Elder Denelson Silva

Ang 4,000 ka milya (6,400 km) nga biyahe pabalik gikan sa Luanda, Angola, ngadto sa São Paulo, Brazil, naghatag ni Elder Denelson Silva ug sa iyang asawa, si Regina, og panahon sa pakigbisog sa usa ka pag-aghat. Human sa pagserbisyo isip presidente sa misyon, si Elder Silva mibati nga siya ug ang iyang asawa kinahanglang dili mopalit og balay.

Gibaligya nila ang ilang balay sa wala pa mobiya alang sa ilang misyon. Sila nagplano nga mopalit og bag-ong balay inig pauli nila apan mibati og pag-aghat nga maghulat lang. “Ang mga balay sa Brazil dili kabtangan nga imong gipundar aron ibaligya ug mahalin dayon,” miingon si Elder Silva. “Modangat kini og pipila ka adlaw o mga bulan o mga tuig.”

Si Sister Silva miingon nga sila mipokus sa kamatuoran nga ang Langitnong Amahan migiya nila sa wala pa sila magmisyon ug Siya mogiya nila pag-usab. “Nakahukom kaming duha nga maghulat lang una,” siya miingon. Sila mipili nga mangabang na lang og balay.

Sama sa pagbaligya og balay sa Brazil, ang tubag wala moabot sa pipila ka adlaw o mga bulan o gani usa ka tuig. Ang tubag miabot paglabay sa sobra sa duha ka tuig sa dihang si Elder Silva nakadawat og tawag sa pagserbisyo isip Kinatibuk-ang Awtoridad nga Seventy.

“Kinahanglan nga kita adunay panghunahuna nga kon Siya mohangyo nato sa pagbuhat og usa ka butang, ang atong tubag kanunay nga oo,” miingon si Elder Silva. “Kon ang tubag dili kanunay nga ‘oo,’ maghatag kini og luna sa ‘dili’ o ‘tingali.’” Hinoon, alang sa Manluluwas, siya mipasabot, “walay luna sa ‘dili’ o ‘tingali’ didto sa Getsemani.”

Si Denelson Urbano da Silva natawo niadtong Hulyo 4, 1965, sa Recife, Brazil, ngadto ni Domingos Urbano da Silva ug Maria José de Almeida Silva. Nagdako siya sa Recife ug nasilyo ngadto ni Regina Maria de Carvalho Silva didto sa São Paulo Brazil Temple niadtong Mayo 1987. Ang magtiayon adunay duha ka anak.

Siya adunay bachelor’s degree in business administration (data processing). Nagtrabaho siya sa travel industry sulod sa 30 ka tuig.

Gikan sa 2016 ngadto sa 2019, si Elder Silva nagserbisyo isip presidente sa misyon uban sa iyang asawa didto sa Angola Luanda Mission. Siya nakaserbisyo usab isip Area Seventy, presidente sa stake, bishop, high councilor, ug full-time nga misyonaryo sa Brazil Curitiba Mission.