“Laj Ismael ut lix junkab’al,” Eb’ li Seraq’ sa’ lix Hu laj Mormon (2023)
Laj Ismael ut lix junkab’al
Tz’aqonk sa’ li b’eenik toj sa’ li yamyookil ch’och’
Lix junkab’al laj Lehi ut li xSariah ke’kana xjuneseb’ sa’ li yamyookil ch’och’. Sa’ jun li kutan, li Qaawa’ kixye re laj Lehi naq tixtaqlaheb’ li ralal, laj Laman, laj Lemuel, laj Sam, ut laj Nefi, aran Jerusalen. Ke’taqlaak chixtz’aamankil re laj Ismael ut lix junkab’al naq te’xjunaji rib’ rik’ineb’. Sa’ junajil eb’ lix junkab’al te’ruuq chi wank xkok’aleb’ sa’ li yamyookil ch’och’.
Laj Ismael ut lix junkab’al ke’raj xtaaqenkil li Qaawa’. Ke’xpaab’ naq li Qaawa’ kiraj naq te’xjunaji rib’ rik’in lix junkab’al laj Lehi ut li xSariah. Ke’xsik’ ru elk chaq aran Jerusalen ut xtawb’al laj Lehi sa’ li yamyookil ch’och’.
Naq yookeb’ chi b’eek, junjunq reheb’ ink’a’ chik ke’raj paab’ank. Ke’raj sutq’iik sa’ li rochocheb’. Laj Nefi kixpatz’ reheb’ naq te’xpaab’ li Qaawa’.
Laj Nefi kixye naq li Qaawa’ taaruuq tixb’aanu yalaq k’a’ru wi te’wanq xpaab’aal. A’b’an ke’josq’o’ laj Laman ut laj Lemuel. Ke’xb’ak’ laj Nefi ut ke’raj xkanab’ankil sa’ li yamyookil ch’och’.
Laj Nefi kitijok re xtz’aamankil xtenq’. Ke’hitman li k’aam, ut laj Nefi kixaqli. A’b’an laj Laman ut laj Lemuel toj ke’raj xrahob’tesinkil. Jun reheb’ lix rab’in laj Ismael kixkol rix laj Nefi. Lix na’ ut jun reheb’ li ras ke’xkol ajwi’ rix. Laj Laman ut laj Lemuel ke’ab’in chiruheb’ ut ke’xkanab’ xrahob’tesinkil laj Nefi.
Laj Laman ut laj Lemuel ke’xutanaak xb’aan lix b’aanuhomeb’. Ke’xpatz’ re laj Nefi naq tixkuy xmaakeb’. Laj Nefi kixkuy xmaakeb’ li ras. Toja’ naq laj Laman ut laj Lemuel ke’tijok ut ke’xpatz’ re li Qaawa’ naq tixkuyeb’ xmaak.
Ke’xchap wi’chik xb’eheb’ ut ke’wulak sa’ xmuheb’aal t’ikr laj Lehi ut li xSariah. Junajeb’ chik li junkab’al. Ke’b’antioxin chiru li Qaawa’ ut ke’xloq’oni.