. Hunahunaa ang mga pulong ni propeta Balaam sa Daang Tugon, kinsa gitanyagan og usa ka suhol sa pagtunglo sa mga Israelihanon aron sa kaayohan sa Moab. Si Balaam miingon, “Bisag ihatag pa [sa hari sa Moab] kanako ang iyang balay nga puno sa plata ug bulawan, dili ako makalapas sa sugo sa Ginoo nga akong Dios, tumanon ko gayod kini.”¹⁴ Ang mga propeta sa Ulahing mga Adlaw adunay susama nga restriksiyon. Ang pagbungat og pagpadayag gikan sa Dios usa ka arogante ug dili mabungahon. Hinoon, kita magpaabot sa Ginoo ug sa Iyang gitakda nga panahon aron ipadayag ang Iyang mga kamatuoran sa paagi nga Iyang gipasiugdahan.¹⁵

Ang ikatulo nga kamatuoran sa pagsugod sa parapo sa tema sa Young Women mao nga kita adunay “usa ka diosnong kinaiya.” Mao kini ang mahinungdanong bahin kon si kinsa kita. Kini sa espirituhanong paagi “kaliwat,” nga napanunod gikan sa atong langitnong mga ginikanan,¹⁶ ug walay gikinahanglan nga paningkamot sa atong bahin. Kini ang atong labing importante nga kailhanan [identity], dili igsapayan kon giunsa nato sa pagpili ang pag-ila sa atong kaugalingon. Ang pagsabot niining mahinungdanong kamatuoran importante sa tanan apan ilabi na sa mga indibidwal nga sa kasaysayan nahisakop ngadto sa minoriya nga mga grupo sa dinaugdaug, o sa gilupig. Hinumdomi nga ang inyong labing importante nga pagkatawo may kalabotan sa inyong diosnong kinaiya isip anak sa Dios.

Ang ikaupat nga kamatuoran mao nga kita adunay “mahangtorong padulngan.” Ang maong padulngan dili ipugos ngari kanato. Human sa kamatayon, kita makadawat sa unsay angay alang kanato ug “maglipay [lamang] niana diin [kita] mouyon sa pagdawat.”¹⁷ Ang pag-amgo sa atong mahangtoron nga padulngan mag-agad sa atong mga pagpili. Kini nagkinahanglan sa paghimo ug pagtuman sa sagradong mga pakigsaad. Kini nga dalan sa pakigsaad mao ang paagi nga kita makaduol ngadto ni Kristo ug gibase sa hingpit nga kamatuoran ug mahangtoron, dili mausab nga balaod. Kita dili makahimo og atong kaugalingong dalan ug molaom nga mosangpot sa mga saad sa Dios. Ang pagpaabot sa Iyang mga panalangin samtang wala magsunod sa mahangtorong mga balaod diin kini gipasikad¹⁸ wala magiyahi sa sakto, sama sa paghunahuna nga kita mohikap sa init nga stove ug “mohukom” nga dili mapaso.

Lagmit nasayod na kamo nga kanhi nag-atiman ko og mga pasyente nga adunay sakit sa kasingkasing. Ang ilang kinanindotan nga resulta naangkon pinaagi sa pagsunod sa naestablisar, gibase sa ebidensiya nga mga plano sa pagtambal. Bisan pa sa pagkahibalo niini, ang uban nga mga pasyente mosulay sa paghimo og lahi nga plano sa pagtambal. Miingon sila, “Dili ko gustong motumar og daghan kaayong tambal” o “Dili ko gustong mopaubos sa daghan kaayong follow-up nga pagsusi.” Siyempre, ang mga pasyente gawasnon sa paghimo sa ilang kaugalingong mga desisyon, apan kon sila matipas gikan sa kinanindotan nga mga plano sa pagtambal, ang ilang mga resulta pag-antos. Ang mga pasyenteng adunay sakit sa kasingkasing dili makapili og ubos nga paagi ug dayon basolon ang ilang cardiologist tungod sa ubos nga mga sangpotanan.

Sama kini katinuod ngari kanato. Ang Langitnong Amahan mihatag og dalan paingon sa labing maayo nga mahangtorong mga sangpotanan. Gawasnon kita sa pagpili, apan kita dili makapili sa mga sangpotanan sa dili pagsunod sa gipadayag nga dalan.¹⁹ Ang Ginoo nag-ingon “Kana nga naglapas sa usa ka balaod, ug wala magsunod pinaagi sa balaod, apan nagtinguha nga mahimo nga usa ka balaod ngadto sa iyang kaugalingon, … dili mabalaan pinaagi sa balaod, ni pinaagi sa kalooy, kaangayan, ni paghukom.”²⁰ Kita dili makatipas gikan sa dalan sa Langitnong Amahan ug dayon basolon Siya sa ubos nga mga sangpotanan.

Ang ikaduha nga parapo sa tema sa Young Women mabasa nga: “Isip usa ka disipulo ni Jesukristo, ako maningkamot nga mahimong sama Kaniya. Ako magtinguha ug motuman sa personal nga pagpadayag ug mangalagad sa uban pinaagi sa Iyang balaan nga ngalan.” Mahimo kitang makadawat og pagpamatuod ni Jesukristo pinaagi sa paglihok uban sa hugot nga pagtuo.²¹ Kita makaangkon og espirituwal nga gasa “aron masayod nga si Jesukristo mao ang Anak sa Dios, ug nga siya gilansang sa krus alang sa mga sala sa kalibotan.” O kita makadawat sa gasa nga motuo sa mga pulong niadtong kinsa nasayod,²² hangtod nga kita mismo masayod. Kita makasunod sa mga pagtulon-an sa Manluluwas ug motabang sa uban nga moduol ngadto Kaniya. Niining paagiha, kita moapil Kaniya diha sa Iyang buhat.²³

Ang tema sa Young Women nagpadayon, “Ako mobarog ingon nga usa ka saksi sa Dios sa tanan nga mga panahon ug diha sa tanan nga mga butang ug diha sa tanan nga mga dapit.” Ang tanang miyembro sa Simbahan gikinahanglan isip mga saksi sa Dios,²⁴ bisan kon ang Apostoles ug mga Seventy mao ang gitahasan isip espesyal nga mga saksi sa ngalan ni Kristo.²⁵ Hunahunaa ang usa ka sangka sa soccer diin ang goalie lang ang manalipod sa goal. Kon wala ang tabang sa uban nga magdudula sa team, ang goalie dili makahimo sa igong pagdepensa sa goal, ug ang team kanunayng mapildi. Ingon usab niana, ang tanan gikinahanglan diha sa team sa Ginoo.²⁶

Ang kataposan nga parapo sa tema sa Young Women nagsugod sa, “Samtang ako maningkamot aron mahimong angay sa kahimayaan, akong hatagan og bili ang gasa sa paghinulsol ug magtinguha nga molambo sa matag adlaw.” Tungod sa maulaon nga sakripisyo sa Manluluwas, kita makahinulsol, makat-on sa atong mga kasaypanan, ug dili masilotan gumikan niini. Si Presidente Russell M. Nelson nagtudlo: “Daghan ra kaayo ang nagkonsiderar sa paghinulsol isip silot. … Apan kining pagbati nga gisilotan hinimo-himo ni Satanas. Siya mosulay sa pagpugong kanato sa paghunahuna kang Jesukristo, kinsa nagbarog nga andam mogakos, malaumon ug andam nga moalim, mopasaylo, mohugas, mopalig-on, molimpyo, ug mobalaan kanato.”²⁷

Kon kita sinsero nga maghinulsol, walay espirituwal nga uwat ang magpabilin, bisan unsa pa ang atong nabuhat, kon unsa ka bug-at kadto, o kapila ka higayon nga ato kining nabuhat.²⁸ Kon kanunay kitang maghinulsol ug mangayo og kapasayloan, uban sa tinuod nga katuyoan, kita pasayloon.²⁹ Pagkadalaygon nga gasa gikan sa atong Manluluwas, si Jesukristo!³⁰ Ang Espiritu Santo makasiguro kanato nga kita napasaylo. Samtang kita mobati sa kalipay ug kalinaw,³¹ ang kasaypanan nakuha sa hingpit,³² ug kita dili na hasolon sa atong mga sala.³³

Bisan human sa sinsero nga paghinulsol, hinoon, kita mahimong makasala. Ang pagkasala wala magpasabot nga ang paghinulsol dili igo apan mahimong maghulagway sa tawhanong kahuyang. Makahupay kaayo nga masayod nga “ang Ginoo nagtan-aw sa mga kahuyang sa lahi nga paagi kay sa Iyang [pagtan-aw] sa pagsupak.” Kita kinahanglang dili magduha-duha sa abilidad sa Manlululwas sa pagtabang kanato sa atong kahuyang tungod kay “kon ang Ginoo maghisgot bahin sa mga kahuyang, kanunay inubanan kini sa kalooy.”³⁴

Ang tema sa Young Women mitapos sa, “Uban sa hugot nga pagtuo, akong lig-onon ang akong panimalay ug pamilya, mohimo ug motuman sa sagradong mga pakigsaad, ug modawat sa mga ordinansa ug mga panalangin sa balaan nga templo.” Ang pagpalig-on sa panimalay ug pamilya mahimong nagpasabot nga pagasugdan ang panulondon sa lig-on nga hugot nga pagtuo, o sa pagpahiuli niini.³⁵ Bisan pa man, ang kalig-on moabot pinaagi sa hugot nga pagtuo diha ni Jesukristo ug sa paghimo og sagradong mga pakigsaad.

Diha sa templo, kita masayod kon si kinsa kita ug asa kita padulong. Ang Romano nga pilosopo nga si Cicero miingon, “Ang pagkaignorante sa unsay nahitabo sa wala pa kamo natawo mao ang pagpabilin kanunay nga usa ka bata.”³⁶ Siya siyempre, nagpasabot ngadto sa kalibotanong kasaysayan, apan ang iyang abilidad sa pag-obserbar mahimong mapalapdan. Kita mabuhi hangtod sa hangtod nga morag mga bata kon kita ignorante sa mahangtoron nga panglantaw nga mabatonan diha sa mga templo. Didto molambo kita diha sa Ginoo, modawat sa kahingpitan sa Espiritu Santo,”³⁷ ug mahimong mas hingpit nga mapasaligon isip mga disipulo sa Manluluwas.³⁸ Kon kita motuman sa atong mga pakigsaad, kita makadawat sa gahom sa Dios sa atong mga kinabuhi.³⁹

Dapiton ko kamo sa pagsentro sa inyong kinabuhi diha ni Jesukristo ug hinumdoman ang mga kamatuoran diha sa tema sa Young Women. Kon kamo andam, ang Espiritu Santo mogiya kaninyo. Ang atong Langitnong Amahan gusto nga kamo mamahimong Iyang manununod ug modawat sa tanan nga anaa Kaniya.⁴⁰ Siya wala nay labaw pa nga ikatanyag kaninyo. Siya wala nay labaw pa nga ikasaad kaninyo. Siya nahigugma kaninyo labaw pa sa inyong nasayran ug gusto nga kamo magmalipayon niining kinabuhi ug sa kinabuhi nga moabot. Sa ngalan ni Jesukristo, amen.